How to Make Semiya Pakoda at Home:ఈవెనింగ్ టైంలో క్రంచిగా ఏదో ఒక స్నాక్ తినాలనిపిస్తుంది. అటువంటి సమయంలో అందరూ తేలికగా చేసుకునేది ఉల్లిపాయ పకోడి. అది కాదంటే.. ఆలూ బజ్జీ, పాలకూర పకోడి వంటివి చేసుకుంటుంటారు. అయితే ఎప్పుడూ అదే కాకుండా వెరైటీగా చేసుకోవాలనుకునేవారు ఓసారి సేమియా పకోడి ట్రై చేయండి. టేస్ట్ అద్దిరిపోతుంది. ఆయిల్ ఫుడ్ అని భయపడేవారే.. మరో రెండు ఎక్స్ట్రా లాగిస్తారు. టేస్ట్ అంతబాగుంటుంది. చెబితేనే నోరూరుతోందా.. అయితే ఓసారి మీరూ ట్రై చేయండి. మరి వాటికి కావాల్సిన పదార్థాలు, తయారీ విధానం ఈ స్టోరీలో చూద్దాం..
కావాల్సిన పదార్థాలు:
- సేమియా - ఒకటిన్నర కప్పులు
- ఉల్లిపాయ - 1
- పచ్చిమిర్చి - 2
- జీలకర్ర - 1 టేబుల్ స్పూన్
- అల్లం వెల్లుల్లి పేస్ట్ - 1 టీస్పూన్
- పసుపు - చిటికెడు
- కరివేపాకు -2 రెమ్మలు
- కారం - 1 టీస్పూన్
- శనగపిండి - కప్పున్నర
- ఉప్పు - రుచికి సరిపడా
- కొత్తిమీర తరుగు - కొద్దిగా
- చాట్ మసాలా - 1 టీ స్పూన్
- బేకింగ్ సోడా - చిటికెడు
సేమియా పకోడి తయారీ విధానం:
- ముందుగా స్టవ్ ఆన్ చేసి పాన్ పెట్టి నీళ్లు పోసుకోవాలి. నీళ్లు మరుగుతున్నప్పుడు సేమియా, కొద్దిగా ఉప్పు వేసుకుని ఓ 50 శాతం ఉడికించుకోవాలి.
- సేమియా ఉడికిన తర్వాత జల్లెడలో వేసుకుని చల్లటి నీళ్లు పోసి కొద్దిసేపు పక్కకు పెట్టుకోవాలి.
- ఇప్పుడు ఓ బౌల్లోకి ఉల్లిపాయ తరుగు, పచ్చిమిర్చి, జీలకర్ర, కరివేపాకు, అల్లం వెల్లుల్లి పేస్ట్, పసుపు, కారం, కొత్తిమీర తరుగు, చాట్ మసాలా, రుచికి సరిపడా ఉప్పు, శనగపిండి వేసి ఉల్లిపాయ ముక్కలను పిండుతూ కలుపుకోవాలి. ఆ తర్వాత కొద్దిగా నీళ్లు వేసుకుని కలుపుకోవాలి.
- ఇప్పుడు అందులోకి ఉడికించిన సేమియా వేసి మరీ బలంగా కాకుండా కేవలం చేతి వేళ్ల సాయంతో కలుపుకోవాలి. ఇలా చేస్తే సేమియా విరగకుండా ఉంటుంది. ఇక చివరకు బేకింగ్ సోడా వేసి కలుపుకోవాలి.
- ఇప్పుడు స్టవ్ మీద కడాయి పెట్టి డీప్ ఫ్రై కి సరిపడా నూనె పోసుకోవాలి.
- నూనె హీటెక్కిన తర్వాత స్టవ్ను మీడియం ఫ్లేమ్లో పెట్టి సేమియా మిశ్రమాన్ని పకోడిలా మాదిరిగా వేసుకోవాలి.
- మంటను మీడియం ఫ్లేమ్లో ఉంచే పకోడిలను ఎర్రగా కాల్చుకుని తీసి పక్కకు పెట్టుకోవాలి. అంతే ఎంతో టేస్టీగా, క్రిస్పీగా ఉండే సేమియా పకోడి రెడీ.
- దీన్ని నిమ్మకాయ కారం లేదా టమాట సాస్తో కలిపి తింటే ఉండే మజానే వేరు. మరి మీరూ ఓ సారి ట్రై చేస్తారా?
గుంత పొంగనాల కోసం పిండి ఎందుకు గురూ? - వీటితో క్షణాల్లో చేసేయండి - టేస్ట్ ఎంజాయ్ చేయండి
సేమియా ఉప్మా ముద్ద ముద్దగా అవుతోందా? - ఇలా చేస్తే పొడిపొడిగా చాలా రుచికరంగా ఉంటుంది!
