Is Brinjal Can Cause Skin Allergies: "ఆహా ఏమి రుచీ.." అంటూ వంకాయ కూర లాగిస్తుంటారు కొందరు. రుచితోపాటు ఎన్నో పోషకాలు ఈ కాయగూర సొంతం. అయితే.. స్కిన్ అలర్జీతో బాధపడేవారు వంకాయ తినకూడదని చాలా మంది చెబుతుంటారు. తింటే.. సమస్య ఎక్కువ అవుతుందని భయపెడుతుంటారు. మరి.. అలర్జీలతో ఇబ్బందిపడేవారు వంకాయ తినకూడదా? దీనికి నిపుణుల సమాధానం ఏంటి? అన్నది ఈ స్టోరీలో తెలుసుకుందాం..
సాధారణంగా స్కిన్ అలర్జీ అనేది రకరకాల కారణాల వల్ల రావొచ్చని ప్రముఖ పోషకాహార నిపుణురాలు డాక్టర్ లతాశశి అంటున్నారు. అలర్జీ సమస్య ఉన్నా కూడా వంకాయ తినొచ్చని చెబుతున్నారు. అయితే.. కేవలం ఈ కూరగాయ(వంకాయ) తినడం వల్లే అలర్జీ సమస్య ఉందని తెలిస్తే మాత్రం కొన్నాళ్లు ఈ కూరగాయను తినకుండా ఉండటమే మంచిది అంటున్నారు. పూర్తిగా మానేయాల్సిన అవసరమైతే లేదంటున్నారు.
"వంకాయ సొలనేసి కుటుంబానికి చెందినది. దీంతో పోల్చితే... క్యాప్సికం, బంగాళాదుంప, టమాటల్లో అలర్జీ కారకాలు ఎక్కువ. అయినా సరే... ఎక్కువమంది వంకాయ వల్లే సమస్య ఎదురవుతుందని అపోహపడుతుంటారు"- డాక్టర్ లతాశశి, పోషకాహార నిపుణురాలు
అందరూ మానేయాల్సిన అవసరం లేదు:సహజంగా ఫుడ్‌ అలర్జీ వల్ల దద్దుర్లు, నోటి దగ్గర వాపు, దురద వంటి లక్షణాలు కనిపిస్తాయని.. ఇలాంటప్పుడు కనీసం ఆరు వారాల పాటు దానికి దూరంగా ఉండాలంటున్నారు. ఆ తర్వాత వాటిని తినాలనుకున్నప్పుడు చాలా తక్కువ పరిమాణంలో తీసుకోవాలని సూచిస్తున్నారు. అప్పటికీ సమస్య కనిపిస్తుంటే వదిలేయొచ్చని చెబుతున్నారు.