చుక్క నూనె లేకుండానే "వెజిటబుల్​ పులావ్​" - టేస్ట్​ అదుర్స్​ - బరువు తగ్గాలనుకునేవారికి సూపర్​ ఆప్షన్​!

-నూనె అవసరం లేకుండానే రుచికరమైన పులావ్​ - బరువు తగ్గాలని ప్రయత్నించే వారికి బెస్ట్​ ఆప్షన్​!

How to Make Vegetable Pulao Without Oil: పులావ్​ చాలా మందికి ఫేవరెట్​ డిష్​. ఖాళీ సమయం దొరికినప్పుడు, ఇంటికి అతిథులు వచ్చినప్పుడు ఎక్కువ మంది ఈ వంటకాన్ని ప్రిపేర్​ చేస్తుంటారు. అయితే బరువు తగ్గాలనుకునేవారు, డైట్​లో ఉన్న వారు ఈ రెసిపీ తినడానికి ఇష్టపడరు. కారణం, ఇందులో ఆయిల్​ ఎక్కువ ఉండటమే. అయితే అలాంటి వారు నూనె లేకుండా చేసిన పులావ్​ను హ్యాపీగా తిని ఎంజాయ్​ చేయవచ్చు. నూనె లేకుండా పులావ్​ ఎలా అనుకుంటున్నారా? అయితే ఈ స్టోరీపై ఓ లుక్కేయండి. చుక్క నూనె లేకుండా ఎంతో ఈజీగా, మరెంతో రుచికరంగా వెజిటబుల్​ పులావ్​ చేసుకోవచ్చు. మరి, ఇక లేట్​ చేయకుండా ఆయిల్​ ఫ్రీ పులావ్​కు కావాల్సిన పదార్థాలు, తయారీ విధానంపై ఓ లుక్కేయండి.

కావాల్సిన పదార్థాలు:

• బాస్మతి బియ్యం – 2 కప్పులు
• లవంగాలు – మూడు
• బిర్యానీ ఆకులు – రెండు
• దాల్చిన చెక్క – చిన్న ముక్క
• యాలకులు – నాలుగు
• జాజికాయ – చిన్న ముక్క
• ఉల్లిపాయ ముక్కలు - అర కప్పు
• పచ్చిమిర్చి -3
• పాల మీగడ - 3 టేబుల్​ స్పూన్లు
• అల్లం వెల్లుల్లి పేస్ట్​ - 1 టేబుల్​ స్పూన్​
• క్యారెట్​ ముక్కలు - పావు కప్పు
• బీన్స్ ముక్కలు – పావు కప్పు
• బంగాళదుంప ముక్కలు - పావు కప్పు
• టమాట ముక్కలు - పావు కప్పు
• ఉప్పు – రుచికి సరిపడా
• కొత్తిమీర తరుగు – కొద్దిగా
• పుదీనా తరుగు - కొద్దిగా
• జీడిపప్పులు – 10
• కొబ్బరిపాలు - 4 కప్పులు

తయారీ విధానం:

• వెజిటబుల్ పులావ్ కోసం బాస్మతి బియ్యాన్ని ఓ గిన్నెలోకి తీసుకుని శుభ్రంగా కడిగి నీళ్లు పోసి అరగంట నానబెట్టాలి.
• స్టవ్​ ఆన్​ చేసి ప్రెషర్ కుక్కర్‌ పెట్టి లవంగాలు, జాజికాయ ముక్క, యాలకులు, దాల్చిన చెక్క, బిర్యానీ ఆకులు వేసి ఫ్రై చేసుకోవాలి.
• ఆ తర్వాత సన్నగా కట్​ చేసిన ఉల్లిపాయ, పచ్చిమిర్చి ముక్కలు వేసి ఓ నిమిషం పాటు మగ్గించుకోవాలి.
• ఆ తర్వాత పాల మీగడ వేసి ఫ్రై చేసుకోవాలి. అనంతరం అల్లం వెల్లుల్లి పేస్ట్​ వేసి పచ్చివాసన పోయేవరకు మగ్గించుకోవాలి.
• ఉల్లిపాయలు మగ్గిన తర్వాత సన్నగా కట్​ చేసుకున్న క్యారెట్​, బీన్స్​, బంగాళదుంప, టమాట ముక్కలు వేసి ఓ సారి కలపాలి.
• ఆ తర్వాత రుచికి సరిపడా ఉప్పు, జీడిపప్పులు, సన్నగా తరిగిన కొత్తిమీర, పుదీనా తరుగు వేసి కలిపి మూత పెట్టి లో ఫ్లేమ్​లో 5 నిమిషాలు మగ్గించుకోవాలి.
• ఆ తర్వాత బియ్యం తీసుకున్న కప్పుతో నాలుగు కప్పుల కొబ్బరిపాలు పోసి కలిపి మీడియం ఫ్లేమ్​లో మరిగించుకోవాలి.
• పాలు మరుగుతున్నప్పుడు నానబెట్టిన బాస్మతీ బియ్యం వేసి కలిపి ఉప్పు సరిపోయిందో లేదో చెక్​ చేసుకోవాలి.
• ఆ తర్వాత కుక్కర్​ మూత పెట్టి మీడియం ఫ్లేమ్​లో మూడు విజిల్స్​ వచ్చే వరకు ఉడికించుకుని స్టవ్​ ఆఫ్​ చేయాలి.
• ఆవిరి పోయిన తర్వాత మూత తీసి కలిపి సర్వ్​ చేసుకుంటే ఎంతో టేస్టీగా ఉండే ఆయిల్​ లెస్​ వెజిటేబుల్​ పులావ్​ రెడీ. దీన్ని ఆలూ కుర్మాతో కలిపి తీసుకుంటే అద్దిరిపోతుంది. నచ్చితే మీరూ ఓ సారి ట్రై చేయండి.