MP DK Aruna Condemns Attack On Allu Arjun House : సినీ నటుడు అల్లు అర్జున్ ఇంటిపై దాడిని బీజేపీ ఎంపీ డీకే అరుణ ఖండించారు. దాడి ఘటనలో 4 మంది కొడంగల్‌ వాసులున్నారని ఆమె ఆరోపించారు. జైలు నుంచి విడుదలైనటువంటి లగచర్ల రైతులను డీకే అరుణ పరామర్శించారు. అనంతరం ఆమె మీడియాతో మాట్లాడుతూ అల్లు అర్జున్ ఇంటిపై దాడి ఘటన నిందితుల్లో ఒకరు కాంగ్రెస్‌ జడ్పీటీసీగా పోటీ చేశారని ఆ పార్టీ నేతలే ఈ దాడి చేయించారనే అనుమానం కలుగుతోందని విమర్శించారు.
అల్లు అర్జున్ ఇంటిపై దాడి ఘటన :ఓయూ జేఏసీ స్డూడెంట్స్ యూనియన్ ఆందోళనతో జూబ్లీహిల్స్లో అల్లు అర్జున్ ఇంటివద్ద ఆదివారం ఉద్రిక్తత చోటుచేసుకుంది. మృతురాలు కుటుంబానికి అల్లు అర్జున్ వెంటనే రూ.కోటి పరిహారం చెల్లించాలని విద్యార్థి సంఘాలు డిమాండ్ చేశాయి. ఈ క్రమంలోనే నిరసనకారులు అల్లు అర్జున్ నివాసంపై రాళ్లను విసిరారు. నినాదాలు చేస్తూ ఆయన ఇంట్లోకి వెళ్లేందుకు యత్నించారు. నిరసనకారులు విసిరిన రాళ్లు తగిలి అల్లు అర్జున్ ఇంటి ఆవరణలో పూల కుండీలు, గార్డెన్లోని మొక్కలు ధ్వంసమయ్యాయి. ఈ ఘటనపై సమాచారమందుకున్న పోలీసులు అక్కడకు చేరుకుని నిరసనకారులను అదుపులోకి తీసుకున్నారు. అర్జున్ నివాసం వద్ద అదనపు పోలీసు బలగాలతో బందోబస్తును ఏర్పాటు చేశారు.