'ట్యాంకర్ మాఫియాను నిలువరిస్తారా? పోలీసు చర్యలకు ఆదేశించాలా?'- ఆప్ సర్కార్​పై సుప్రీం ఫైర్ - Delhi Water Crisis

SC On Delhi Water Crisis : దిల్లీలో నీటి సంక్షోభం తీవ్రమవుతున్న వేళ ఆప్​ సర్కార్​పై మండిపడింది. నీటి వృథాను అరికట్టేందుకు, ట్యాంకర్ మాఫియాకు చెక్ పెట్టేందుకు చేపడుతున్న చర్యలు గురించి వివరణ ఇవ్వాలని ఆదేశించింది.

SC On Delhi Water Crisis :దిల్లీ సర్కారుకు సుప్రీంకోర్టు చురకలు అంటించింది. హిమాచల్ ప్రదేశ్ నుంచి దిల్లీకి నదీ జలాలు విడుదలవుతున్నా కోర్టుకు ఎదుట అబద్ధాలు ఎందుకు చెబుతున్నారని ప్రశ్నించింది. దిల్లీకి వస్తున్న నీళ్లన్నీ ఏమవుతున్నాయని ఆప్ సర్కారును దేశ సర్వోన్నత న్యాయస్థానం నిలదీసింది.

'దిల్లీలో నీటిని వృథా చేస్తున్నారని, ట్యాంకర్ మాఫియా రెచ్చిపోతోందనే అంశాలపై న్యూస్ ఛానళ్లలో వస్తున్న వార్తలను మేం చూస్తున్నాం. ఈ విషయాలపై మీరు ఎలాంటి చర్యలు తీసుకుంటున్నారు? ట్యాంకర్ మాఫియాకు మీరు అడ్డుకట్ట వేయలేకపోతే చెప్పండి. ఈ విషయంలో చర్యలు తీసుకోవాలని దిల్లీ పోలీసులను ఆదేశిస్తాం' అని జస్టిస్ ప్రశాంత్ కుమార్ మిశ్రా, జస్టిస్ ప్రసన్న బి వరాలేలతో కూడిన వెకేషన్ బెంచ్ ఆప్ సర్కారుకు తేల్చి చెప్పింది.

హరియాణా, యూపీ, హిమాచల్‌తో సహా ఇతర రాష్ట్రాల నుంచి అదనపు నీటిని విడుదల చేయాలని కేజ్రీవాల్ సర్కార్ దాఖలు చేసిన పిటిషన్‌ను సుప్రీంకోర్టు బుధవారం విచారించింది. దిల్లీ ప్రభుత్వం తరఫున న్యాయవాది షాదన్ ఫరాసత్ వాదనలు వినిపిస్తూ ఆప్ సర్కారు నీటి వృథాను అరికట్టేందుకు ప్రయత్నిస్తోందన్నారు. దీంతో నీటి వృథాను అరికట్టేందుకు, ట్యాంకర్ మాఫియాకు చెక్ పెట్టేందుకు చేపడుతున్న చర్యల వివరాలతో ఒక అఫిడవిట్‌ను దాఖలు చేయాలని ఆప్ సర్కారును సుప్రీంకోర్టు ఆదేశించింది. రెండు రోజుల్లో ఆ అఫిడవిట్‌ను సమర్పించాలని సూచించింది. ఈ అంశంపై తదుపరి విచారణను గురువారానికి వాయిదా వేసింది.

క్విక్ రెస్పాన్స్ టీమ్‌లతో తనిఖీ
మరోవైపు దిల్లీ ప్రభుత్వం అలర్ట్ అయింది. హస్తినలోని ప్రధాన నీటి పైపులైన్ల లీకేజీలను తనిఖీ చేయాలని క్విక్ రెస్పాన్స్ బృందాలను దిల్లీ జల వనరుల శాఖ మంత్రి ఆతిశీ ఆదేశించారు. అదనపు జిల్లా మేజిస్ట్రేట్/ సబ్ డివిజనల్ మేజిస్ట్రేట్ స్థాయి అధికారులు, తహసీల్దార్లతో క్విక్ రెస్పాన్స్ టీమ్‌లను ఏర్పాటు చేశారు. వాటర్ ట్యాంకర్ల కేటాయింపు, నీటి పంపిణీకి సంబంధించిన ఫిర్యాదుల పరిష్కార బాధ్యతలను క్విక్ రెస్పాన్స్ టీమ్‌లు చూస్తాయని ఆతిశీ పేర్కొన్నారు.

'దిల్లీలోని జల వనరులు, నీటిశుద్ధి కర్మాగారాలు, భూగర్భ జలాశయాల నుంచి నీటి పంపిణీ జరుగుతున్న తీరుపై క్విక్ రెస్పాన్స్ టీమ్‌లతో తనిఖీ చేయించాలి. దేశ రాజధాని నగరంలో నీటి పంపిణీ వ్యవస్థ ఎలా ఉందనే వివరాలన్నీ సేకరించాలి. ఈమేరకు దిల్లీ ప్రభుత్వ ముఖ్య కార్యదర్శికి ఆదేశాలు జారీ చేశాం. ఎక్కడైనా పైపులైన్లలో నీటి లీకేజీ జరుగుతోందని గుర్తిస్తే, 12 గంటల్లోగా మరమ్మతులు చేయించాలని చెప్పాం. క్విక్ రెస్పాన్స్ టీమ్‌లు తాము నిర్వహించిన తనిఖీల సమాచారాన్ని ప్రతిరోజూ సాయంత్రం 5 గంటలకు నాకు సమర్పించాలి' అని ఆదేశించినట్లు ఆతిశీ తెలిపారు.