మామిడి పండ్లతో నోరూరించే బొబ్బట్లు - రుచి అద్దిరిపోతుంది! ప్రిపరేషన్​ వెరీ ఈజీ! - mango bobbatlu making process

How to Make Mango Bobbatlu : చాలా మందికి స్వీట్​ రెసిపీస్​ అంటే ఇష్టం. అందులోనూ బొబ్బట్లను బాగా తింటుంటారు. అయితే బొబ్బట్లను ఎప్పుడూ చేసే విధంగా కాకుండా ఈసారి మామిడిపండుతో చేస్తే రుచి మాత్రం అదిరిపోతుంది. మరి దీనికి కావాల్సిన పదార్థాలు, తయారీ విధానం ఈ స్టోరీలో చూద్దాం..

How to Make Mango Bobbatlu : ప్రస్తుతం మామిడి పండ్ల సీజన్​ నడుస్తోంది. ఇక చిన్న పిల్లల నుంచి పెద్దల వరకు అందరూ మామిడిపండ్లను ఎంతో ఇష్టంగా తింటారు. వాటితో జ్యూసులు, లస్సీలు,ఫుడ్డింగ్​అంటూ రకరకాలుగా చేసుకుని తింటుంటారు. అయితే కేవలం ఇవి మాత్రమే కాకుండా తియ్యటి మామిడి పండ్లతో ఒకసారి బొబ్బట్లు చేసి చూడండి. రుచి అదిరిపోతుంది. ఇంటికి ఎవరైనా వచ్చినప్పుడు ఇవి చేసినా కూడా సూపర్​ అంటారు. అంతేకాదు వీటిని చేయడం కూడా చాలానే ఈజీ. మరి దీనికి కావాల్సిన పదార్థాలు, తయారీ విధానం ఈ స్టోరీలో చూద్దాం..

మామిడి బొబ్బట్లకు కావాల్సిన పదార్థాలు:

• మామిడి పండు - 1
• గోధుమ పిండి లేదా మైదా - 1 కప్పు
• నెయ్యి - తగినంత
• ఉప్పు - రుచికి సరిపడా
• పచ్చి కొబ్బరి తురుము - పావు కప్పు
• బెల్లం తురుము - పావు కప్పు
• యాలకుల పొడి - 1 టీస్పూన్​

తయారీ విధానం:

• ముందుగా ఒక గిన్నెలో గోధుమ పిండి లేదా మైదా పిండి తీసుకుని కొద్దిగా ఉప్పు వేసుకుని గోరు వెచ్చని నీళ్లు పోసుకుంటూ చపాతీ ముద్దలా మెత్తగా కలుపుకోవాలి. ఆ తర్వాత మూతపెట్టి కొద్దిసేపు పక్కకి పెట్టాలి.
• ఇప్పుడు మామిడిపండును చెక్కు తీసి చిన్న చిన్న ముక్కలుగా కట్​ చేసి మిక్సీ గిన్నెలో వేసి మెత్తగా గ్రైండ్​ చేసుకోవాలి.
• ఇప్పుడు స్టవ్​ ఆన్​ చేసి పాన్​ పెట్టి ఓ రెండు చెంచాల నెయ్యి వేసి పచ్చికొబ్బరి తురుము వేసుకోవాలి.
• చిన్న మంట మీద రంగు మారే వరకు వేయించుకోవాలి.
• ఇప్పుడు అందులోనే బెల్లం తురుము వేసుకుని కలుపుకోవాలి.
• ఆ తర్వాత మామిడి పండు గుజ్జును వేసి బాగా కలుపుకోవాలి.
• స్టవ్​ సిమ్​లో పెట్టి ఈ మిశ్రమాన్ని వేయించుకోవాలి. మామిడి గుజ్జు మొత్తం దగ్గరగా అంటే హల్వా లాగా దగ్గరగా పాన్​కు అట్టుకోకుండా ఉండేలా చేసుకోవాలి.
• ఆ సమయంలో యాలకుల పొడి వేసి బాగా కలుపుకుని ఓ రెండు నిమిషాల తర్వాత స్టవ్​ ఆఫ్​ చేసి చల్లారనివ్వాలి.
• మామిడి పండు మిశ్రమం చల్లారని తర్వాత చిన్న చిన్న ఉండలుగా చేసుకుని పక్కకు పెట్టుకోవాలి.
• ఇప్పుడు ముందుగానే కలిపి పెట్టుకున్న చపాతీ మిశ్రమాన్ని చిన్న చిన్న ఉండలుగా చేసుకుని పక్కకు పెట్టుకోవాలి.
• ఇప్పుడు ఓ పిండి ముద్దను తీసుకుని కొంత మేర పూరీల్లా ఒత్తుకుని మధ్యలో ఈ మామిడిపండు పూర్ణాలను పెట్టి పిండి మొత్తాన్ని దగ్గరగా మడచి.. పూరీ కర్ర లేదా చేత్తో పల్చగా బొబ్బట్లుగా ఒత్తుకోవాలి. అయితే ఇలా ఒత్తుకునే సమయంలో మామిడి పండు మిశ్రమం బయటకు రాకుండా చూసుకోవాలి.
• ఇప్పుడు స్టవ్​ మీద పెనం పెట్టి బొబ్బట్లు వేసి నెయ్యి వేసుకుంటూ రెండు వైపులా ఎర్రగా కాల్చుకోవాలి. ఇలా అన్నింటిని ప్రిపేర్​ చేసుకోవాలి. అంతే ఎంతో టేస్టీగా ఉండే బొబ్బట్లు రెడీ అవుతాయి.