వీడు మామూలు దొంగ కాదు బాబోయ్.. జేబుకే తెలియకుండా ఫోన్ కొట్టేశాడు

cell phone theft viral video in Karimnagar: హోటళ్లు, బస్టాండ్లు, రైల్వే స్టేషన్‌లలో ఏమాత్రం ఏమరుపాటుగా ఉన్నా.. సెలోఫోన్లు దొంగిలించే ఘటనలు కోకొల్లలు. అలాంటి ఘటనే తాజాగా కరీంనగర్ బస్టాండ్‌ వద్ద చోటుచేసుకుంది. బస్టాండ్ ఎదురుగా ఉన్న హోటల్‌లో తాజాగా ఓ కుర్రాడు జేబులో నుంచి సెల్‌ ఫోన్ దొంగిలించిన వీడియో వైరల్‌గా మారింది. 

హోటల్​లో కౌంటర్ వద్ద బిల్లు చెల్లిస్తున్న కొయ్యల లక్ష్మణ్‌ అనే వ్యక్తి పక్కనే నిలబడిన ఓ కుర్రాడు.. పాలిథీన్​ కవర్​ అడ్డం పెట్టి జేబుకే తెలియకుండా క్షణాల్లో సెల్‌ఫోన్ కొట్టేశాడు. బిల్లు చెల్లించి బయటికి వచ్చి ఫోన్ కోసం చూసుకున్న బాధితుడు తన ఫోన్‌ మాయమైన విషయాన్ని గమనించాడు. లబోదిబోమంటూ విషయాన్ని హోటల్ మేనేజర్‌ దృష్టికి తీసుకెళ్లారు. 

సీసీ టీవీ ఫుటేజి పరిశీలించిన యాజమాన్యం దొంగతనం జరిగిన తీరును గుర్తించారు. అందులో సదరు యువకుడు బాధితుడుకి ఏ మాత్రం అనుమానం రాకుండా కవర్​ అడ్డం పెట్టుకొని దొంగతనం చేస్తున్న దృశ్యాలు కనిపిస్తున్నాయి. ఇప్పుడు ఈ వీడియో కరీంనగర్​ పట్టణంలో వైరల్​గా మారింది. అయితే ఈ ఘటనపై బాధితుడు పోలీసులకు ఫిర్యాదు చేశారా.. లేద..?,  దొంగతనానికి పాల్పడిన వ్యక్తిని పట్టుకున్నారా అనే విషయాలు తెలియాల్సి ఉంది.