Anupama Parameswaran Birthday:పువ్వు లాంటి నవ్వు, చక్కని చుక్కలాంటి అమ్మాయి, నల్లటి కారు మేఘాల్లాంటి కురులు ఇవన్నీ కలగలిగిపితే అనుపమ పరమేశ్వరన్. ఈ అమ్మడు ఆదివారం (ఫిబ్రవరి 18) 28వ ఏట అడుగుపెడుతోంది. టీనేజీలోనే సినిమా ఇండస్ట్రీలో ప్రవేశించింది. 'ప్రేమమ్' అనే మలయాళ సినిమాలో మేరీ జార్జ్ అనే స్కూల్ అమ్మాయి పాత్రలో కనిపించిన అనుపమ ఒక్క స్మైల్ తో యావత్ దేశాన్ని తన మాయలో పడేసింది.
ఆ తర్వాత అమ్మడు తెలుగులో రీమేక్ అయిన 'ప్రేమమ్' సినిమాలో అదే మేరీ జార్జ్ పాత్రలోనే కనిపించింది. ఇక్కడ కూడా తన నటనతో అందరినీ ఆకట్టుంది ఇక 'అఆ' సినిమాలో నెగిటివ్ షేడ్స్ ఉన్న పాత్రలో కనిపించింది తనలోని కొత్త కోణాన్ని చూపించింది. 2017లో వచ్చిన 'శతమానం భవతి' సినిమా తన కెరీర్ను ఓ మలుపు తిప్పింది. ఈ సినిమాతో ఆమె తెలుగులో మాంచి సక్సెస్ అందుకుంది. అమెరికా నుంచి వచ్చిన అమ్మాయిగా అనుపమ నటనకు మంచి మార్కులు పడ్డాయి. శర్వానంద్ పక్కన మరదలు పిల్లగా అనుపమ నటనకు కుర్రకారు అంతా ఫిదా అయిపోయారు. దీంతో తెలుగులో ఈ చిన్నదానికి ఆఫర్ల వెల్లువ మొదలైంది.
'ఉన్నది ఒకటే జిందగీ', 'హలో గురు ప్రేమకోసమే' సిినిమాల్లోనూ తనదైన శైలిలో నటించి మెప్పించింది. శర్వానంద్, రామ్, నాని, సాయి ధరమ్ తేజ్, బెల్లంకొండ శ్రీనివాస్, నిఖిల్ సిద్ధార్థ్ ఇలా యువ హీరోలతో జతకడుతూ అనుపమ తనకంటూ ఒక ప్రత్యేకమైన క్రేజ్ సంపాదించుకుంటూ ముందుకు వెళ్తోంది. 2022లో అనుపమ బ్యాక్ టు బ్యాక్ హిట్స్ అందుకుంది. 'కార్తికేయ- 2', '18 పేజెస్' ఇలా రెండు సినిమాలతో ఈ అమ్మడు రెండు హిట్స్ను తన ఖాతాలో వేసుకుంది. ఇందులో 'కార్తికేయ 2' సినిమా పాన్ ఇండియా రేంజ్లో సూపర్ హిట్గా నిలిచింది. ఇప్పటి వరకు సౌత్లో ఉన్న ఈ అమ్మడి క్రేజ్ ఈ సినిమాతో నార్త్ వరకు పాకింది.