Devara New Release Date Announced :దేవర దూసుకొస్తున్నాడు. రిలీజ్ డేట్ వాయిదా పడి అక్టోబరు 10న ప్రేక్షకుల ముందుకు తీసుకురావాలనుకున్నారు. కానీ ఇప్పుడు ఆగమేఘాల మీద అంతకన్నా ముందే రెడీ అవుతున్నాడు. తాజాగా ట్విట్టర్ వేదికగా చేసిన పోస్టులో సెప్టెంబర్ 27న రిలీజ్ చేయనున్నట్లు దేవర్ టీమ్ వెల్లడించింది. తొలి భాగాన్ని విడుదల చేయనున్నట్లు గురువారం అధికారికంగా ప్రకటించారు.
పూర్తి వివరాల్లోకి వెళితే - కొరటాల శివ - జూనియర్ ఎన్టీఆర్ కాంబినేషన్‌లో వస్తున్న రెండో సినిమా ఈ దేవర. "జనతా గ్యారేజ్" లాంటి హిట్ తర్వాత కొరటాల శివ నుంచి వస్తున్న సినిమా కావడంతో అంచనాలు భారీగా నెలకొన్నాయి. తొలి సారి జాన్వీ కపూర్ తెలుగు సినిమాకు పరిచయం కాబోతుండగా, సైఫ్ అలీఖాన్ విలన్ పాత్రలో కనువిందు చేయనున్నారు. ముందుగా అనుకున్న డేట్ ప్రకారం ఈ సమ్మర్లోనే రిలీజ్ కావాల్సి ఉంది. కానీ ఆ తర్వాత వాయిదా వేసుకున్నారు. పోస్ట్ ప్రొడక్షన్ పనులు పూర్తి చేసుకుని అక్టోబర్ 10 నాటికి రిలీజ్ చేయాలని ప్లాన్ చేసుకున్నారు. అయితే ఇప్పుడు అనుకున్న దాని కన్నా ముందే సినిమా సిద్ధం కావడం వల్ల రెండు వారాల ముందే సెప్టెంబర్ 27న రిలీజ్ చేస్తున్నట్లు కన్ఫమ్ చేశారు.
కాగా, తమిళ సూపర్ స్టార్ రజినీకాంత్ నటించిన వెట్టాయన్ చిత్రం అక్టోబర్ 10న రిలీజ్ కానుంది. పైగా దేవరను తమిళ, కన్నడ భాషల్లోనూ రిలీజ్ చేయాలనుకున్నారు. దీంతో దేవర, వెట్టాయన్ పోటీ తప్పదనుకున్నారు. అయితే ఈ రెండు చిత్రాలకు పోటీ ఉండకూడదనే ఉద్దేశ్యంతో దేవర రిలీజ్ డేట్‌ను ముందుకు జరిపినట్లు ప్రచారం సాగుతోంది.