ఎయిర్​టెల్ యూజర్లకు షాక్- ఆ రీఛార్జి ప్లాన్లలో డేటా తొలగింపు!- కారణం ఇదే!

యూజర్లకు షాక్ ఇచ్చిన ఎయిర్​టెల్- ఆ ప్లాన్​ల​తో ఇక నో నెట్!

Bharati Airtel: ప్రముఖ టెలికాం సంస్థ భారతీ ఎయిర్‌టెల్‌ యూజర్లకు షాకిచ్చింది. ఇప్పటికే అందిస్తున్న రెండు రీఛార్జి ప్లాన్లపై ఇచ్చే డేటా ప్రయోజనాలను తొలగించింది. వాయిస్‌, SMSల కోసం ప్రత్యేకంగా రీఛార్జి ప్లాన్లు తీసుకురావాలని టెలికాం కంపెనీలకు ట్రాయ్‌ ఆదేశాలు జారీ చేసిన నేపథ్యంలోనే ఎయిర్​టెల్ ఈ నిర్ణయం తీసుకున్నట్లు తెలుస్తోంది.

దీనిపై ఎయిర్ టెల్ సమాధానం ఇదే: ఎయిర్‌టెల్ వెబ్‌సైట్‌లోని లిస్ట్​లో కంపెనీ తన రీఛార్జి ప్లాన్లపై ఇచ్చే డేటా ప్రయోజనాలను తొలగించడం కనిపించింది. వాటిలో వాయిస్ కాల్స్, SMS ప్రయోజనాలు మాత్రమే ఉన్నాయి. టెలికాం కంపెనీలకు ట్రాయ్‌ ఆదేశాలు జారీ చేసిన నేపథ్యంలోనే ఈ నిర్ణయం తీసుకున్నట్లు తెలుస్తోంది.

దీంతో దీనిపై స్పష్టమైన, కచ్చితమైన సమాచారం పొందేందుకు ETV భారత్ ఎయిర్‌టెల్‌ను సంప్రదించింది. అయితే 'సాంకేతిక లోపం వల్లే వెబ్‌సైట్‌లో ప్లాన్‌లు కనిపించాయి. ఇప్పుడు సంబంధిత ప్లాన్​లను వెబ్‌సైట్ నుంచి తొలగించాం' అని కంపెనీ ఈటీవీ భారత్‌కు వివరణ ఇచ్చింది. అయితే సాంకేతిక సమస్యల కారణంగా ఎయిర్‌టెల్ వెబ్‌సైట్‌లో రూ. 509, రూ. 1999 ప్లాన్‌లలో ఏ మార్పులు కనిపించాయో తెలుసుకుందాం రండి.

ఎయిర్​టెల్ రూ.509 ప్రీపెయిడ్ ప్లాన్: ఎయిర్‌టెల్ తన రూ.509 ప్రీపెయిడ్ ప్లాన్‌ను సవరించింది. ఇది ఇప్పుడు అన్​లిమిటెడ్ వాయిస్ కాల్స్, 900 SMSలను మాత్రమే అందిస్తుంది. అయితే ఈ ప్లాన్ వ్యాలిడిటీని మాత్రం కంపెనీ 84 రోజులుగా అలానే ఉంచింది.

దీనితో పాటు అదనపు ఎయిర్‌టెల్ రివార్డులుగా ఇది ఎయిర్‌టెల్ ఎక్స్‌స్ట్రీమ్ యాప్‌లో ఉచిత కంటెంట్, అపోలో 24/7 సర్కిల్ మెంబర్​షిప్, ఉచిత హలో ట్యూన్స్‌లను కూడా అందిస్తుంది. ఎయిర్‌టెల్ ప్రకారం వాయిస్, SMSలకు మాత్రమే ప్లాన్ ఎఫెక్టివ్ ధర నెలకు దాదాపు రూ.167. గతంలో ఈ ప్లాన్‌లో 6GB డేటా కూడా ఉండేదని గమనించాలి.

ఎయిర్​టెల్ రూ.1,999 ప్రీపెయిడ్ ప్లాన్: ఎయిర్‌టెల్ రూ.509 ప్లాన్‌తో పాటు లాంగ్​టెర్మ్ లేదా వార్షిక ప్లాన్‌లను తీసుకోవాలనుకునే వినియోగదారుల కోసం కంపెనీ రూ.1,999 వార్షిక ప్లాన్‌ను ప్రవేశపెట్టింది. ఈ ప్లాన్​లో మీరు అన్​లిమిటెడ్ వాయిస్ కాల్స్​తో పాటు 3,600 SMSల సౌకర్యాన్ని పొందుతారు. ఇక ఈ ప్లాన్ వ్యాలిడిటీ 365 రోజులు. ఎయిర్‌టెల్ రూ.1,999 వార్షిక ప్లాన్‌లో ఎయిర్‌టెల్ ఎక్స్‌స్ట్రీమ్ యాప్‌లో ఉచిత కంటెంట్, అపోలో 24/7 సర్కిల్ మెంబర్​షిప్​తో పాటు అదనపు ఎయిర్‌టెల్ రివార్డులుగా ఉచిత హలో ట్యూన్స్ కూడా లభిస్తాయి.

పైన తెలిపిన ఈ రెండు రీఛార్జి ప్లాన్లపై కంపెనీ ఇంతకు ముందు డేటా ప్రయోజనాలను కూడా అందించేది. తాజాగా ఆ సదుపాయాన్ని తొలగించింది. అయితే ప్రస్తుతం ఈ రెండు ప్లాన్​లు ఎయిర్​టెల్ వెబ్‌సైట్‌లో అందుబాటులో లేవు.

ఇదిలా ఉండగా ప్రస్తుతం దాదాపు అన్ని టెలికాం కంపెనీలు వాయిస్‌, SMSలతో పాటు డేటాతో ప్లాన్‌లు అందిస్తున్నాయి. ఇంటర్నెట్ అవసరం లేకపోయినా తప్పనిసరి పరిస్థితుల్లో రీఛార్జి చేసుకోవాల్సిన పరిస్థితి నెలకొంది. దీంతో వాయిస్‌, SMSల కోసం ప్రత్యేకంగా రీఛార్జి ప్లాన్లు తీసుకురావాలని ఆయా కంపెనీలను టెలికాం రెగ్యులేటరీ అథారిటీ ఆఫ్ ఇండియా (TRAI) తాజాగా ఆదేశించింది. ఈ క్రమంలో స్పెషల్‌ టారిఫ్‌ వోచర్లు తీసుకురావాలంటూ సూచించింది.