చంద్రబాబు బెయిల్ రద్దు పిటిషన్ - ఫిబ్రవరి 12కు వాయిదా వేసిన సుప్రీం

cbn bail in SC : స్కిల్ కేసులో చంద్రబాబు బెయిల్ రద్దు చేయాలన్న రాష్ట్ర ప్రభుత్వ పిటిషన్‌పై సుప్రీంకోర్టు విచారణ జరిపింది. దీనిపై కౌంటర్ దాఖలుకు చంద్రబాబు తరఫు న్యాయవాది హరీష్‌ సాల్వే 4 వారాల సమయం కోరారు. విచారణను ఫిబ్రవరి 9కి వాయిదా వేయాలని విన్నవించారు. ఫిబ్రవరి 9న తనకు మరో పని ఉందని ప్రభుత్వ న్యాయవాది రంజిత్‌కుమార్‌ చెప్పగా.... ఫిబ్రవరి 12న విచారణ చేయాలని హరీష్ సాల్వే విజ్ఞప్తి చేశారు. ఈ మేరకు తదుపరి విచారణను సుప్రీంకోర్టు ఫిబ్రవరి 12వ తేదీకి వాయిదా వేసింది. 

స్కిల్‌ డెవలప్‌మెంట్‌ కేసులో (Skill Development Case) టీడీపీ అధినేత చంద్రబాబుకు (Chandrababu)  అక్టోబర్​ 31న మధ్యంతర బెయిల్‌ మంజూరైంది. అనారోగ్య కారణాలరీత్యా చికిత్స నిమిత్తం మధ్యంతర బెయిలు మంజూరు చేయాలని చంద్రబాబు చంద్రబాబు నాయుడు దాఖలు చేసిన అనుబంధ పిటిషన్‌పై విచారణ జరిపిన హైకోర్టు.. 4 వారాల పాటు మధ్యంతర బెయిల్‌ మంజూరు చేసింది. ఈ సందర్భంగా ఇచ్చిన షరతులపై హైకోర్టు నవంబర్​ 20న స్పష్టత ఇచ్చింది. మధ్యంతర బెయిల్‌ షరతులు ఈ నెల28 వరకే వర్తిస్తాయని పేర్కొంటూ సాధారణ బెయిల్ మంజూరు చేసింది. చంద్రబాబు యథావిధిగా అన్ని కార్యక్రమాలు నిర్వహించుకోవచ్చని, రాజకీయ ర్యాలీలు, సభలు, సమావేశాల్లో పాల్గొనవచ్చని హైకోర్టు స్పష్టం చేసింది.