NIRF Ranking 2024 : దేశంలో అత్యుత్తమ ఉన్నత విద్యాసంస్థల జాబితాలో ఐఐటీ మద్రాస్ వరుసగా ఆరోసారి అగ్రస్థానంలో నిలిచింది. ఉత్తమ విశ్వవిద్యాలయాల విభాగంలో ఇండియన్ ఇన్స్టిట్యూట్ ఆఫ్ సైన్స్(IISc) బెంగళూరు మొదటి స్థానాన్ని సంపాదించింది. మొత్తం ఉన్నత విద్యాసంస్థల్లో ఐఐఎస్సీ బెంగళూరు రెండో స్థానంలో ఉండగా, ఐఐటీ బాంబే, ఐఐటీ దిల్లీ వరుసగా మూడు, నాలుగో స్థానాల్లో నిలిచాయి. టాప్-10 ఉన్నత విద్యాసంస్థల జాబితాలో మొత్తం 8 ఐఐటీలు, దిల్లీ ఎయిమ్స్, జవహర్లాల్ నెహ్రూ యూనివర్సిటీ చోటు దక్కించుకున్నాయి. ఈ మేరకు నేషనల్ ఇన్స్టిట్యూషనల్ ర్యాకింగ్ ఫ్రేమ్‌ వర్క్‌(NIRF) కింద కేంద్ర విద్యాశాఖ సోమవారం ఈ జాబితాను విడుదల చేసింది.
మేనేజ్మెంట్ విభాగంలో ఐఐఎం అహ్మదాబాద్ టాప్
అత్యుత్తమ ఇంజినీరింగ్ విద్యాసంస్థల్లో ఐఐటీ మద్రాస్ వరుసగా తొమ్మిదో సారి అగ్రస్థానం సంపాదించింది. ఐఐటీ దిల్లీ, ఐఐటీ బాంబే వరుసగా రెండు, మూడో స్థానాల్లో నిలిచాయి. ఎన్ఐటీ తిరుచురాపల్లి మాత్రమే అత్యుత్తమ ఇంజినీరింగ్ విద్యాసంస్థల టాప్-10 జాబితాలో చోటు దక్కించుకుంది. మేనేజ్మెంట్ విభాగంలో ఐఐఎం అహ్మదాబాద్ మొదటి స్థానంలో నిలిచింది. ఐఐఎం బెంగళూరు, ఐఐఎం కోజీకోడ్ తర్వాతి స్థానాల్లో ఉన్నాయి. ఐఐటీ బాంబే, ఐఐటీ దిల్లీ టాప్-10 జాబితాలో స్థానం సంపాదించుకున్నాయి.
- ఫార్మసీలో జామియా హమ్‌ దర్ద్‌ ఉత్తమ విశ్వవిద్యాలయంగా నిలిచింది. గతేడాది ఈ యూనివర్సిటీ రెండో స్థానంలో ఉండేది. 2023లో తొలిస్థానంలో ఉన్న హైదరాబాద్లోని నేషనల్ ఇన్స్టిట్యూట్ ఆఫ్ ఫార్మాసూటికల్‌ ఎడ్యుకేషన్ అండ్ రీసెర్చ్‌ ఈ ఏడాది రెండో స్థానానికి పడిపోగా, బిట్స్ పిలానీ మూడో స్థానంలో నిలిచింది.
- ఉత్తమ కళాశాలగా దిల్లీ యూనివర్శిటీలోని హిందూ కళాశాల ఎంపికైంది. మిలాండా హౌస్, సెయింట్ స్టీఫెన్స్ కళాశాల వరుసగా రెండు, మూడో స్థానాల్లో నిలిచాయి.
- వైద్య విద్యలో దిల్లీలోని ఎయిమ్స్ మొదటి స్థానంలో నిలిచింది. చండీగఢ్లోని పోస్ట్‌ గ్రాడ్యుయేట్‌ ఇన్స్టిట్యూట్ ఆఫ్ మెడికల్‌ ఎడ్యుకేషన్ అండ్ రీసెర్చ్‌ (పీజీఐఎంఈఆర్‌), వేలూరులోని క్రిస్టియన్‌ మెడికల్‌ కాలేజీ తర్వాతి స్థానాల్లో నిలిచాయి.
- ఆర్కిటెక్చర్లో ఐఐటీ రూర్కీ అగ్రస్థానాన్ని సంపాదించింది. ఐఐటీ ఖరగ్పుర్, ఎన్ఐటీ కాలికట్ తర్వాతి స్థానాల్లో నిలిచాయి.
- ఉత్తమ రాష్ట్ర విశ్వవిద్యాలయంగా చెన్నైలోని అన్నా యూనివర్సిటీ నిలిచింది. కోల్కతాలోని జాదవ్పుర్ యూనివర్సిటీ రెండో స్థానాన్ని సంపాదించింది.
- న్యాయ విద్యలో బెంగళూరులోని నేషనల్ లా స్కూల్‌ ఆఫ్ ఇండియా యూనివర్సిటీ, దిల్లీలోని నేషనల్ లా యూనివర్సిటీ, హైదరాబాద్లోని నల్సార్‌ యూనివర్సిటీ ఆఫ్ లా తొలి మూడు స్థానాల్లో నిలిచాయి.
- పరిశోధన విభాగంలో ఐఐఎస్సీ బెంగళూరు మొదటి స్థానంలో నిలిచింది. ఐఐటీ మద్రాస్, ఐఐటీ దిల్లీ వరుసగా రెండు, మూడు స్థానాల్లో ఉన్నాయి.