దుస్తులపై టీ మరకలు పడ్డాయా? - ఇలా క్లీన్​ చేస్తే పూర్తిగా తొలగిపోతాయి!

- చాయ్ మరకలు తొలగించే బెస్ట్​ టిప్స్​

Tips to Remove Tea Stains from Clothes :టీ తాగేటప్పుడు ఒక్కోసారి దుస్తుల మీద పడుతుంటుంది. దీంతో ఆ ప్రదేశంలో మరకలు ఏర్పడుతుంటాయి. ఆ మరకలను తొలగించడానికి విశ్వప్రయత్నాలు చేస్తుంటారు. కొందరు గోరువెచ్చని నీళ్లు పోసి, ఉప్పు, నిమ్మకాయ వేసి బాగా రుద్దుతుంటారు. దీనివల్ల మరక పోవడం అటుంచితే.. ఆ ప్రదేశంలో దుస్తుల రంగు వెలిసిపోయినట్లుగా తయారవుతుంది. అయితే.. కొన్ని టిప్స్​ పాటించడం ద్వారా దుస్తులపై ఏర్పడిన టీ మరకలను ఈజీగా తొలగించుకోవచ్చని నిపుణులు చెబుతున్నారు. ఆ చిట్కాలు ఏంటో మీరు చూసేయండి.

బేకింగ్ సోడాతో..

సాధారణంగా వంటింట్లో బజ్జీలు, కేక్​లు ఇతర ఆహార పదార్థాలు చేయడానికి బేకింగ్​ సోడా ఉపయోగిస్తుంటాం. అయితే.. ఇది దుస్తులపై పడిన చాయ్ మరకల్ని తొలగించేందుకు కూడా ఉపయోగపడుతుంది. ఇందుకోసం టీ మరకలు పడిన ప్రదేశంలో టేబుల్​ స్పూన్ బేకింగ్ సోడా వేసి నెమ్మదిగా రుద్దాలి. కొద్దిసేపటి తర్వాత దుస్తుల్ని క్లీన్​ చేస్తే టీ మరక మాయం.

కాస్త వేడి నీటితో..

నార్మల్​గా కాటన్ దుస్తులపై టీ మరకలు పడితే ఓ పట్టాన తొలగిపోవు. అలాంటప్పుడు ఎక్కడైతే టీ మరక పడిందో ఆ ప్రదేశంలో కాస్త వేడిగా ఉన్న వాటర్​ని నేరుగా పోయాలి. మరీ వేడిగా ఉన్న వాటర్​ని ఉపయోగించకూడదు. వేడి ఎంత ఎక్కువగా ఉంటే.. దుస్తుల నాణ్యత అంత దెబ్బతినే అవకాశాలున్నాయి.

స్ప్రే చేయాలి..

చాయ్ మరకల్ని తొలగించడంలో వెనిగర్ చాలా బాగా ఉపయోగపడుతుంది. ఇందుకోసం కప్పు వాటర్​లో టేబుల్​స్పూన్​ వెనిగర్ వేసి బాగా కలుపుకోవాలి. ఈ లిక్విడ్​ని స్ప్రే బాటిల్లో పోసి మరక పడిన చోట స్ప్రే చేయాలి. ఆపై నెమ్మదిగా రుద్దాలి. ఇలా చేస్తే క్రమంగా మరక తొలగిపోతుంది.

టూత్‌పేస్ట్​తో మరకలు మాయం..

దుస్తుల రంగు వెలిసిపోకుండా టీ మరకలు ఈజీగాతొలగిపోవాలంటే మనం బ్రష్ చేసుకోవడానికి ఉపయోగించే టూత్‌పేస్ట్ యూజ్​ చేయవచ్చు. ఇందుకోసం మరక పడిన చోట టూత్‌పేస్ట్ కొద్దిగా పూసి 20 నిమిషాల పాటు అలాగే ఉంచాలి. ఆపై మంచి నీటితో ఆ వస్త్రాన్ని ఉతికేస్తే సరిపోతుంది. మరక పూర్తిగా మాయమవుతుంది.

ఇలా కూడా మరక మాయం చేయొచ్చు!

• దుస్తులపై టీ పడిన వెంటనే వెళ్లి వాటర్​తో క్లీన్​ చేసుకుంటే మరక సులభంగా పోతుంది. ఒకవేళ అలా కుదరకపోతే కూల్​ వాటర్​లో ఆ వస్త్రాన్ని అరగంట పాటు నానబెట్టి ఉతకాలి.
• ఎక్కువ మంది టీ మరకల్ని తొలగించుకోవడానికి నిమ్మరసాన్ని ఉపయోగిస్తుంటారు. అయితే ఇందులోని బ్లీచింగ్ లక్షణాల వల్ల రంగు బట్టలు వెలిసిపోయే ఛాన్స్​ ఉంటుంది. కాబట్టి ఈ టిప్​ని తెలుపు రంగు దుస్తులకు మాత్రమే ఉపయోగించడం మంచిది.
• టీ మరక పడిన ప్రదేశంలో కాస్త లిక్విడ్ డిటర్జెంట్ వేసి చేతి మునివేళ్లతో నెమ్మదిగా రుద్దాలి. కొద్దిసేపటి తర్వాత శుభ్రం చేస్తే మరక పోతుంది.