పార్టీ స్పెషల్ : ఫుల్ టేస్టీ వెల్లుల్లి కోడి వేపుడు - తిని తీరాల్సిందే!

- రొటీన్ చికెన్​ ఫ్రైని మించిన రుచి - ఒక్కసారి తిన్నారంటే మళ్లీ కావాలంటారు!

Garlic Chicken Fry Recipe: పార్టీలకు లేదా వీకెండ్స్​ లంచ్​కి చికెన్​తో ఏదైనా టేస్టీ రెసిపీ చేయాలని ఆలోచిస్తున్నారా? అయితే.. ఈ వెల్లులి కోడి వేపుడును ఓ సారి ట్రై చేయండి. టేస్ట్ అద్దిరిపోతుందంటే నమ్మాల్సిందే! ఈ పద్ధతిలో చేస్తే చికెన్ముక్క బయట కరకరలాడుతూనే లోపల మృదువుగా చాలా రుచిగా ఉంటుంది. మరి, ఇంకెందుకు ఆలస్యం? ఇందులోకి కావాల్సిన పదార్థాలు, తయారీ విధానం.. వంటి వివరాలు ఇప్పుడు చూద్దాం.

కావాల్సిన పదార్ధాలు

• 400 గ్రాముల బోన్లెస్ చికెన్
• 8 పచ్చిమిరపకాయలు
• 30 వెల్లుల్లి పాయలు
• 2 రెబ్బల కరివేపాకు
• ఒక ఉల్లిపాయ ముక్కలు (చిన్నది)
• పావు టీ స్పూన్ పసుపు
• ఒక టీ స్పూన్ గరం మసాలా
• ఒక టీ స్పూన్ వేపిన ధనియాల పొడి
• ఒక టీ స్పూన్ వేపిన జీలకర్ర పొడి
• రుచికి సరిపడా ఉప్పు
• 3 - 4 చుక్కల రెడ్ ఫుడ్ కలర్
• అర టేబుల్ స్పూన్ వెనిగర్
• 3 టేబుల్ స్పూన్ల కార్న్ ఫ్లోర్
• ఫ్రైకి సరిపడా నూనె

టాసింగ్ కోసం:

• 2 టేబుల్ స్పూన్ల నూనె
• 3 టేబుల్ స్పూన్ల జీడిపప్పు
• 2 పచ్చిమిరపకాయలు
• ఒక టేబుల్ స్పూన్ వెల్లుల్లి
• 2 రెబ్బల కరివేపాకు
• అర టీ స్పూన్ వెల్లులి పొడి/ చాట్ మసాలా
• తయారీ విధానం..
• ముందుగా చికెన్​ తీసుకుని శుభ్రంగా కడిగాలి. ఆ తర్వాత ఇందులోనే వేయించిన దనియాల, జీలకర్ర, గరం మసాలా పొడి, పసుపు, ఉప్పు, దంచుకున్న వెల్లులి ముద్ద, కాస్త వెనిగర్ వేసి బాగా రుద్ది ముక్కలకి మసాలాలు పట్టించాలి.
• ఆ తర్వాత చికెన్ కలర్​ఫుల్​గా కనిపించేందుకు ఫుడ్ కలర్ వేసుకోవాలి.
• అనంతరం ముక్కలు క్రిస్పీగా అవ్వడానికి కార్న్ ఫ్లోర్ వేసి కలిపి సుమారు గంటపాటు పక్కకుపెట్టుకోవాలి.
• ఇప్పుడు వెల్లులి మసాలా ముద్ద కోసం పచ్చిమిర్చి, వెల్లుల్లి పాయలు, కరివేపాకు, ఉల్లిపాయ ముక్కలు వేసి మెత్తగా దంచుకోవాలి. మిక్సీలో అయితే కాస్త కచ్చాపచ్చాగా రుబ్బుకోవాలి.
• గంట తర్వాత స్టౌ ఆన్ చేసి నూనె పోసి వేడి చేసుకోవాలి.
• ఇప్పుడు మరిగే నూనెలో కొద్దిగా కొద్దిగా చికెన్ ముక్కలను వేసుకుని మీడియం మంట మీద ఎర్రగా వేయించుకోవాలి.
• రంగు మారిన తర్వాత మంటను హై-ఫ్లేమ్​పైకి మార్చి క్రిస్పీగా బంగారు రంగులోకి వచ్చేంతవరకు వేయించుకొని పక్కకు పెట్టుకోవాలి.
• ఇప్పుడు మరో కడాయి తీసుకుని రెండు టేబుల్ స్పూన్ల నూనె పోసి అందులోనే జీడిపప్పు, వెల్లుల్లి తరుగు, పచ్చి మిర్చి, కరివేపాకు వేసి కాసేపు వేయించుకోవాలి.
• జీడి పప్పు రంగు మారిన తర్వాత వేయించుకున్న చికెన్ ముక్కలు, గార్లిక్ పౌడర్ వేసి హై ఫ్లేమ్ మీద టాస్ చేయాలి. (వెల్లులి పొడి లేనివారు చాట్ మసాలాను చల్లుకోవచ్చు.)
• అంతే అద్దిరిపోయే వెల్లుల్లి చికెన్ వేపుడు రెడీ!