Kothimeera Nilava Pachadi Recipe : దాదాపు ప్రతి ఇంట్లోనూ కొత్తిమీర లేకుండా కర్రీ వండలేని పరిస్థితి. ఇక నాన్వెజ్ వంటకాల్లో అయితే తప్పనిసరిగా ఉండాల్సిందే. దాని సువాసన తగలకపోతే ఏదో వెలితిగా ఫీలవుతుంటారు. అలాంటి కొత్తిమీరతోనే నిల్వ పచ్చడి పెట్టుకోవచ్చని మీకు తెలుసా? చాలా రుచికరంగా ఉండడమే కాదు, కనీసం 6 నుంచి 7 నెలలు ఉంటుంది! మరి, ఈ పచ్చడికి కావాల్సిన పదార్థాలు, తయారీ విధానమేంటో ఇప్పుడు చూద్దాం.
కావాల్సిన పదార్థాలు :
- కొత్తిమీర - 1 పెద్దకట్ట
- చింతపండు - పావు కప్పు (90 గ్రాములు)
- మెంతులు - ఒకటిన్నర స్పూన్లు (9 గ్రాములు)
- ఆవాలు - 3 స్పూన్లు (23 గ్రాములు)
- నూనె - అర కప్పు
- ఉప్పు - రుచికి సరిపడా
- పసుపు - పావు చెంచా
- కారం - తగినంత
తాలింపు కోసం :
- ఆయిల్ - అర కప్పు
- శనగపప్పు - ఒకటిన్నర స్పూన్లు
- పొట్టు మినప్పప్పు - ఒకటిన్నర స్పూన్లు
- జీలకర్ర - ఒక స్పూన్
- ఆవాలు - ఒక స్పూన్
- వెల్లుల్లి పాయ -1
- ఎండుమిర్చి - 4
- కరివేపాకు - కొద్దిగా
టేస్టీ టమాటా కొత్తిమీర పచ్చడి- వేడి వేడి అన్నంలో అయితే వేరే లెవల్!
తయారీ విధానం :
- ముందుగా కొత్తిమీర వేర్లు కట్ చేసుకోవాలి. ఆపై మరీ సన్నగా కాకుండా కాస్త పెద్దగానే కాడలతో సహా తరుక్కొని ఒక బౌల్లోకి తీసుకోవాలి.
- ఆ తర్వాత కొత్తిమీర తరుగును శుభ్రంగా కడిగి ఫ్యాన్ కింద కాటన్ క్లాత్పై పల్చగా పరచి తడి లేకుండా ఆరబెట్టుకోవాలి. ఎందుకంటే తడిగా ఉంటే పచ్చడి త్వరగా పాడయ్యే ఛాన్స్ ఉంటుంది.
- ఆ విధంగా కొత్తిమీరను పూర్తిగా ఆరబెట్టుకున్నాక, దాన్ని ఏదైనా చిన్న గిన్నెతో కొలుస్తూ మరో గిన్నెలో వేసుకోవాలి. ఎందుకంటే ఆ కొలతతోనే మిగతా ఇంగ్రీడియంట్స్ తీసుకోవాల్సి ఉంటుంది. ఇక్కడ మేము చెబుతున్న కొత్తిమీర 5 చిన్న బౌల్స్ (250 గ్రాములు) కోసం.
- ఇప్పుడు అదే కప్పుతో ఒక చిన్న బౌల్లో చింతపండును తీసుకొని గింజలు, పీచు వంటివి లేకుండా శుభ్రం చేసుకోవాలి. ఆ తర్వాత అందులో వేడినీరు పోసి గంటపాటు నానబెట్టుకోవాలి.
- నానబెట్టుకున్న తర్వాత ఒకసారి బాగా కలిపి అందులోని పిప్పిని వేరు చేసి మరీ పల్చగా, చిక్కగా కాకుండా చింతపండు గుజ్జును రెడీ చేసుకొని పక్కనుంచాలి.
- అనంతరం స్టౌపై పాన్ పెట్టుకొని మెంతులు, ఆవాలు వేసుకొని లో-ఫ్లేమ్ మీద దోరగా వేయించుకోవాలి.
- ఆపై వాటిని పూర్తిగా చల్లారాక మిక్సీ జార్లో వేసుకొని మెత్తని పొడిలా గ్రైండ్ చేసుకొని పక్కన పెట్టుకోవాలి.
