Hemant Soren News :ఝార్ఖండ్‌లో ఉత్కంఠ వీడింది. అజ్ఞాతంలో ఉన్నట్లు ప్రచారం జరిగిన ముఖ్యమంత్రి హేమంత్ సోరెన్ రాంచీలోని తన నివాసానికి చేరుకున్నారు. భూకుంభకోణానికి సంబంధించిన మనీలాండరింగ్‌ కేసులో ఆరోపణలు ఎదుర్కొంటున్న హేమంత్‌ను విచారించేందుకు సోమవారం దిల్లీలోని ఆయన నివాసానికి ఈడీ అధికారులు వెళ్లారు. సోమవారం రాత్రివరకు ఎదురుచూసినా సోరెన్ అక్కడికి రాలేదు. సీఎంకు చెందిన రెండు కార్లు, రూ.36 లక్షల నగదు, కొన్ని పత్రాలను స్వాధీనం చేసుకుని అక్కడి నుంచి వెళ్లిపోయారు. అయితే సోమవారం అర్ధరాత్రి హేమంత్ సోరెన్ రాంచీలోని తన నివాసానికి చేరుకున్నట్లు సీఎంఓ వర్గాలు తెలిపాయి. ఇప్పటికే ఝార్ఖండ్ సంకీర్ణ కూటమి ఎమ్మెల్యేలంతా రాంచీ చేరుకోగా వారితో సోమవారం మధ్యాహ్నం హేమంత్ సోరెన్ సమావేశం నిర్వహించారు.
మరోవైపు, రాంచీ చేరుకున్న ఝార్ఖండ్ సీఎం హేమంత్ సోరెన్ మహాత్మా గాంధీ వర్ధంతి సందర్భంగా బాపూధామ్లో ఉన్న మహాత్ముని విగ్రహానికి నివాళులర్పించారు. 'గాంధీ లాంటి వ్యక్తులు మన మధ్యే పుట్టి మనకు మార్గనిర్దేశం చేసినందుకు గర్విస్తున్నా.' అని తెలిపారు.
అధికారులతో గవర్నర్ మీటింగ్
దిల్లీలో సీఎం హేమంత్ సోరెన్ నివాసంలో ఈడీ సోదాలు జరిపిన నేపథ్యంలో ఝార్ఖండ్ గవర్నర్ సీపీ రాధాకృష్ణన్ అప్రమత్తమయ్యారు. ప్రభుత్వ ఉన్నతాధికారులతో సమావేశమై రాష్ట్రంలో నెలకొన్న ప్రస్తుత రాజకీయ పరిస్థితులపై చర్చించారు. రాష్ట్రంలో భద్రతా ఏర్పాట్లపై ఆరా తీశారు. మరోవైపు, శాంతిభద్రతల పరిరక్షణకు రాష్ట్రవ్యాప్తంగా కట్టుదిట్టమైన భద్రతా ఏర్పాట్లు చేశామని, అదనంగా మరో 7 వేల మంది పోలీసులను మోహరిస్తున్నామని ఓ అధికారి తెలిపారు. సీఎం హేమంత్ సోరెన్ నివాసంతోపాటు రాజ్‌భవన్‌, ఈడీ కార్యాలయం వద్ద 144 సెక్షన్ విధించినట్లు పేర్కొన్నారు.