How to Make Egg Samosa :చాలా మందికి సాయంత్రం పూట సమోసా, పకోడి వంటి స్నాక్స్ తినాలనిపిస్తుంటుంది. ఇలా ఏదైనా స్నాక్ తిన్న తర్వాత వేడివేడి టీ/ కాఫీ తాగితే.. ఆ ఫీల్ వేరేలా ఉంటుంది. అయితే, మీరు ఇప్పటి వరకు ఆనియన్ సమోసా, ఆలూ సమోసా టేస్ట్ చేసి ఉంటారు. అయితే ఎప్పుడూ అవే తింటే బోర్ కొడుతుంది. అలాంటప్పుడు ఓసారి ఎగ్ సమోసా ట్రై చేయండి. చాలా క్రిస్పీగా ఎంతో రుచికరంగా ఉంటాయి. వీటిని కేవలం నిమిషాల్లోనే ఇంట్లోనే తయారు చేసుకోవచ్చు. మరి ఇక ఆలస్యం చేయకుండా.. ఎగ్ సమోసా ఎలా చేయాలో ఈ స్టోరీలో చూద్దాం.
కావాల్సిన పదార్థాలు..
- మైదా పిండి- కప్పు
- ఉప్పు-రుచికి సరిపడా
- నూనె కొద్దిగా
సమోసా స్టఫింగ్ కోసం..
- ఉడికించిన గుడ్లు-5
- ఉల్లిపాయ ముక్కలు-కప్పు
- జీలకర్ర- అరటీస్పూన్
- పచ్చిమిర్చి-2
- అల్లం వెల్లుల్లి పేస్ట్-టీస్పూన్
- చిల్లీ ఫ్లేక్స్-టీస్పూన్
- కొద్దిగా కారం
- ఉప్పు కొద్దిగా
- పసుపు-చిటికెడు
- వేయించిన జీలకర్ర పొడి - అరటీస్పూన్
- గరం మసాలా- అరటీస్పూన్
- చాట్ మసాలా - అరటీస్పూన్
- కొత్తిమీర తురుము-పావు కప్పు
- కొద్దిగా మైదా పిండి
- వేయించడానికి సరిపడా నూనె
తయారీ విధానం..
- ముందుగా ఒక మిక్సింగ్ బౌల్లో మైదా పిండి తీసుకోండి. ఇందులో ఉప్పు, రెండు టేబుల్స్పూన్ల ఆయిల్ వేయండి. పిండిని బాగా మిక్స్ చేయండి. తర్వాత కొద్దికొద్దిగా వాటర్ వేసుకుంటూ పిండిని సాఫ్ట్గా కలుపుకోండి.
- తర్వాత మరో టీస్పూన్ ఆయిల్ వేసి పిండిని కలిపి మూత పెట్టండి.
- ఇప్పుడు ఉడికించిన గుడ్లను మధ్యలోకి కట్ చేసుకోండి.
- తర్వాత ఎగ్ స్టఫింగ్ తయారీ కోసం.. స్టౌపై పాన్ పెట్టండి. ఇందులో కొద్దిగా ఆయిల్ వేయండి. నూనె వేడయ్యాక కొద్దిగా ఉప్పు, కారం, పసుపు, గరం మసాలా వేసి కలపండి.
- మంటని మీడియం ఫ్లేమ్లో ఉంచి ఎగ్స్ వేసి రెండు నిమిషాలు ఫ్రై చేయండి. ఎగ్స్ని బోర్లించి మరో రెండు నిమిషాలు ఫ్రై చేయండి. తర్వాత వీటిని ఒక ప్లేట్లోకి తీసుకోండి.
- ఎగ్స్ చల్లారిన తర్వాత చిన్న ముక్కలుగా కట్ చేయాలి.
- ఇప్పుడు ఇదే ఆయిల్లో ఉల్లిపాయ ముక్కలు, జీలకర్ర వేసి ఫ్రై చేయండి.
- ఉల్లిపాయలు రెండు నిమిషాలు మగ్గిన తర్వాత అల్లం వెల్లుల్లి పేస్ట్, పచ్చిమిర్చి ముక్కలు వేసి కలపాలి. ఇప్పుడు స్టౌ ఆఫ్ చేయాలి.
