కాంగ్రెస్ Vs బీఆర్ఎస్ రాజీనామా రాజకీయం - గన్​పార్క్​ను హరీశ్ రావు మలినం చేశాడని క్లీన్ చేసిన హస్తం నేతలు - HARISHRAO Vs CM REVANTH REDDY

Congress Leaders Counter to Harish Rao Challenge : వేసవి తాపానికి తోడు సార్వత్రిక ఎన్నికల వేడి రాష్ట్రంలో భగ్గుమంటోంది. ఈ క్రమంలో కాంగ్రెస్​, బీఆర్​ఎస్​ పార్టీల మధ్య మాటల యుద్ధం మొదలైంది. సవాళ్లకు ప్రతిసవాళ్లు చేసుకుంటూ రాష్ట్రాన్ని రణక్షేత్రంగా మార్చేశారు. మాజీ మంత్రి హరీశ్​రావు, సీఎం రేవంత్​ రెడ్డి మధ్య రుణమాఫీకి సంబంధించిన మాటల యుద్ధం తారాస్థాయికి చేరుకుంది.

Congress Leaders Counter to Harish Rao Challenge :లోక్​సభ ఎన్నికల వేళ రాష్ట్ర రాజకీయం మండు వేసవిని మించి భగ్గుమంటోంది. రైతు రుణమాఫీపై కాంగ్రెస్​, బీఆర్​ఎస్​ మధ్య సవాళ్లు-ప్రతిసవాళ్లు మంటలు రేపుతున్నాయి. పంద్రాగస్టులోగా రుణమాఫీ చేస్తామన్న సీఎం రేవంత్​ రెడ్డి ప్రకటనపై బీఆర్​ఎస్​ సీనియర్​ నేత, మాజీ మంత్రి హరీశ్​రావు చేసిన సవాల్​ మాటల యుద్ధానికి దారి తీసింది. ఆగస్టు 15లోగా రుణమాఫీ చేస్తే తాను రాజీనామాకు సిద్ధమని, చేయకపోతే రేవంత్​ రెడ్డి సీఎం పదవికి రాజీనామా చేస్తారా అంటూ ఇవాళ హరీశ్ రావు గన్​పార్క్ అమరవీరుల స్తూపం వద్దకు వెళ్లి మరోసారి ఛాలెంజ్ చేశారు.

హరీశ్​రావు అమరవీరుల స్తూపం వద్దకు వచ్చి మలినం చేశారని, పసుపు నీళ్లతో ఆ మలినాన్ని శుద్ధి చేసినట్లు ఎమ్మెల్సీ, ఎన్​ఎస్​యూఐ రాష్ట్ర అధ్యక్షుడు బల్మూరి వెంకట్​ తెలిపారు. ఆగస్టు 15లోగా రెండు లక్షల రూపాయల రుణమాఫీ చేస్తామని ముఖ్యమంత్రి రేవంత్​ రెడ్డి మాటిచ్చారని గుర్తు చేశారు. ఆ మాటలను అమలు చేస్తే బీఆర్​ఎస్​ పార్టీని రద్దు చేస్తారా అని ప్రశ్నించారు.హరీశ్​రావు తన రాజీనామాతో కొత్త డ్రామాకు తెర తీశారని మండిపడ్డారు. రూ.2 లక్షల రుణమాఫీకి తమ ప్రభుత్వం కట్టుబడి ఉందని అన్నారు. హరీశ్​రావు రాజీనామా విషయంలో తాను బాధ్యత తీసుకొని రాజీనామా ఆమోదించేలా చేస్తానని వెంకట్​ స్పష్టం చేశారు.

"అమరవీరుల స్తూపాన్ని మాజీ మంత్రి హరీశ్​రావు అపవిత్రం చేశారని పసుపు నీళ్లతో శుద్ధి చేశాం. ఆగస్టు 15లోగా రుణమాఫీ చేస్తామని సీఎం మాటిచ్చారు. హరీశ్​రావు తన రాజీనామాతో కొత్త డ్రామాకు తెర తీశారు. ఆగస్టు 15లోగా ఇచ్చిన మాట ప్రకారం హామీ నెరవేరుస్తాం. నేను బాధ్యత తీసుకుని హరీశ్​రావు రాజీనామా ఆమోదించేలా చూస్తాను."- బల్మూరి వెంకట్​, ఎమ్మెల్సీ

మరోవైపు హరీశ్ రావు ఛాలెంజ్ స్వీకరించిన సీఎం రేవంత్​ రెడ్డి రాజీనామా పత్రాన్ని సిద్ధం చేసుకోవాలని సూచించారు. అందుకు తగ్గట్లుగానే మాజీ మంత్రి హరీశ్​రావు రాజీనామా లేఖతో గన్​పార్కులోని అమరవీరుల స్తూపం వద్దకు వచ్చారు. తాను మాటకు కట్టుబడి ఉన్నానని పదవికి రాజీనామా చేస్తానని ప్రమాణం చేసేందుకు సీఎం గన్​పార్కు వద్దకు రావాలని కోరారు. ఇదిలా ఉండగా హరీశ్​రావు రాజీనామా సవాల్​పై మంత్రులు కోమటిరెడ్డి వెంకట్​ రెడ్డి, పొన్నం ప్రభాకర్​ భగ్గుమన్నారు. బీఆర్​ఎస్​ నేత రాజీనామా డ్రామాతో ప్రజలను మాయ చేయాలని చూస్తున్నారని ధ్వజమెత్తారు. ఆగస్టు 15 వరకు రుణమాఫీ చేసి తీరుతామని స్పష్టం చేశారు. ఇలా మాటల తూటాలతో రాష్ట్ర రాజకీయం వేసవిలో కూడా మండుటెండలా భగ్గుమంటుంది.