దంతాల ఆరోగ్యం కోసం - పళ్లు ఎంతసేపు తోముకోవాలి? బ్రష్​ను ఎన్ని రోజులకు మార్చాలి? - Tooth brushing Mistakes

Tooth Brushing Mistakes: దంతాలు ఆరోగ్యంగా ఉంటేనే మనం ఆరోగ్యంగా ఉంటామని వైద్యులు అనేకసార్లు చెబుతుంటారు. కానీ.. చాలా మంది దంతాలను శుభ్రం చేసే విషయంలో నిర్లక్ష్యంగా వ్యవహరిస్తారు. దీని వల్ల చాలా రకాల అనారోగ్య సమస్యలు వచ్చే ప్రమాదముందని నిపుణులు చెబుతున్నారు. అందుకే.. బ్రష్‌ చేసేటప్పుడు ఈ తప్పులు చేయొద్దంటున్నారు. అవేంటో ఇప్పుడు తెలుసుకుందాం..

Tips to Take Care of Teeth: మనకు ఎక్కువ ఇన్​ఫెక్షన్లు నోటి ద్వారానే వ్యాపిస్తుంటాయి. అందువల్ల నోటిని ఎప్పటికప్పుడు శుభ్రపరచుకోవడం చాలా కీలకం. అయితే, చాలా మంది బ్రష్ చేసే సమయంలో కొన్ని తప్పులు చేస్తుంటారు. వాటి వల్ల దంతాలు, చిగుళ్లపై ప్రభావం పడి రక్తస్రావం అవుతుంది. అంతేకాదు నీట్​గా బ్రష్ చేయకపోవడం వల్ల పంటినొప్పితో పాటు ఇతర సమస్యలు తలెత్తుతాయి. ఈ క్రమంలోనే బ్రష్(National Institute of Health రిపోర్ట్​)​ ఎలా చేసుకోవాలి? ఎలాంటి బ్రష్ ఉపయోగించాలి? బ్రష్​ను ఎన్నిరోజులకు మార్చాలి? లాంటి ప్రశ్నలకు ప్రముఖ దంతవైద్యుడు డాక్టర్​ వికాస్ గౌడ్​ సమాధానం ఇస్తున్నారు. ఆ వివరాలు ఇప్పుడు చూద్దాం..

టూత్ బ్రష్​ను ఎక్కువ రోజులు వినియోగించకూడదని డాక్టర్​ వికాస్​ గౌడ్​ చెబుతున్నారు. సాధారణంగా 3 నెలలకు ఒకసారి బ్రష్​ను తప్పనిసరిగా మార్చాలని వివరిస్తున్నారు. ముఖ్యంగా అనారోగ్యానికి గురైనప్పుడు బ్రష్​ను మార్చడం మంచిదని సూచిస్తున్నారు. ఎక్కువ కాలం టూత్ బ్రష్ వాడడం వల్ల బ్రష్ మీద బ్యాక్టీరియా పేరుకుపోయి ఇన్ఫెక్షన్స్​ వచ్చే ప్రమాదం పెరుగుతుందని తెలుపుతున్నారు. అలాగే, రోజుకు 2 సార్లు(ఉదయం, రాత్రి) బ్రష్ చేసుకోవాలని సూచిస్తున్నారు. చాలా సేపు బ్రష్​ చేయకుండా.. కేవలం 2 నుంచి 4 నిమిషాల పాటు మంచి టూత్ పేస్ట్‌తో బ్రష్ చేయడం మంచిదని వివరించారు.

చాలా మంది ఎక్కువ సేపు.. గట్టిగా తోమితే.. పళ్లు శుభ్రంగా ఉంటాయని నమ్ముతారు. కానీ ఇలా చేయడం వల్ల నష్టమే ఎక్కువ. చాలా ఎక్కువ సేపు బ్రష్ చేయడం వల్ల పంటిపైన ఉన్న ఎనామిల్​ అరిగిపోయే అవకాశం ఉంటుంది. అలాగే సరైన బ్రషింగ్​ పద్ధతులను పాటించాలి. కొందరు కేవలం పక్కలను మాత్రమే బ్రష్ చేస్తారు. ఇలా చేయడం వల్ల చిగుళ్లు అరిగిపోతాయి. బ్రష్ చేసేటప్పుడు పై నుంచి కిందకు.. కింద నుంచి పైకి ఇలా గుండ్రంగా క్లీన్ చేయాలి. అనేక మంది పళ్ల ముందు వైపు మాత్రమే బ్రష్ చేస్తారు. లోపలివైపు చేయకపోవడం వల్ల పంటిపై గార పడుతుంది. పళ్లతో పాటు నాలుకను శుభ్రం చేసుకోవడం కూడా ముఖ్యమే. దుర్వాసన రాకుండా ఉండాలంటే టంగ్​ క్లీనర్​, బ్రష్​తో తప్పనిసరిగా శుభ్రం చేసుకోవాలి. బొగ్గు పొడి, మంజన్​ లాంటివి వాడం వల్ల పంటిపైన ఉన్న ఎనామిల్​ అరిగిపోయే ప్రమాదం ఉంటుంది. అందుకే ఇలాంటి వాటికి దూరంగా ఉండాలి."

--వికాస్ గౌడ్​, డెంటిస్ట్​

భోజనం చేసిన తర్వాత పళ్ల సందులో ఇరుక్కుపోయిన ఆహారం పోయేలా క్లీన్​ చేసుకోవాలని వైద్యులు చెబుతున్నారు. ఎగుడుదిగుడు పళ్లు ఉన్నవారు.. కొసలు లోపలికి వెళ్లే బ్రష్​లను వాడాలని సూచించారు. టూత్​ బ్రష్​ను కొనుగోలు చేసేటప్పుడు మృదువుగా ఉండేదానిని తీసుకోవాలని చెప్పారు. ప్రతి 6 నెలలకు ఒకసారి దంత వైద్యుడిని సంప్రదించాలని తెలిపారు. ఇలాంటి జాగ్రత్తలు పాటించడం వల్ల పళ్లు ఆరోగ్యంగా ఉంటాయని వివరించారు.

NOTE :ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.