- తర్వాత కట్ చేసిన గుడ్ల మిశ్రమం, చిల్లీ ఫ్లేక్స్, వేయించిన జీలకర్ర పొడి, గరం మసాలా, చాట్ మసాలా, కొద్దిగా ఉప్పు, కొత్తిమీర తురుము ఇందులో వేసి బాగా కలపండి. ఎగ్ సమోసా కోసం స్టఫింగ్ రెడీ అయిపోయింది.
- ఇప్పుడు సమోసా షీట్స్ చేయడం కోసం.. ముందుగా కలుపుకున్న మైదా పిండిని మరోసారి రెండు నిమిషాలు ప్రెస్ చేస్తూ కలుపుకోవాలి. ఇప్పుడు పిండిని నిమ్మకాయ సైజ్లో ఉండలుగా చేసుకోవాలి.
- తర్వాత పిండి ముద్దని మైదా పిండిలో.. ముంచి చపాతీ పీటపై వేసుకోవాలి. పైన పొడి పిండి చల్లుతూ చపాతీ కర్రతో వీలైనంత పల్చగా రోల్ చేసుకోవాలి. ఇలా పిండితో అన్ని షీట్స్ చేసుకోవాలి.
- తర్వాత స్టౌపై చపాతీ పెనం పెట్టండి. పెనంపై కొద్దిగా ఆయిల్ వేసి.. రెండు వైపులా మైదా పిండి షీట్స్ని ఒక నిమిషం పాటు కాల్చుకోండి. ఈ విధంగా మిగతా చపాతీ షీట్స్ కాల్చుకోవాలి.
- పెనం మీద కాల్చుకున్న రోటీని చపాతీలను మూడు ఇంచుల వెడల్పు, తొమ్మిది ఇంచుల పొడవు వచ్చే విధంగా స్కేల్ సహాయంతో కట్ చేసుకోవాలి.
- ఇప్పుడు సమోసా షీట్స్ సీల్ చేయడం కోసం.. ఒక చిన్న గిన్నెలో కొద్దిగా మైదా తీసుకొని కొన్ని వాటర్ యాడ్ చేసుకొని చిక్కని పేస్ట్ ప్రిపేర్ చేసుకోవాలి.
- తర్వాత ఒక సమోసా షీట్ను చేతిలోకి తీసుకొని సరిగ్గా ట్రై యాంగిల్ వచ్చేలా మలుచుకోవాలి. తర్వాత మళ్లీ ఇంకో మడత పెట్టుకోండి. ఇప్పుడు కోన్ మాదిరిగా తయారవుతుంది.
- అప్పుడు అందులో ముందుగా ప్రిపేర్ చేసుకున్న ఎగ్ మిశ్రమాన్ని కొద్దిగా ఉంచి అన్ని చివరలకు మైదా పేస్ట్ అప్లై చేసి క్లోజ్ చేసుకోవాలి.
- ఇలా మొత్తం షీట్స్ అయిపోయేంత వరకు సమోసాలు ప్రిపేర్ చేసుకుని ఒక ప్లేట్లో ఉంచుకోవాలి. ఇలా షీట్స్ ఇంట్లో ప్రిపేర్ చేసుకోవడం కష్టమనుకుంటే మార్కెట్లో ఇవి లభిస్తాయి.
- తర్వాత స్టౌపై కడాయి పెట్టి వేయించడానికి సరిపడా నూనె పోసుకోవాలి. నూనె వేడయ్యాక మంటను మీడియం ఫ్లేమ్లో ఉంచిసమోసాలుగోల్డెన్ బ్రౌన్ కలర్ వచ్చేంత వరకు వేయించుకోవాలి.
- ఆపై వాటిని ప్లేట్లోకి తీసుకుంటే సరిపోతుంది. అంతే.. క్రంచీగా, ఎంతో క్రిస్పీగా నోరూరించే "ఎగ్ సమోసాలు" మీ ముందు ఉంటాయి!
ఇవి కూడా చదవండి :
నోరూరించే క్రిస్పీ "ఆనియన్ సమోసా" - నిమిషాల్లో ప్రిపేర్ చేసుకోండి! - టేస్ట్ మాత్రం వేరే లెవల్!
సాయంత్రం వేళ - క్రిస్పీ క్రిస్పీ 'కార్న్ సమోసా' - ఇంట్లోనే నిమిషాల్లో ప్రిపేర్ చేసుకోండి!
