Health Benefits of Horse Gram : రోజురోజుకి చలి తీవ్రత పెరుగుతోంది. శీతగాలులకు శరీర ఉష్ణోగ్రతలో మార్పులు చోటుచేసుకుంటుంటాయి. ఫలితంగా రోగనిరోధకశక్తి బలహీనంగా మారి వైరస్లు, బ్యాక్టీరియాలు వేగంగా బాడీలోకి ప్రవేశిస్తాయి. ఈ క్రమంలోనే శ్వాసనాళాలు బలహీనపడి జలుబు, దగ్గు, జ్వరాలు ప్రబలుతాయి. ఆస్తమా, బ్రాంకైటిస్, న్యూమోనియా వంటి శ్వాస సంబంధిత వ్యాధులు దారితీసే ప్రమాదం ఎక్కువగా ఉంటుంది. కాబట్టి, చలికాలం వివిధ ఆరోగ్య సమస్యల బారిన పడకుండా ఉండాలంటే సరైన పోషకాహారం తీసుకోవడం చాలా అవసరమంటున్నారు నిపుణులు.
ఈ క్రమంలోనే పోషకాలు పుష్కలంగా ఉండే ఉలవలను డైలీ డైట్లో చేర్చుకోవాలని సూచిస్తున్నారు. ఫలితంగా వింటర్లో విజృంభించే శ్వాస సంబంధిత వ్యాధులతో పాటు వివిధ ఆరోగ్య సమస్యల బారిన పడకుండా మిమ్మల్ని మీరు రక్షించుకోవచ్చంటున్నారు. ఇంతకీ, ఉలవలలో ఎలాంటి పోషకాలు ఉంటాయి? వాటిని తీసుకోవడం ద్వారా కలిగే ఆరోగ్య ప్రయోజనాలేంటో ఇప్పుడు చూద్దాం.
పోషకాల స్టోర్ హౌస్ : పోషకాహార లోపంతో బాధపడే వారు చిరు ధాన్యాల్లో ఒకటైన ఉలవలు క్రమం తప్పక తీసుకోవడం ద్వారా మంచి ఫలితం ఉంటుందంటున్నారు నిపుణులు. వీటిలో కార్బోహైడ్రేట్లు, కాల్షియం, ఐరన్, ఫాస్పరస్, కెరోటిన్, భాస్వరం, పీచుతో పాటు బీ1,బీ2,బీ6, సి విటమిన్లు సమృద్ధిగా ఉంటాయి. అంతేకాదు దీనివల్ల మాంసాహారానికి సమానంగా ప్రొటీన్ కూడా దొరుకుతుంది. కాబట్టి, చలికాలం ఇవన్నీ పుష్కలంగా ఉన్న ఉలవలను రోజూ వారి ఆహారంలో చేర్చుకోవడం ఆరోగ్యానికి ఎంతో మేలు చేస్తుందంటున్నారు.
తింటే కలిగే ఆరోగ్యప్రయోజనాలు!
చలికాలం ఉలవలను తీసుకోవడం ద్వారా అందులోని పోషకాలు బాడీని వెచ్చగా ఉంచడంలో తోడ్పడతాయి. అలాగే, శరీరానికి కావాల్సిన శక్తినిస్తాయి. వీటిలో సాల్యుబుల్‌ ఫైబర్‌ ఎక్కువగా ఉంటుంది. కాబట్టి, ఈ గింజల్ని డైట్లో చేర్చుకోవడం వల్ల మలబద్ధకం, గ్యాస్‌ వంటి జీర్ణ సంబంధిత సమస్యలూ ఎదురుకావంటున్నారు. అంతేకాదు, ఆకలినీ పెంచుతాయి. అధికబరువునీ నియంత్రిస్తాయి.
శ్వాస సంబంధిత సమస్యలకు చెక్ : చలికాలం వ్యాధి నిరోధక శక్తి తక్కువ ఉండడంతో చాలా మంది శ్వాస సంబంధిత సమస్యల బారిపడుతుంటారు. కాబట్టి ఈ టైమ్లో ఉలవలను డైట్లో చేర్చుకోవడం మంచి ఫలితాలను ఇస్తుందంటున్నారు. జలుబు, ఆస్తమా(ఉబ్బసం), బ్రాంకైటిస్, గొంతు ఇన్ఫెక్షన్, కిడ్నీ స్టోన్స్, అల్సర్ల నుంచి రక్షణ పొందవచ్చంటున్నారు నిపుణులు. నేషనల్ ఇన్స్టిట్యూట్ ఆఫ్ హెల్త్ సభ్యుల బృందం జరిపిన ఒక రిసెర్చ్లో కూడా ఉలవలలో ఉండే పోషకాలు ఆయా జబ్బులను ఎదుర్కోవడంలో చాలా బాగా సహాయపడతాయని కనుగొన్నారు. అందుకు సంబంధించిన రిపోర్టు కోసం ఇక్కడ క్లిక్ చేయండి.
గుండె ఆరోగ్యానికి మేలు : ఉలవల్లోని ఫెనోలిక్‌ సమ్మేళనాలు కొలెస్ట్రాల్‌ని కరిగిస్తే, ఇవి యాంటీ లిథోజెనిక్‌గా పనిచేయడం వల్ల గుండె ఆరోగ్యంగా ఉంటుంది. అలాగే, వీటిల్లో గ్లైసమిక్‌ ఇండెక్స్‌ తక్కువగా ఉండటం వల్ల రక్తపోటు, చక్కెర వ్యాధి అదుపులో ఉంటాయంటున్నారు. కాలేయం పనితీరును మెరుగుపడుతుందని చెబుతున్నారు.
రక్తహీనతతో బాధపడేవారూ, కీళ్ల నొప్పులూ, ఇతరత్రా ఎముక సంబంధిత సమస్యలతో ఇబ్బంది పడే వారూ ఉలవలను తీసుకోవడం ద్వారా ఆయా సమస్యల నుంచి మంచి ఉపశమనం పొందవచ్చంటున్నారు. అలాగే, రుతుక్రమ సమస్యలతో ఇబ్బంది పడే మహిళలు వీటిని ఆహారంలో భాగం చేసుకోవడం మంచిదట. వీటిలోని యాంటీ ఆక్సిడెంట్లూ, ఖనిజ లవణాలూ చర్మాన్నీ, జుట్టునీ ఆరోగ్యంగా ఉంచడంలో చాలా బాగా తోడ్పడతాయంటున్నారు నిపుణులు.
ఉలవలను ఏవిధంగా తీసుకోవచ్చంటే?
- ఉడికించిన నీటిని మరగకాచి ఉలవచారుని చేసుకోవచ్చు. ఇది అంటే చాలా మందికి ఎంతో ఇష్టం. లేదంటే రసం, సాంబార్‌ కూడా చేయొచ్చు. టమాటాలతో కలిపి కూర చేయొచ్చు.
- ఉడికించి గుగ్గిళ్లు లేదా నానబెట్టి మొలకలొచ్చాక తినొచ్చు. వాటికి తాలింపు వేసి కొత్తిమీర, నిమ్మరసం, ఉప్పు, ఛాట్‌మసాలా చల్లితే మరింత టేస్టీగా ఉంటాయి.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఇవీ చదవండి :
ఇవి తింటే క్యాన్సర్ వచ్చే రిస్క్ తక్కువట- అవేంటో మీకు తెలుసా?
ఒక్క శనగపిండితో ఎన్ని లాభాలో మీకు తెలుసా? మొటిమలు, చుండ్రు సమస్యలకు చెక్!
