The Kerala Story OTT Release Date :గతేడాది దేశవ్యాప్తంగా చర్చనీయాంశమైన సినిమా 'ది కేరళ స్టోరీ'. సినీ రంగంలోనే కాకుండా రాజకీయంగానూ సంచలనం సృష్టించింది. 2023లో మే 5న ప్రేక్షకుల ముందుకువచ్చిన ఈ చిత్రం ఎప్పుడెప్పుడు ఓటీటీలోకి వస్తుందా అని చాలా మంది ఆసక్తిగా ఎదురుచూస్తున్నారు. అయితే ఇప్పుడు వాటికి ఫుల్‌స్టాప్ పెడుతూ ఇది వచ్చేస్తోంది. ఫిబ్రవరి 16 నుంచి ఓటీటీ ప్లాట్ఫామ్ 'జీ5' వేదికగా స్ట్రీమింగ్ కానుంది. హిందీ, తమిళ, తెలుగు, మలయాళ భాషల్లో ఈ సినిమా ప్రసారం కానుంది.
ది కేరళ స్టోరీ సినిమాలో నటి అదాశర్మ ప్రధానపాత్రలో కనిపించారు. ప్రకటించిన దగ్గరినుంచే వివాదాలను ఎదుర్కొన్న ఈ సినిమాను మనదేశంలోని కొన్ని రాష్ట్రాలు బ్యాన్ చేశాయి. మరికొన్ని రాష్ట్రాలు వినోదపు పన్ను మినహాయింపు ఇచ్చాయి. ప్రముఖ రాజకీయ నాయకులు దీనిపై పోస్ట్‌లు పెట్టడం వల్ల గతేడాది ఈ చిత్రం హాట్ టాపిక్‌గా నిలిచింది.
డైరెక్టర్ సుదీప్తోసేన్‌ 'ది కేరళ స్టోరీ'కి దర్శకత్వం వహించారు. కేరళలో కొన్ని సంవత్సరాలుగా '32 వేల మంది' మహిళలు అదృశ్యమైనట్లు వస్తోన్న ఆరోపణలకు సంబంధించి వారి ఆచూకీ ఎక్కడనే ఇతివృత్తంతో దీన్ని చిత్రీకరించారు. ఓ నలుగురు యువతులు మతం మారి, అనంతరం ఐసిస్‌లో చేరిన నేపథ్యంతో కథ నడుస్తుంది. అయితే, తప్పిపోయిన అమ్మాయిలు మతం మారి, ఉగ్రవాద శిక్షణ పొంది, ఇండియాతోపాటు ప్రపంచవ్యాప్తంగా ఉగ్ర కార్యకలాపాల కోసం పనిచేస్తున్నారనే కోణంలో చూపించడం వివాదానికి దారితీసింది. ఈ చిత్రానికి నిర్మాతగా విపుల్‌ అమృత్‌లాల్‌ షా వ్యవహరించారు. గతంలో 'అస్మా', 'లఖ్‌నవూ టైమ్స్‌', 'ది లాస్ట్‌ మాంక్‌' వంటి చిత్రాలు నిర్మించారు.