Kannada Actor Darshan Case : అభిమాని రేణుకాస్వామి హత్య కేసులో విచారణ ఖైదీగా ఉన్న కన్నడ నటుడు దర్శన్కు జైల్లో రాచమర్యాదలు లభిస్తున్నట్లు వచ్చిన ఆరోపణలు చర్చనీయాంశంగా మారాయి. ఈ క్రమంలోనే కీలక పరిణామం జరిగింది. దర్శన్‌ను బళ్లారి జైలుకు మార్చినట్లు తాజా సమాచారం. పరప్పన అగ్రహార కేంద్ర కారాగారంలో విచారణ ఖైదీగా ఉన్న దర్శన్‌ను, బెంగళూరు న్యాయస్థానం ఆదేశాల మేరకు బళ్లారి జైలుకు తరలించినట్లు తెలుస్తోంది. ఈ కేసులో ఇతర నిందితులను కర్ణాటకలోని ఇతర జైళ్లకు తరలించనున్నట్లు సమాచారం. జైల్లో దర్శన్కు సంబంధించిన దృశ్యాలు ఇటీవల సోషల్‌మీడియాలో వైరల్‌గా మారడం ఈ పరిణామానికి దారి తీసినట్లు తెలుస్తోంది.
దర్శన్ కారాగారం బ్యారక్‌ నుంచి బయటకు వచ్చి స్నేహితులతో కూర్చొని కాఫీ, సిగరెట్‌ తాగుతున్న ఫోటో ఒకటి బయటకు వచ్చింది. ఇది తీవ్ర చర్చకు దారి తీసింది. రౌడీషీటర్‌ వేలు ఆ చిత్రాన్ని రహస్యంగా సెల్‌ఫోన్‌లో బంధించి బయట ఉన్నతన భార్య సెల్‌ఫోన్‌కు పంపించినట్లు తెలుస్తోంది. దర్శన్ కలిసి కూర్చొని కాఫీ తాగుతున్న వారిలో రౌడీషీటర్‌ విల్సన్‌ గార్డన్‌ నాగ కూడా ఉన్నాడు.
వీడియో కాల్‌ ద్వారా అతడు 25 సెకన్ల పాటు అవతలి వ్యక్తితో మాట్లాడుతున్న వీడియో కూడా బయటకు రావడం అనుమానాలకు మరింత బలానిచ్చింది. దీంతో అతడికి జైలులో రాచ మర్యాదలు అందుతున్నాయని వార్తలు వెలువడ్డాయి. జైల్లో ప్రత్యేక ఏర్పాట్ల ఆరోపణల నేపథ్యంలో పోలీసు విభాగం చర్యలకు ఉపక్రమించింది. ఈ వ్యవహారంతో ఏడుగురు పోలీసు అధికారుల ప్రమేయం ఉందని ప్రాథమిక విచారణలో తేలడం వల్ల వారిపై సస్పెండ్ వేటు పడింది. ఈ నేపథ్యంలోనే న్యాయస్థానం తాజాగా ఆదేశాలు జారీ చేయడం లస్స దర్శన్‌ను మరో కారాగారానికి మార్చినట్లు వార్తలు వినిపిస్తున్నాయి.