అర్జెంటుగా డబ్బులు అవసరమయ్యాయా? బెస్ట్ 'ఎమర్జెన్సీ లోన్​' ఆప్షన్స్​ ఇవే!

ఆర్థిక అత్యవసరాల్లో ఆదుకునే ఎమర్జెన్సీ లోన్స్​- రుణం తీసుకునే ముందు ఇవి తెలుసుకోవడం చాలా ముఖ్యం

Which Is Best Emergency Loan :జీవితంలో ఆర్థిక అత్యవసరం ఎప్పుడైనా రావచ్చు. అది మెడికల్ ఎమర్జెన్సీ అయినా, కార్​ రిపేర్​ అయినా, ఇళ్లు రెనొవేషన్ అయినా కావచ్చు. అలాంటి పరిస్థితుల్లో ఆర్థిక ఇంబ్బందుల నుంచి బయటపడటానికి చాలా మంది ఎమర్జెన్సీ లోన్స్​ కోసం చూస్తారు. అయితే, ఎమర్జెన్సీ లోన్ తీసుకోవడానికి మార్కెట్​లో చాలా ఆప్షన్స్​ ఉన్నా- అందులో సరైన, మీ పరిస్థితికి తగిన లోన్ ఎంచుకోవడం చాలా ముఖ్యం.

ఆర్థిక అత్యవసరాల్లో మన అవసరాలను తీర్చేవే ఎమర్జెన్సీ లోన్స్​. ఇలాంటి ఎమర్జెన్సీ లోన్స్​- పర్సనల్​ లోన్స్​, క్రెడిట్ కార్డు అడ్వాన్స్​లు వంటి వివిధ రకాలుగా అందుబాటులో ఉన్నాయి. మీకు ఎంత మొత్తం డబ్బులు కావాలి, ఎంత అత్యవసరం, మీరు ఎలాంటి ఆర్థిక పరిస్థితుల్లో ఉన్నారనే వాటి ఆధారంగా ఎమర్జెన్సీ లోన్స్​ను ఎంచుకోవాల్సి ఉంటుంది.

ఎమర్జెన్సీ లోన్స్ రకాలు?
పర్సనల్ లోన్స్ : ఆర్థిక అత్యవసరాల్లో పర్సనల్ లోన్స్​ సౌకర్యంగా ఉంటాయి. త్వరగా అప్రూవల్​ లంభించడం సహా డబ్బులు కూడా త్వరగా వచ్చేస్తాయి. ఇలాంటి లోన్​లకు ఫిక్స్ట్​ వడ్డీ రేట్లు ఉంటాయి. నెలవారీ ఈఎమ్​ఐలు ఉంటాయి. దీంతో బడ్జెట్​లో లోన్ చెల్లింపు ప్రాణాళిక వేసుకోవచ్చు. చాలా పర్సనల్​ లోన్​లకు సెక్యూరిటీ అవసరం ఉండదు. అంటే పూచీకత్తు లేకుండానే లోన్​ ఇస్తారు. అయితే, మీ క్రెడిట్ స్కోర్, ఆదాయం, ఎంప్లాయ్​మెంట్ హిస్టరీపై లోన్ అప్రూవల్ ఆదారపడి ఉంటుంది.

క్రెడిట్ కార్డులు : ఇదివరకే ఉన్న క్రెడిట్​ కార్డు వాడుకోవడం ఆర్థిక అత్యవసరాలకు మరో ఆప్షన్. క్రెడిట్​ కార్డులో తిరిగి చెల్లింపులు చేయడానికి ఇచ్చే బఫర్​ సమయం, రుణగ్రహీతలకు సౌకర్యంగా ఉంటుంది. అయితే, పర్సనల్​ లోన్స్​ కంటే క్రెడిట్ కార్డులపై వడ్డీ రేట్లు అధికంగా ఉంటాయి. ఇక క్యాష్​ అడ్వాన్స్​లపై ఫీజులు వసూలు చేసే అవకాశం కూడా ఉంది. మీరు ఎక్కువ మొత్తంలో క్రెడిట్ కార్డు వాడితే, క్రెడిట్ యుటిలైజేషన్ రేషియో పెరుగుతుంది. దీనివల్ల మీ క్రెడిట్ స్కోర్​పై ప్రభావం పడవచ్చు.

