Maha Kumbh Stampede :కుంభమేళా తొక్కిసలాటలో 30 మంది మృతి చెందారని, మరో 60 మంది గాయపడ్డారని మహాకుంభ్ డీఐజీ వైభవ్కృష్ణ తెలిపారు. 'మౌని అమావాస్య సందర్భంగా బ్రహ్మ ముహూర్తంలో అమృతస్నానం ఆచరించే ఉద్దేశంతో ప్రజలు భారీగా గుమిగూడారు. రద్దీ కారణంగా బారికేడ్లు విరిగిపోయాయి. దీనితో అర్థరాత్రి 1-2 గంట్ల మధ్య ఈ తొక్కిసలాట జరిగింది. సుమారు 90మంది క్షతగాత్రులను అంబులెన్స్‌ల ద్వారా ఆస్పత్రులకు తరలించగా, దురదృష్టవశాత్తు 30 మంది భక్తులు మరణించారు. మరో 60 మంది ప్రస్తుతం చికిత్స పొందుతున్నారు. ఇప్పటి వరకు మృతుల్లో 25 మందిని గుర్తించాం' అని మహాకుంభ్ డీఐజీ పేర్కొన్నారు. అదనపు వివరాల కోసం హెల్ప్లైన్ 1920ను సంప్రదించవచ్చని సూచించారు. కాగా తొక్కిసలాట జరిగిన నేపథ్యంలో ఇవాళ కుంభమేళాకు వీఐపీలను ఎవరినీ అనుమతించలేదని ఆయన తెలిపారు.
తొక్కిసలాట నేపథ్యంలో ఉత్తర్‌ప్రదేశ్‌లోని ప్రయాగ్‌రాజ్‌లో పుణ్యస్నానాలను కొంతసేపు నిలిపివేశారు. తొక్కిసలాట ఘటనతో వెంటనే స్పందించిన సహాయక సిబ్బంది గాయపడ్డవారిని అంబులెన్సుల్లో కుంభమేళా పరిసరాల్లో ఏర్పాటు చేసిన ఆస్పత్రికి తరలించారు. బాధితుల కుటుంబ సభ్యులు కూడా చేరుకోవటం వల్ల ఆసుపత్రి రద్దీగా మారింది. మహా కుంభమేళాలో భక్తులకు అవసరమైన సహాయం అందించేందుకు యూపీ సర్కారు హెల్ప్లైన్ నంబర్లను ఏర్పాటు చేసింది. మృతులు కర్ణాటక, గుజరాత్‌, అసోం సహా పలు రాష్ట్రాలకు చెందినవారని పోలీసులు వెల్లడించారు.
న్యాయ విచారణకు ఆదేశం
మహా కుంభమేళాలో జరిగిన తొక్కిసలాట ఘటనపై జ్యుడీషియల్ ఎంక్వైరీ జరిపించనున్నట్లు ఉత్తరప్రదేశ్‌ సీఎం యోగి ఆదిత్యనాథ్‌ తెలిపారు. ఈ ఘటన ప్రభుత్వ యంత్రాంగానికి ఓ పాఠం లాంటిందన్నారు. ప్రమాదానికి దారితీసిన పరిస్థితులపై నివేదిక సమర్పించాలని కుంభమేళా అధికారులను ఆదేశించినట్లు చెప్పారు. ఈ ఘటన తన హృదయాన్ని ద్రవింపజేసిందంటూ సీఎం యోగి భావోద్వేగానికి గురయ్యారు. మృతుల కుటుంబాలకు సానుభూతి తెలిపారు.