গুৱাহাটী,২৯ মে':সামৰণি পৰিল পৱিত্ৰ হজ যাত্ৰাৰ । উত্তৰ-পূৱৰ ৰাজ্যকেইখনৰ পৰা এইবেলি পৱিত্ৰ হজ যাত্ৰা সমাপনৰ বাবে ৩,৮০৭ গৰাকী লোক মক্কালৈ যাত্ৰা কৰিছে । ইয়াৰ ভিতৰত গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ পৰা পোনপটীয়াকৈ বিশেষ বিমানৰে জেদ্দাহ হৈ মক্কালৈ যাত্ৰা কৰিছে ৩,২৯৬ জন হজ যাত্ৰীয়ে । বাকীখিনিৰ বেছিভাগেই কলকাতা বিমানবন্দৰৰ পৰা মক্কালৈ যাত্ৰা কৰিছে ।
আনহাতে ভাৰতৰ আন কেইবাখনো ৰাজ্যৰ লগতে অসমসহ উত্তৰ-পূৱৰ ৰাজ্যকেইখনৰ হজ যাত্ৰা ১৬ মে'ৰ পৰা গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ পৰা আৰম্ভ হৈছিল । বুধবাৰে দিনৰ ১১:৪৫ বজাত শেষৰখন বিশেষ বিমানে ১৭১ জন হজযাত্ৰী লৈ জেদ্দাহ হৈ মক্কা অভিমুখে যাত্ৰা কৰে । শেষ হজযাত্ৰীৰ দলটোক বৰঝাৰ বিমানবন্দৰৰ হজ অভ্যৰ্থনা সমিতিৰ কাৰ্যালয়ত আদৰণি জনাই বৰঝাৰ বিমানবন্দৰ হজ অভ্যৰ্থনা সমিতিৰ সভাপতি আলটাফ হুছেইন, কাৰ্যকৰী সভাপতি কাচিম আলী, আহ্বায়ক ক্ৰমে- মজনুৰ আলী, মীৰ হুছেইন, চৌকত আলী, সৌৰভ আলী, গুলজাৰ আলী, দিলোৱাৰ হুছেইন, আলিমুন হুছেইন, ৰুণু বেগমকে ধৰি কেইবাজনো কৰ্মকৰ্তাই ।
আনহাতে সভাপতি আলটাফ হুছেইনে হজযাত্ৰীসকলক যাত্ৰাৰ শুভেচ্ছা জ্ঞাপন কৰি চৰকাৰে বান্ধি দিয়া নীতি-নিয়মসমূহ মানি চলি সকলোৱে যাতে পৱিত্ৰ হজ সম্পন্ন কৰি ৰাজ্যখনৰ সুখ, শান্তি, সমৃদ্ধিৰ বাবে দোৱা কৰে তাৰ কামনা কৰে । ইতিমধ্যে সন্ধিয়া বিশেষ বিমানখন গৈ জেদ্দাহ বিমান বন্দৰত গৈ অবতৰণ কৰিব বুলি জানিব পৰা গৈছে ।