- ఇప్పుడు అదే పాన్లో పావుకప్పు ఆయిల్ వేసుకొని వేడి చేసుకోవాలి. నూనె వేడయ్యాక ఆరబెట్టి పక్కన పెట్టుకున్న కొత్తిమీర తరుగును వేసి మీడియం ఫ్లేమ్ మీద మధ్యమధ్యలో కలుపుతూ చక్కగా వేయించుకోవాలి. కొత్తిమీర ఎంత బాగా వేగితే పచ్చడి అంత రుచికరంగా ఉంటుంది.
- కొత్తిమీర రంగు మారి బాగా వేగిందనుకున్నాక దాన్ని ఒక ప్లేట్లోకి తీసుకొని పక్కన పెట్టుకోవాలి. ఆ తర్వాత అందులో మరో పావు కప్పు నూనె వేసి వేడి చేసుకోవాలి.
- ఆయిల్ వేడయ్యాక ముందుగా ప్రిపేర్ చేసుకున్న చింతపండు గుజ్జు, ఉప్పు, పసుపు వేసి కలిపి మీడియం ఫ్లేమ్ మీద మిశ్రమం కాస్త దగ్గర పడే వరకు ఉడికించుకోవాలి. ఆ విధంగా ఉడికించుకున్న తర్వాత స్టౌ ఆఫ్ చేసి, మిశ్రమాన్ని పూర్తిగా చల్లారనివ్వాలి.
కొత్తిమీర త్వరగా వాడిపోతోందా ? - ఇలా స్టోర్ చేస్తే వారం రోజులపైనే ఫ్రెష్గా ఉంటుంది!
- ఈలోపు తాలింపు సిద్ధం చేసుకోవాలి. ఇందుకోసం స్టౌపై పాన్ పెట్టుకొని ఆయిల్ వేసుకోవాలి. నూనె కాస్త వేడెక్కాక శనగపప్పు, పొట్టు మినప్పప్పు, ఆవాలు, జీలకర్ర వేసి వేయించుకోవాలి.
- అవి వేగాక కచ్చాపచ్చాగా దంచిన వెల్లుల్లి రెబ్బలు వేసి వేపుకోవాలి. ఆ తర్వాత ఎండుమిర్చి తుంపలు, కరివేపాకు వేసుకొని వేయించుకున్నాక స్టౌ ఆఫ్ చేసి పాన్ను దించుకొని పూర్తిగా చల్లారనివ్వాలి.
- ఈలోపు పచ్చడిని ప్రిపేర్ చేసుకోవాలి. ఇందుకోసం మిక్సీ జార్ తీసుకొని వేయించుకున్న కొత్తిమీర తరుగు వేసి కచ్చాపచ్చాగా గ్రైండ్ చేసుకోవాలి.
- ఆ తర్వాత దాన్ని ఒక మిక్సింగ్ బౌల్లోకి తీసుకొని అందులో చల్లారిన చింతపండు మిశ్రమం, మిక్సీ పట్టుకున్న మెంతుల పొడి, కారం వేసుకొని అన్నీ కలిసేలా ఒకసారి బాగా కలుపుకోవాలి.
- అనంతరం చల్లారిన పోపునూ యాడ్ చేసుకొని మరోసారి బాగా మిక్స్ చేసుకోవాలి. ఆపై ఏదైనా గాజు సీసాలో స్టోర్ చేసుకుని సర్వ్ చేసుకుంటే చాలు. అంతే, ఎంతో టేస్టీగా ఉండే "కొత్తిమీర నిల్వ పచ్చడి" రెడీ!
- ఈ పచ్చడి మామూలుగా బయట ఉంచితే కనీసం 2 నెలల వరకు నిల్వ ఉంటుంది! అదే ఫ్రిజ్లో ఉంచితే కనీసం 6 నుంచి 7 నెలల వరకు నిల్వ ఉంటుందట. దీన్ని అన్నం, టిఫెన్స్, చపాతీ ఇలా దేనిలోకి తిన్నా చాలా టేస్టీగా ఉంటుంది.
టేస్టీ "కొత్తిమీర పులావ్" - ఇలా చేసి పెడితే పిల్లల లంచ్బాక్స్లు ఇట్టే ఖాళీ అయిపోతాయ్!