ఎమర్జెన్సీ లోన్​ తీసుకునే ముందు ఇవి గుర్తుంచుకోవాలి

• లోన్ అప్రూవల్ టైమ్ :ఆర్థిక అత్యవసరాల్లో లోన్​ ఆమోదం వేగంగా పొందడం చాలా ముఖ్యం. కొన్ని ఎమర్జెన్సీ లోన్​లు గంటల వ్యవధిలో ఆమోదం పొందుతాయి. ఇక పర్సనల్​ లోన్​లకు ఒకట్రెండు రోజులు సమయం పట్టొచ్చు. క్రెడిట్ కార్డు అడ్వాన్స్​లకు తక్షణ ఆమోదం లభిస్తుంది.
• ఎమర్జెన్సీ లోన్​ అర్హత :రుణం ఇచ్చే ఆర్థిక సంస్థలు, లోన్​ రకంపై ఎమర్జెన్సీ లోన్​ అర్హత ఆధారపడి ఉంటుంది. సాధారణంగా క్రెడిట్ స్కోర్, ఆదాయం, ఎంప్లాయ్​మెంట్ స్టేటస్ వంటివి​ ఇందులో కీలక పాత్ర పోషిస్తాయి. పర్సనల్​ లోన్​లకు మంచి క్రెడిట్ స్కోర్, స్థిర ఆదాయం ఉంటే సరిపోతుంది. ఇక, క్రెడిట్ కార్డు అడ్వాన్స్​లు- మీ బకాయిలపై ఆధారపడుతుంది.
• వడ్డీ రేట్లు : పర్సనల్​ లోన్స్​ కంటే క్రెడిట్ కార్డులపై వడ్డీరేట్లు ఎక్కువగా ఉంటాయి. ఒకవేళ మీకు మంచి క్రెడిట్ స్కోరు ఉంటే మంచి వడ్డీ రేట్లు లభిస్తాయి.
• చెల్లింపు నిబంధనలు : నెలకు ఈఎమ్​ఐ ఎంత కట్టాలి, లోన్​ వ్యవధిని చెల్లింపు నిబంధనలు నిర్దేశిస్తాయి. పర్సనల్ లోన్​ల విషయంలో ఏడాది నుంచి 5ఏళ్ల వరకు ఫిక్స్డ్​ నిబంధనలు ఉంటాయి. ఇక క్రెడిట్ కార్డుల్లో తక్కువ మొత్తంలో ఈఎమ్​ఐ ఉంటుంది. కానీ వడ్డీ రేట్లు చాలా ఎక్కువగా ఉంటాయి. తక్కువ మొత్తం ఈఎమ్​ఐలతో లోన్​ చెల్లింపు వ్యవధి పెరుగుతుంది.

ఎమర్జెన్సీ లోన్స్​- లాభాలు, నష్టాలు
లాభాలు :

• ఎమర్జెన్సీ లోన్స్​ వల్ల త్వరగా అవసరానికి డబ్బులు చేతికి వస్తాయి.
• ఈ లోన్​ల ద్వారా వచ్చిన డబ్బులను మనం మెడికల్ బిల్స్​ నుంచి ఇంటి రిపేర్​ వరకు దేనికైనా వినియోగించుకోవచ్చు.
• ఇలాంటి లోన్​లలో చెల్లింపు నిబంధనలు, ఈఎమ్​ఐ ఆప్షన్లను మీ అవసరానికి తగ్గటు ఎంచుకోవచ్చు.

నష్టాలు :

• ఎమర్జెన్సీ లోన్​లు అధిక వడ్డీ రేట్లతో వస్తాయి. అందులో క్రెడిట్​ కార్డు అడ్వాన్స్​లకు వడ్డీ రేటు మరింత ఎక్కువగా ఉంటుంది.
• చాలా వరకు ఎమర్జెన్సీ లోన్​లకు ఒరిజినేషన్​ ఫీజు, లేట్ పేమెంట్ పెనాల్టీలు వసూలు చేస్తారు.
• ఎమర్జెన్సీ లోన్​ల వల్ల మీ అప్పు పెరిగిపోతుంది. తద్వారా మీ క్రెడిట్ స్కోరు తగ్గే అవకాశం ఉంది. ఇది ఆర్థిక ఇబ్బందులకు దారి తీసే అవకాశం ఉంది.