పాక్​లో 21మంది ఉగ్రవాదులు హతం- నలుగురు అధికారులు, ఇద్దరు పౌరులు మృతి

Pakistan Terrorists Killed Today : బలూచిస్థాన్​లో 21మంది ఉగ్రవాదులను మట్టుబెట్టాయి పాకిస్థాన్​ భద్రతా బలగాలు. ఈ దాడుల్లో నలుగురు భద్రతా అధికారులు సహా ఇద్దరు పౌరులు మరణించినట్లు ఆర్మీ వర్గాలు తెలిపాయి.

Pakistan Terrorists Killed Today : పాకిస్థాన్​ బలూచిస్థాన్​లో 21మంది ఉగ్రవాదులు హతమయ్యారు. నిషేధిత వేర్పాటువాద సంస్థకు చెందిన ఉగ్రవాదులు దాడులు చేసిన నేపథ్యంలో పాక్ బలగాలు ప్రతిదాడుల చేశాయి. ఈ కాల్పుల్లో సుమారు 21మంది ఉగ్రవాదులు మరణించినట్లు పాక్ ఆర్మీ అధికారులు తెలిపారు. ఈ దాడుల్లో నలుగురు భద్రతా అధికారులు సహా ఇద్దరు పౌరులు మరణించినట్లు వెల్లడించారు. మృతుల సంఖ్య అధికంగానే ఉన్నా, ఉన్నతాధికారులు ధ్రువీకరించలేదని ఆయన తెలిపారు. ఉగ్రవాదుల ఏరివేతకు చేపట్టిన ఆపరేషన్​ చివరిదశకు చేరుకుందని ఉన్నతాధికారి తెలిపారు. ఉగ్రవాదులు పర్వతాల్లోని చీకటి ప్రాంతాల్లో నక్కినట్లు వివరించారు.

బలూచిస్థాన్​లోని మాచ్​, కొల్పూర్​ ప్రాంతాల్లో సోమవారం రాత్రి ఉగ్రవాదులు దాడులకు తెగబడ్డారు. ఈ క్రమంలోనే ఆపరేషన్​ చేపట్టిన భద్రతా బలగాలు 21 మందిని మట్టుబెట్టాయి. అయితే, మిలిటరీ అధికార మీడియా విభాగం మాత్రం మృతుల సంఖ్యను 12గా ప్రకటించింది. "సూసైడ్​ బాంబర్లు సహా పలువురు ఉగ్రవాదులు మాచ్​, కొల్పూర్​లో దాడులు చేశారు. వీరంతా మాచ్ సెంట్రల్​​ జైలును లక్ష్యంగా పెట్టుకున్నారు. ఈ జైలులో చాలా మంది నిషేధిత ఉగ్ర సంస్థలో ఉన్న వ్యక్తులు, మరణశిక్ష పడిన వారు ఉన్నారు. ప్రస్తుతం ఇందులో సుమారు 800మంది శిక్ష అనుభవిస్తున్నారు." అని ఓ అధికారి తెలిపారు.

సైనికుల లక్ష్యంగా దాడి-23మంది మృతి
Pakistan Terror Attack Today :అంతకుముందు గతేడాది డిసెంబర్​లో ఉగ్రవాదులు ఆత్మాహుతి దాడికి పాల్పడ్డ ఘటనలో 23 మంది సైనికులు మరణించారు. అనేక మంది తీవ్రంగా గాయపడ్డారు. పాకిస్థాన్‌ తాలిబన్‌ సంస్థకు అనుబంధంగా పనిచేస్తున్న 'తెహ్రీక్‌- ఎ- జిహాద్‌- పాకిస్థాన్‌' అనే ఉగ్రవాద సంస్థ దాడికి బాధ్యత వహిస్తూ ప్రకటన చేసింది. పాకిస్థాన్‌- అఫ్గానిస్థాన్‌ సరిహద్దులోని ఖైబర్‌ పఖ్తుంక్వా ప్రావిన్స్‌లో ఈ ఘటన జరిగింది. డేరా ఇస్మాయిల్ ఖాన్‌ జిల్లాలోని దారాబన్ పోలీస్ స్టేషన్ ఆవరణలో ఉన్న సైనిక స్థావరంపై ఉగ్రవాదులు ఆత్మాహుతి దాడి చేశారు. పేలుడు పదార్థాలు నింపిన ట్రక్కును ఆరుగురు ఉగ్రవాదులు సైనిక స్థావరంలోని భవనాన్ని ఢీకొట్టారు. ఈ ఘటనలో 23 మంది సైనికులు చనిపోయారని ఆర్మీ ప్రకటించింది.