"మహారాష్ట్ర స్టైల్​ పచ్చిమిర్చి రోటి పచ్చడి" - ఇలా చేస్తే వేడివేడి అన్నంలోకి అద్దిరిపోతుంది!

-రొటీన్​ పచ్చళ్లకు బదులుగా.. ఈ రోటి పచ్చడి టేస్ట్​ చేయండి! -ఒక్కసారి తిన్నారంటే ఎవరైనా ఫిదా!

How to Make pachimirchi pachadi:కొంతమంది కర్రీల కంటే రోటి పచ్చళ్లను ఎంతో ఇష్టంగా తింటుంటారు. అలాంటి వారికోసం ఒక సూపర్ టేస్టీ పచ్చడి రెసిపీతీసుకొచ్చాం. అదే "మహారాష్ట్ర స్టైల్​ థెచా". మనకు అర్థమయ్యేలా చెప్పాలంటే.. పచ్చిమిర్చి రోటి పచ్చడి. రొటీన్ కూరలు, పచ్చళ్లు తిని తిని బోర్ కొడితే.. ఒక్కసారి ఈ పచ్చిమిర్చి పచ్చడిని ట్రై చేసి చూడండి. వేడివేడి అన్నంలో ఈపచ్చిమిర్చి పచ్చడి టేస్ట్ అద్భుతంగా ఉంటుంది. పైగా ఈ పచ్చడి తాలింపు అవసరం లేకుండా చాలా ఈజీగా రెడీ చేసుకోవచ్చు. మరి, పచ్చిమిర్చి పచ్చడికి కావాల్సిన పదార్థాలేంటి? ఎలా ప్రిపేర్ చేసుకోవాలి? అన్నది ఈ స్టోరీలో చూద్దాం.

థెచా రెసిపీకి కావాల్సిన పదార్థాలు :

• బజ్జీ మిర్చి - 8
• చిన్న మిర్చి- 50 గ్రాములు (మీడియం కారం ఉన్నవి)
• జీలకర్ర - 1 చెంచా
• వెల్లుల్లి రెబ్బలు - 25 (పొట్టు తీసినవి)
• ఉప్పు - రుచికి సరిపడా
• నూనె
• పల్లీలు-పావుకప్పు
• కొత్తిమీర తరుగు-కొద్దిగా

తయారీ విధానం :

• ఇందుకోసం ముందుగా బజ్జీ మిర్చిని తొడిమలు తీసి శుభ్రంగా కడగాలి. ఆపై ఒక అంగుళం పరిమాణంలో చిన్న చిన్న ముక్కలుగా కట్ చేసుకొని పక్కన పెట్టుకోవాలి.
• అలాగే చిన్న మిర్చిల తొడిమలు తీసి శుభ్రంగా కడగాలి. వీటిని కూడా రెండు ముక్కలుగా కట్​ చేసుకోండి.
• ఇప్పుడు స్టౌపై ఇనుప పెనం పెట్టండి. ఇందులో బజ్జీ మిర్చి, చిన్నమిర్చి ముక్కలు వేసి సన్నని సెగ మీద వేపండి.
• మిర్చిలపై నల్లటి మచ్చలు వచ్చేవరకు వేపుకోండి.
• ఇలా మిర్చిలు రంగు మారాక.. ఇందులో కొద్దిగా నూనె వేసి ఫ్రై చేయండి.
• అనంతరం జీలకర్ర, వెల్లుల్లి రెబ్బలు, పల్లీలు వేసి వేపండి. స్టౌ లో ఫ్లేమ్​లో అడ్జస్ట్​ చేసి దోరగా వేపుకోండి.
• పల్లీలు దోరగా వేగాక రుచికి సరిపడా ఉప్పు వేసి మిక్స్​ చేయండి.
• ఆపై కొత్తిమీర తరుగు చల్లి కలిపి స్టౌ ఆఫ్​ చేయండి.
• ఇప్పుడు రోటిలోకి మిశ్రమాన్ని పూర్తిగా తీసుకుని కచ్చాపచ్చాగా రుబ్బుకోండి. రుబ్బుకున్న పచ్చడిని ఒక గిన్నెలోకి తీసుకోండి.
• రుబ్బుకునేటప్పుడు నీళ్లు పోయకూడదు. మీరు మిక్సీ జార్లో గ్రైండ్​ చేసుకుంటే కాస్త బరకగా గ్రైండ్​ చేసుకోండి.
• అంతే ఇలా సింపుల్​గా చేసుకుంటే ఎంతో రుచికరమైన మహారాష్ట్ర స్టైల్​ పచ్చిమిర్చి పచ్చడి తయారైపోతుంది.
• నచ్చితే ఈ విధంగా పచ్చడి ఓ సారి ట్రై చేయండి.