బురదలో కూరుకుపోయిన ప్రధాని హెలికాప్టర్.. జేసీబీ సాయంతో..

ప్రధాని నరేంద్ర మోదీ సెక్యూరిటీ హెలికాప్టర్ మట్టిలో కూరుకుపోయింది. ఆర్మీకి చెందిన ఈ చాపర్ బురదలో ఇరుక్కుపోయింది. కర్ణాటకలోని రాయ్​చూర్​లో ఈ ఘటన జరిగింది. రాష్ట్రంలో రెండు రోజులుగా కురుస్తున్న వర్షాలతో హెలికాప్టర్​ దిగాల్సిన హెలిప్యాడ్​ బురదగా మారింది. దీంతో హెలిక్యాప్టర్​ ఓ పక్క మట్టిలో కూరుకుపోయింది. హెలిప్యాడ్​ను హడావుడిగా ఏర్పాటు చేయడం కూడా.. దీనికి ఒక కారణంగా తెలుస్తోంది. చాపర్​ను బయటకు తీసేందుకు సిబ్బంది తీవ్రంగా శ్రమించారు. అందుకోసం ఓ జేసీబీని సైతం వినియోగించారు.

కర్ణాటక అసెంబ్లీ ఎన్నికల సందర్భంగా.. మంగళవారం రాయచూర్ జిల్లా సింధనూర్ తాలుకాలోని హోసహళ్లి ప్రాంతంలో ప్రధాని మోదీ ప్రచారం చేశారు. బీజేపీ అభ్యర్థుల తరపున మోదీ ప్రచారం చేసేందుకు.. హెలికాప్టర్​లో వెళ్లారు. అందుకు సంబంధించిన ప్రణాళికను పార్టీ రూపొందించింది. దీంట్లో భాగంగానే రాయచూర్​, కొప్పాల జిల్లాలో ప్రధాని పర్యటన చేశారు. ప్రధాని సెక్యూరిటీ కోసం వచ్చిన హెలికాప్టర్​.. ఇలా అనుకోకుండా మట్టిలో కూరుకుపోయింది. కర్ణాటకలో మొత్తం 224 అసెంబ్లీ స్థానాలకి మే 10న ఎన్నికలు జరగనున్నాయి. 13న లెక్కింపు జరుగుతుంది.