ఘుమఘుమలాడే "వెల్లుల్లి తాలింపు అన్నం" - చలికాలం ఇలా చేసుకొని వేడివేడిగా తింటే అద్భుతమే!

ఎప్పుడూ తాలింపు అన్నం రొటీన్ - సరికొత్త రుచిలో ఈ రైస్ రెసిపీని ట్రై చేయండి!

Vellulli Thalimpu Annam Recipe : ప్రతి ఇంట్లోనూ రాత్రివేళ అన్నం మిగిలిపోవడం జరుగుతుంది. ఇదే అన్నం పొద్దున తినమంటే ఇంట్లో వాళ్లందరూ ముఖం చిట్లిస్తారు. అందులోనూ చలికాలమైతే అప్పుడే వండిన అన్నంకాస్త చల్లగా అయితేనే తినబుద్ధికాదు. అలాంటి టైమ్​లో సింపుల్​గా ఇలా "వెల్లుల్లి తాలింపు అన్నం" ప్రిపేర్ చేసుకోండి. టేస్ట్ అద్దిరిపోతుంది. పిల్లలే కాదు ఇంటిల్లిపాదీ ఈ రైస్​ని ఎంతో ఇష్టంగా తింటారు. పైగా దీన్ని ప్రిపేర్ చేయడానికి ఎక్కువ పదార్థాలూ ఏమీ అవసరం లేదు. అంతేకాదు, చలికాలం ఈ రైస్ ఆరోగ్యానికీ ఎంతో మేలు చేస్తుంది. మరి, ఈ సూపర్ టేస్టీ అండ్ హెల్దీ రైస్ రెసిపీకి కావాల్సిన పదార్థాలేంటి? ఎలా ప్రిపేర్ చేసుకోవాలో ఇప్పుడు చూద్దాం.

కావాల్సిన పదార్థాలు :

• వెల్లుల్లి రెబ్బలు - గుప్పెడు
• అన్నం - 2 పెద్ద కప్పులు
• పచ్చిమిర్చి - 5 నుంచి 6
• కారం - తగినంత
• శనగపప్పు - 2 టేబుల్​స్పూన్లు
• నెయ్యి - సరిపడా
• పసుపు - చిటికెడు
• మినప్పప్పు - 2 టేబుల్​స్పూన్లు
• జీలకర్ర - 1 టీస్పూన్
• కరివేపాకు - కొద్దిగా
• ఉల్లిపాయ - 1(పెద్ద సైజ్​ది)
• ఉప్పు - రుచికి సరిపడా

తయారీ విధానం :

• ఇందుకోసం ముందుగా వెల్లుల్లిరెబ్బలను పొట్టు తీసి పక్కన పెట్టుకోవాలి. అలాగే పచ్చిమిర్చిని చీలికలుగా, ఉల్లిపాయను కాస్త పెద్ద సైజ్ ముక్కలుగా తరుక్కొని రెడీగా ఉంచుకోవాలి.
• ఆ తర్వాత మిక్సీ జార్ తీసుకొని అందులో పొట్టు తీసిన వెల్లుల్లి రెబ్బలు, కారం, ఉప్పు వేసుకొని మెత్తని పేస్ట్​లా కాకుండా జస్ట్ ఒక పల్స్ ఇచ్చి కచ్చాపచ్చాగా గ్రైండ్ చేసుకోవాలి. ఆపై దాన్ని ఒక ప్లేట్​లోకి తీసుకొని పక్కనుంచాలి.
• ఇప్పుడు స్టౌపై కడాయి పెట్టుకొని మీరు తీసుకునే అన్నానికి సరిపడా నెయ్యి వేసుకోవాలి. అది వేడెక్కాక జీలకర్ర, శనగపప్పు, మినప్పప్పు వేసుకొని కాసేపు వేయించుకోవాలి.
• అవి వేగాక తరిగి పెట్టుకున్న ఉల్లిపాయముక్కలు, పచ్చిమిర్చి చీలికలు, కరివేపాకు వేసుకొని చక్కగా ఫ్రై చేసుకోవాలి. ఆపై పసుపు వేసి కలిపి మరికాసేపు వేగనివ్వాలి.
• ఆ తర్వాత అందులో కచ్చాపచ్చాగా గ్రైండ్ చేసుకొని పక్కన పెట్టుకున్న వెల్లుల్లి కారాన్ని వేసుకొని పచ్చివాసన పోయి మంచిగా వేగే వరకు ఫ్రై చేసుకోవాలి.
• ఆ మిశ్రమం చక్కగా వేగిందనుకున్నాక ముందుగా ఉడికించి చల్లార్చుకున్న అన్నం లేదా మిగిలిపోయిన అన్నాన్ని వేసుకొని మొత్తం కలిసేలా ఒకసారి బాగా కలుపుకోవాలి.
• ఆపై మీడియం ఫ్లేమ్ మీద అన్నం బాగా వేడయ్యేంత వరకు మధ్యమధ్యలో కలుపుతూ కాసేపు కుక్ చేసుకొని దింపేసుకుంటే చాలు. అంతే, ఎంతో రుచికరంగా ఉండే ఘుమఘుమలాడే "వెల్లుల్లి తాలింపు అన్నం" రెడీ!
• ఆ తర్వాత దీన్ని ప్లేట్​లోకి తీసుకొని కాస్త నిమ్మరసం పిండి​ చలికాలం వేడివేడిగా తింటుంటే ఉంటుంది నా సామిరంగా ఆ టేస్ట్ వేరే లెవల్ అంతే!