నోరూరించే స్పైసీ గోంగూర పనీర్ కర్రీ - ఇలా ప్రిపేర్ చేయండి - టేస్ట్ వేరే లెవల్​! - How to Make Gongura Paneer Curry

How to Make Gongura Paneer Curry: ఆకుకూరల్లో గోంగూర చాలా ప్రత్యేకమైనది. ముఖ్యంగా గోంగూర పచ్చడి అంటే ఇష్టపడని తెలుగువారు ఉండరంటే అతిశయోక్తి కాదు. అలాంటి గోంగూరతో పనీర్ కర్రీ చేస్తే సూపర్ టేస్టీగా ఉంటుంది. మరి, తయారీ విధానం ఎలాగో ఇప్పుడు తెలుసుకుందాం.

How to Make Gongura Paneer Curry:గోంగూర పేరు చెబితే చాలు.. చాలా మందికి నోట్లో లాలాజలం ఊరుతుంటుంది. గోంగూరను అనేక రకాల వంటల్లో వాడుతుంటారు. దీంతో పచ్చడి నూరినా.. పప్పులో వేసినా.. సూపర్ టేస్ట్ ఉంటుంది. ఇవే కాకుండా కొంతమంది ఈ గోంగూరను నాన్​వెజ్​తో మిక్స్ చేసి కుక్ చేస్తుంటారు. అయితే.. ఎక్కువగా వెజ్ తినేవారి కోసం గోంగూర పనీర్ చేస్తే అదిరిపోతుంది. మరి ఇంకెందుకు ఆలస్యం టేస్టీ టెస్టీ గోంగూర పనీర్ కర్రీ ఎలా చేయాలో ఇప్పుడు తెలుసుకుందాం.

కావాల్సిన పదార్ధాలు..

• 200 గ్రాముల పనీర్
• లేత గోంగూర పెద్ద కట్ట ఒకటి
• 3 పచ్చిమిరపకాయలు
• అర కప్పు టమాటా పేస్టు
• 1 ఉల్లిపాయ సన్నని తరుగు
• 1 టేబుల్ స్పూన్ అల్లం వెల్లులి పేస్ట్
• 1 టేబుల్ స్పూన్ గరం మసాలా పొడి
• 1 టేబుల్ స్పూన్ ధనియాల పొడి
• 2 టేబుల్ స్పూన్ కారం
• హాఫ్ టేబుల్ స్పూన్ పసుపు
• రుచికి సరిపడా ఉప్పు
• 1 టేబుల్ స్పూన్ వేయించిన జీలకర్ర పొడి
• పావు కప్పు నూనె
• 1 టేబుల్ స్పూన్ ఆవాలు
• 1 టేబుల్ స్పూన్ జీలకర్ర
• 2 ఎండు మిరపకాయలు

తయారీ విధానం..

• ముందుగా స్టౌ ఆన్ చేసుకుని ఓ కడాయిలో నూనె పోసుకోవాలి.
• నూనె వేడయ్యాక అందులో ఆవాలు, జీలకర్ర, ఎండుమిరపకాయలు వేసి వేయించండి.
• ఆ తర్వాత ఓ ఉల్లిపాయ ముక్కలు వేసి ఉల్లిపాయలు బంగారు రంగులోకి వచ్చేలా ఫ్రై చేయండి.
• ఎర్రగా వేగాక అందులో అల్లం వెల్లులి పేస్టు, ధనియాల పొడి, పసుపు , కారం, వేయించిన జీలకర్ర పొడి, గరం మసాలా పొడి, ఉప్పు వేసి ఫ్రై చేయండి.
• ఇప్పుడు గోంగూర ఆకులను వేసి మెత్తగా మగ్గే వరకు మూత పెట్టి మగ్గించుకోవాలి. (పచ్చళ్లకి ముదురు గోంగూర వాడితే మంచిది. కానీ ఈ కూరకి లేత గోంగూర అయితే మెత్తగా గుజ్జుగా ఉడుకుతుంది. )
• అనంతరం టమాటా పేస్ట్ వేసి పచ్చివాసన పోయి, నూనె పైకి తేలేదాకా వేపుకోవాలి. (ఇలా నూనె సెపరేట్ అయ్యే వరకు చేస్తేనే గ్రేవీగా, టేస్టీగా ఉంటుంది)
• ఇప్పుడు సుమారు 200 మిల్లీ లీటర్ల​ నీళ్లు పోసి హై-ఫ్లేమ్​లో మరగనివ్వండి.
• ఆ తర్వాత పచ్చిమిరపకాయలు వేసి కూర దగ్గరపడే దాకా హై ఫ్లేమ్​పైనే ఉడికించుకోవాలి.
• ఇప్పుడు పనీర్ ముక్కలు వేసి బాగా కలిపి.. లో-ఫ్లేమ్​లో సుమారు 5 నిమిషాలు మగ్గించుకోవాలి. (వేడి నీళ్లలో సుమారు 10 నిమిషాలు ఉంచి కూరలో వేస్తే ఫ్లేవర్స్ బాగా పడతాయి)
• తర్వాత నూనె సెపరేట్ అయ్యాక స్టౌ ఆఫ్ చేసుకుంటే గోంగూర పనీర్ కర్రీ రెడీ!