రిస్ట్ వాచ్ కాదు.. రింగ్ వాచ్.. ఇది పెట్టుకుంటే మీరే సూపర్ స్మార్ట్​!

మార్కెట్లోకి సరికొత్త రింగ్ వాచ్- ఇప్పుడిదే ఫ్యాషన్ బ్రో!

Casio Ring Watch: ప్రస్తుతం మారుతున్న టెక్నాలజీకి అనుగుణంగా మార్కెట్లో కొత్త కొత్త ప్రొడక్ట్స్ పుట్టుకొస్తున్నాయి. సాధారణంగా స్మార్ట్​ఫోన్లు అదిరే ఫీచర్లతో స్టన్నింగ్ లుక్​లో విడుదలవుతున్నాయి. అయితే వీటికేం తీసిపోకుండా ఇదే రీతిలో స్మార్ట్​వాచ్​లు కూడా మార్కెట్లో రిలీజ్ అవుతున్నాయి. మణికట్టుపై కేవలం 2 అంగుళాల లోపు డిస్​ప్లేతో కనిపించే ఈ వాచ్​లలో స్మార్ట్​ఫోన్లకు తీసిపోని ఇంట్రెస్టింగ్ ఫీచర్లతో వస్తున్నాయి.

దీంతో స్మార్ట్​వాచ్​ల సేల్స్ ​ఆశ్చర్యకర రీతిలో పెరిగిపోతున్నాయి. ఈ నేపథ్యంలో కంపెనీలు ఎప్పటికప్పుడు మార్కెట్లో తమ అప్​డేటెడ్ స్మార్ట్​వాచ్​లను రిలీజ్ చేస్తున్నాయి. ఈ క్రమంలో డిజిటల్ వాచ్​ల తయారీకి పేరుగాంచిన క్యాసియో వినూత్న ఆవిష్కారంతో ముందుకొచ్చింది. ఫింగర్​ రింగ్​లో స్మార్ట్​వాచ్​ను ఫిట్​ చేసి రీలీజ్ చేసింది. ఇది కంపెనీ మొట్ట మొదటి రింగ్ ​వాచ్.

అంగుళం కంటే చిన్న పరిమాణంలో ఉన్న ఈ రింగ్​ వాచ్​ను​ కంపెనీ ఏడు సెగ్మెంట్ల LCD స్క్రీన్‌తో తీసుకొచ్చింది. ఇది గంటలు, నిమిషాలు, సెకన్లను చూపిస్తుంది. ఇందులో మూడు ఫిజికల్ బట్స్​ ఉంటాయి. వీటి సహాయంతో టైమ్​ సెట్​ చేసుకోవచ్చు. అంతేకాక ఇందులో స్టాప్​వాచ్ ఫీచర్​ కూడా ఉంది.

ఈ రింగ్ వాచ్‌లో స్టెయిన్‌లెస్ స్టీల్‌తో చేసిన బెజెల్స్‌తో టిన్నీ కేస్ కూడా ఉంది. ఇది స్క్రీన్ లైట్ సోర్స్. చీకటిలో టైమ్​ను చూసుకునేందుకు ఇది ఉపయోగపడుతుంది. ఈ రింగ్​ వాచ్​కు స్పీకర్ లేదు. కానీ అలారం మోగినప్పుడు ఫ్లాష్​ అవుతుంది. ఈ రింగ్ వాచ్​ ఇటీవలే శాంసంగ్ రిలీజ్​ చేసిన స్మార్ట్​రింగ్​ మాదిరిగానే అనిపించొచ్చు. అయితే ఇందులో స్లీప్ ట్రాకింగ్, హార్ట్ రేట్ లేదా బ్లడ్ ఆక్సిజన్ లెవెల్ మానిటరింగ్ వంటి ఫిట్‌నెస్ ట్రాకింగ్ ఫీచర్లు ఏవీ లేవు.

మెషిన్-ట్రాన్స్‌లేటెడ్ వెర్షన్ వెబ్‌సైట్ ప్రకారం.. క్యాసియో వాచ్​ను ఫుల్​ మెటల్ డిజైన్​తో రింగ్​ సైజ్​లో రూపొందించారు. దీన్ని రోజువారీ వినియోగం కోసం వాటర్​ప్రూఫ్​ టచ్​తో తీసుకొచ్చారు. ఇది ఈజీ రీప్లేస్​బుల్ బ్యాటరీతో వస్తుంది. ఇది 2 సంవత్సరాల వరకు ఎలాంటి సమస్యలు లేకుండా పనిచేస్తుందని క్యాసియో తెలిపింది. ఈ రింగ్​ సైజ్​ 20 మిమీ. కానీ ప్యాకేజీలో 19 మిమీ, 18 మిమీ ఇన్నర్ డయామీటర్ సైజ్ అడ్జస్ట్​మెంట్​ కోసం స్పేసర్‌లు ఉన్నాయని వెబ్‌సైట్ తెలిపింది.

క్యాసియో తన 50వ వార్షికోత్సవం సెలబ్రేషన్స్​లో భాగంగా ఈ కొత్త రింగ్​ వాచ్​ను రెడీ చేసింది. ఇది డిసెంబర్​లో ¥19,800 జపాన్‌లో అందుబాటులో ఉంటుంది. ఇండియన్ రూపీస్​లో దీని ధర దాదాపు రూ.10,810 ఉంటుంది.