IPL Betting Gang Arrested : IPL​ బెట్టింగ్​ ముఠా అరెస్ట్​.. రూ.1.84 కోట్లు స్వాధీనం

IPL Betting Gang Arrested in Hyderabad : నగరంలో ఐపీఎల్ మ్యాచ్‌లతో భారీగా బెట్టింగ్‌కు పాల్పడుతున్న ముఠాను సైబరాబాద్‌ పోలీసులు అరెస్టు చేశారు. నిందితుడి నుంచి రూ.కోటీ 84 లక్షల నగదు స్వాధీనం చేసుకున్నారు. నర్సింగ్‌రావు అనే వ్యక్తి యాప్స్‌ ద్వారా బెట్టింగ్​కు పాల్పడుతున్నాడని సైబరాబాద్‌ సీపీ స్టీఫెన్‌ రవీంద్ర తెలిపారు. నర్సింగ్‌రావు సబ్ బుకీ కాగా.. ప్రధాన బుకీ గణపతిరెడ్డి పరారీలో ఉన్నాడని చెప్పారు. నర్సింగ్‌రావు నుంచి రూ.60 లక్షల నగదు సహా మిగతా సొత్తు బ్యాంకుల నుంచి స్వాధీనం చేసుకున్నట్లు వివరించారు. 

ఎస్​వోటీ బాలానగర్ టీం మరో బెట్టింగ్ ముఠాను పట్టుకుందని స్టీఫెన్‌ రవీంద్ర వెల్లడించారు. వినోద్‌కుమార్‌, శ్రీకాంత్‌రెడ్డి నుంచి రూ.ఏడు లక్షలకుపైగా నగదు స్వాధీనం చేసుకున్నామన్నారు. వజ్ర త్రిబుల్ సెవెన్ డాట్ కామ్, వజ్రా ఎక్స్ఛేంజ్​, మెట్రో ఎక్స్ఛేంజ్​, రాధ ఎక్స్ఛేంజ్​, ఫోకస్ బుక్ 247, వర్మ త్రిబుల్ సెవెన్ యాప్​ల ద్వారా ఈ ముఠా బెట్టింగ్​లకు పాల్పడుతున్నట్లు పోలీసులు గుర్తించారు. తెలంగాణలో బెట్టింగ్​లపై నిషేధం అమలులో ఉందని సీపీ తెలిపారు.