How To Make Instant Jonna Dosa At Home :ఈ మధ్యకాలంలో ఆరోగ్య ప్రయోజనాల దృష్ట్యా చాలా మంది డైలీ డైట్లో జొన్న రొట్టెలు(Jowar Roti)భాగం చేసుకుంటున్నారు. ముఖ్యంగా డయాబెటిస్, అధిక బరువు ఉన్నవారు నైట్ టైమ్ జొన్న రొట్టెలు తింటున్నారు. కానీ, కొంతమందికి జొన్న రొట్టెలు తయారు చేయడం రాదు. ఈ క్రమంలోనే బయట నుంచి ప్రిపేర్ చేసినవి తెచ్చుకుంటుంటారు. ఇకపై అలా తెచ్చుకోవాల్సిన అవసరం లేదు. జొన్నపిండితో ఇలా సింపుల్గా ఇన్స్టంట్ దోశలు ప్రిపేర్ చేసుకోవచ్చు. మంచి రుచితో పాటు ఆరోగ్యం మీ సొంతమవుతుంది. ముఖ్యంగా బరువు తగ్గాలనుకునే వారికి ఈ దోశలు చాలా చక్కటి పోషకాహారంగా చెప్పుకోవచ్చంటున్నారు నిపుణులు. పైగా చాలా తక్కువ సమయంలోనే వీటిని తయారుచేసుకోవచ్చు. మరి, టేస్టీగా ఉండే ఇన్స్టెంట్ జొన్న దోశల తయారీకి కావాల్సిన పదార్థాలేంటి? ఎలా తయారుచేసుకోవాలి? అన్నది ఈ స్టోరీలో చూద్దాం.
కావాల్సిన పదార్థాలు :
- జొన్నపిండి - 2 టేబుల్స్పూన్లు
- బియ్యపిండి - 1 టేబుల్స్పూన్
- ఉల్లిపాయ -1
- పచ్చిమిర్చి - 4
- మజ్జిగ - ఒక కప్పు
- నూనె - కొంచెం
- కరివేపాకు - కొద్దిగా
- ఉప్పు - రుచికి సరిపడా
- అల్లం తరుగు - కొంచెం
- కొత్తిమీర, క్యారెట్ తురుము - కొద్దిగా
తయారీ విధానం :
- ముందుగా ఉల్లిపాయలు, పచ్చిమిర్చిని సన్నగా కట్ చేసుకోవాలి.
- ఇప్పుడు మిక్సీ జార్ తీసుకొని.. ఉల్లిపాయ ముక్కలు, పచ్చిమిర్చి ముక్కలు, అల్లం తురుము, కొద్దిగా కొత్తిమీర, కరివేపాకు, కొంచెం ఉప్పు వేసుకొని గ్రైండ్ చేసుకోవాలి.
- ఆ తర్వాత అందులో కొద్దిగా మజ్జిగ వేసుకొని మరోసారి మెత్తని మిశ్రమంలా మిక్సీ పట్టుకోవాలి.
- అనంతరం ఒక బౌల్ తీసుకొని అందులో రెండు టేబుల్ స్పూన్ల జొన్నపిండి, ఒక టేబుల్ స్పూన్ బియ్యపిండి, కొద్దిగా ఉప్పు వేసుకొని చేతితో బాగా మిక్స్ చేసుకోవాలి.
- ఆ తర్వాత అందులో మిక్సీ పట్టుకొని పెట్టుకున్న ఉల్లిపాయ పేస్ట్ను వేసుకొని మజ్జిగ యాడ్ చేసుకుంటూ కలుపుకోవాలి. వాటర్కి బదులుగా మజ్జిగను యూజ్ చేస్తే దోశలకు మంచి టేస్ట్ వస్తుంది.
- ఇక ఆ మిశ్రమాన్ని దోశలు వేయడానికి కావాల్సినంత పలుచగా మిక్స్ చేసుకున్నాక.. కొద్దిగా కొత్తిమీర తరుగు వేసి మరోసారి పిండిని బాగా కలుపుకోవాలి.
- ఆ విధంగా ప్రిపేర్ చేసుకున్న పిండితో దోశ వేసుకోవాలి.
- పైనం మీద దోశ వేసుకున్నాక.. దానిపై కొద్దిగా క్యారెట్, కొత్తిమీర తురుము వేసి రెండు వైపులా కాల్చుకొని సర్వ్ చేసుకుంటే చాలు. ఎంతో రుచికరమైన'ఇన్స్టెంట్జొన్న దోశలు'(Jonna Dosa) రెడీ!