కొబ్బరినీళ్లు ఏ టైమ్​లో తాగాలో తెలుసా?

Coconut Water Health Benefits : ఆరోగ్యానికి కొబ్బరి నీళ్లు ఎంతో మేలు చేస్తాయనే విషయం అందరికీ తెలిసిందే. ముఖ్యంగా ఎండాకాలం వచ్చిందంటే.. ఇది ఎక్కువ మందికి ఫేవరేట్ డ్రింక్. అయితే కొబ్బరి నీళ్లు తాగడానికి కూడా ఒక సమయం ఉందని మీకు తెలుసా? ఆ వివరాలు ఇప్పుడు చూద్దాం.

Better Time To Drink Coconut Water :మనకు ఏమాత్రం నీరసంగా అనిపించినా, అనారోగ్యంగా ఉన్నా, వేడి చేసినట్లుగా అనిపించినా వెంటనే కొబ్బరి నీళ్లు గుర్తొస్తాయి. ఇవి ఆరోగ్యానికి ఎంతో మేలు చేస్తాయి. ఎలాంటి రసాయనాలూ లేకుండా సహజంగా లభించే కోకోనట్​ వాటర్​లో.. బోలెడు పోషకాలు ఉంటాయి. అయితే.. కొబ్బరి నీళ్లు(Coconut Water) ఎప్పుడు బడితే అప్పుడు కాకుండా.. ఒక నిర్దిష్ట సమయంలో తాగితే ఆరోగ్యానికి మంచిది అంటున్నారు నిపుణులు. మరి, ఆ వివరాలేంటో ఈ స్టోరీలో తెలుసుకుందాం..

కొబ్బరి నీళ్లు తాగడానికి మంచి సమయం ఎప్పుడంటే..?

మనమందరం ఎక్కువగా పగటిపూట హైడ్రేటింగ్ పానీయాలను ఇష్టపడతాం. అవి మన దాహాన్ని తీర్చడమే కాకుండా శరీరానికి కావలసిన శక్తినీ అందిస్తాయి. అయితే.. కొబ్బరి నీళ్ల విషయానికి వస్తే.. ఉదయాన్నే తాగడం మంచిదని ఆరోగ్య నిపుణులు సూచిస్తున్నారు. అది కూడా మితంగా తీసుకోవాలంటున్నారు. ఇక, రాత్రివేళ వీటిని తీసుకోకపోతేనే మంచిదని అంటున్నారు. ఉదయం నుంచి మధ్యాహ్నం వేళలోపు తీసుకుంటే మంచిదని సూచిస్తున్నారు.

కొబ్బరి నీళ్లలో చక్కెర శాతం తక్కువగానే ఉంటుంది. కాబట్టి మధుమేహం ఉన్నవారు కూడా ఈ నీళ్లను తాగొచ్చని నిపుణులు సూచిస్తున్నారు. కోకోనట్ వాటర్ రోగనిరోధక శక్తిని పెంచడమే కాదు, శరీర జీవక్రియలకు అవసరమైన ఉత్తేజాన్ని అందిస్తుంది. "ది జర్నల్ ఆఫ్ ఫార్మసీ అండ్ బయోకెమికల్ సైన్సెస్​"లో ప్రచురించిన ఒక అధ్యయనం ప్రకారం.. కొబ్బరి నీళ్లు తాగడం వల్ల డయాబెటిస్ ఉన్నవారిలో రక్తంలో చక్కెర స్థాయిలు మెరుగుపడతాయని కనుగొన్నారు. "ది జర్నల్ ఆఫ్ న్యూట్రిషన్​"లో ప్రచురించిన ఒక అధ్యయనంలో కొబ్బరి నీళ్లు తాగడం వల్ల రక్తపోటు తగ్గుతుందని తేలింది.

వెయిట్ లాస్​కు సూపర్ మెడిసిన్ : కోకోనట్​ వాటర్​లో కేలరీలు తక్కువగా ఉంటాయి. ఒక కప్పు నీళ్లలో 45 కేలరీలు మాత్రమే ఉంటాయి. కాబట్టి వెయిట్ లాస్ అవ్వాలని అనుకునే వారికి, బరువుని అదుపులో ఉంచుకోవాలనునే వారికి ఇదొక మంచి పానియమని నిపుణులు సూచిస్తున్నారు. సోడా లేదా షుగర్ డ్రింక్స్ తీసుకోవడానికి బదులుగా కోకోనట్ వాటర్ తీసుకోవడం మంచిదని చెబుతున్నారు. అలాగే ఈ వాటర్ ఒక అద్భుతమైన సహజ ఎలక్ట్రోలైట్ మూలం. వ్యాయామం తర్వాత రీహైడ్రేషన్ కోసం ఇది మంచి ఎంపిక అని ఆరోగ్య నిపుణులు అంటున్నారు.

ఎవరు తీసుకోకూడదంటే? అందరూ కొబ్బరి నీళ్లు తాగొచ్చా? అంటే లేదని అంటున్నారు ఆరోగ్యం నిపుణులు. ముఖ్యంగా కొంతమంది వ్యక్తులకు ఈ వాటర్ మంచిది కాదంటున్నారు. రక్తంలో పొటాషియం ఎక్కువగా ఉన్నవారు, కిడ్నీ సంబంధ వ్యాధులతో బాధపడే వారు, గుండె స్పందన సమస్యలు ఎదుర్కొంటున్న వారు కొబ్బరి నీరు తాగకపోవడమే బెటర్ అంటున్నారు ఆరోగ్య నిపుణులు. కొబ్బరి నీరు ఆరోగ్యకరమైన ఎంపికే. అయితే, అందరూ కచ్చితంగా గుర్తుంచుకోవాల్సిన విషయం ఏంటంటే.. కొబ్బరి నీరులో సహజంగా చక్కెర ఉంటుంది. కనుక మితంగా తీసుకోవడం మంచిదని ఆరోగ్య నిపుణులు చెబుతున్నారు.