FD Interest Rates 2024 : మీరు ఫిక్స్డ్ డిపాజిట్లలో పెట్టుబడి పడదామని అనుకుంటున్నారా? అయితే ఇది మీ కోసమే. త్వరలో బ్యాంకులు ఎఫ్‌డీ వడ్డీ రేట్లు తగ్గించే అవకాశం ఉందని ఆర్థిక నిపుణులు భావిస్తున్నారు. అందుకే వీలైనంత త్వరగా ఎక్కువ వడ్డీ రేటు అందిస్తున్న ఫిక్స్డ్ డిపాజిట్లలో పెట్టుబడి పెట్టడం మంచిదని సూచిస్తున్నారు.
కారణమిదే!
రిజర్వ్ బ్యాంక్ ఆఫ్ ఇండియా వరుసగా గత 10 'ద్రవ్య పరపతి విధాన సమీక్ష' (ఎంపీసీ)ల్లో రెపో రేటును స్థిరంగా ఉంచుతూ వచ్చింది. కానీ డిసెంబర్‌లో జరగనున్న ఎంపీసీలో ఆర్‌బీఐ రెపో రేటును తగ్గించే అవకాశం ఉందని వార్తలు వస్తున్నాయి. ఇదే జరిగితే బ్యాంకులు ఫిక్స్డ్ డిపాజిట్లపై అందించే వడ్డీ రేట్లు తగ్గిస్తాయి. అప్పుడు కొత్తగా పెట్టుబడులు పెట్టాలని అనుకునేవారికి ఇబ్బంది ఏర్పడుతుంది. అందుకే వీలైనంత త్వరగా ఎక్కువ వడ్డీ రేటు ఉన్న ఫిక్స్డ్ డిపాజిట్లలో ఇన్వెస్ట్ చేయడం మంచిదని ఆర్థిక నిపుణులు సూచిస్తున్నారు.
ఏది బెస్ట్ ఛాయిస్‌!
ఒక ఏడాది కాలవ్యవధి గల ఫిక్స్డ్ డిపాజిట్లపై వడ్డీ రేటు తక్కువగా ఉంటుంది. 5 ఏళ్ల కాలపరిమితి గల ఎఫ్‌డీలు తీసుకుంటే, వడ్డీ రేటు ఎక్కువగా ఉంటుంది. కానీ మధ్యలో మీకు ఆర్థిక అత్యవసరం ఏర్పడితే, ఇబ్బంది పడాల్సి వస్తుంది. అందుకే ఎక్కువ వడ్డీ రేటు ఉండి, స్వల్పకాలిక ఆర్థిక లక్ష్యాలను చేరుకునేందుకు వీలుగా 3 ఏళ్ల కాలపరిమితి కలిగిన ఫిక్స్డ్ డిపాజిట్లలో ఇన్వెస్ట్ చేయడం మంచిదని ఆర్థిక నిపుణులు సూచిస్తున్నారు.
ప్రైవేట్ బ్యాంకులు - వడ్డీ రేట్లు
ఫిక్స్డ్ డిపాజిట్లపై ప్రైవేట్ బ్యాంకులు అందిస్తున్న వడ్డీ రేట్లు ఎలా ఉన్నాయో ఇప్పుడు చూద్దాం.
| బ్యాంక్ | జనరల్ సిటిజన్స్‌ | సీనియర్ సిటిజన్స్‌ |
| హెచ్‌డీఎఫ్‌సీ బ్యాంక్ | 7% | 7.5% |
| ఐసీఐసీఐ బ్యాంక్ | 7% | 7.5% |
| కోటక్ మహీంద్రా బ్యాంక్ | 7% | 7.6% |
| ఫెడరల్ బ్యాంక్ | 7% | 7.5% |
- దేశంలోని అతిపెద్ద ప్రైవేట్ రంగ బ్యాంక్ అయిన హెచ్‌డీఎఫ్‌సీ - ఫిక్స్డ్ డిపాజిట్లపై సాధారణ ఖాతాదారులకు 7%, సీనియర్ సిటిజన్లకు 7.5% చొప్పున వడ్డీ అందిస్తోంది.
- ఐసీఐసీఐ బ్యాంక్ కూడా ఎఫ్‌డీలపై సాధారణ ఖాతాదారులకు 7%, సీనియర్ సిటిజన్లకు 7.5% చొప్పున వడ్డీ ఇస్తోంది.
- కోటక్ మహీంద్రా బ్యాంక్ ఎఫ్‌డీలపై సాధారణ ఖాతాదారులకు 7%, సీనియర్ సిటిజన్లకు 7.6% చొప్పున వడ్డీ అందిస్తోంది.
- ఫెడరల్ బ్యాంక్ ఫిక్స్డ్ డిపాజిట్లపై సాధారణ ఖాతాదారులకు 7%, సీనియర్ సిటిజన్లకు 7.5% చొప్పున వడ్డీ ఇస్తోంది.