Young Man Dies With Fits Mancherial Video Viral : మహిళను వేధించాడని అరెస్టు.. ఠాణాలో ఫిట్స్​తో యువకుడి మృతి.. వీడియో వైరల్

Young Man Dies With Fits Mancherial Video Viral : మంచిర్యాల జిల్లా బెల్లంపల్లి పట్టణంలోని టూటౌన్​ పోలీస్ స్టేషన్​లో ఓ యువకుడు ఫిట్స్​తో మృతి చెందడం కలకలం రేపింది. ఓ మహిళను వేధిస్తున్నాడనే కేసులో పోలీసులు అతడిని స్టేషన్​కు తీసుకువచ్చారు. స్టేషన్​లో కుర్చీలో కూర్చొన్న ఆ యువకుడు మొబైల్ ఫోన్​తో ఆడుతూ.. అకస్మాత్తుగా ఫిట్స్ వచ్చి కుప్పకూలాడు. 

Young Man Dies With Fits Mancherial Police Station  : బెల్లంపల్లి పట్టణంలోని రైల్వే స్టేషన్​ ప్రాంతానికి చెందిన అంజి..  ఓ మహిళను వేధిస్తున్నాడనే సమాచారం వచ్చింది. పోలీసులు అతడ్ని ఆదివారం రాత్రి 8 గంటల సమయంలో పోలీస్ స్టేషన్​కు  తరలించారు. స్టేషన్ ఆవరణలోని కుర్చీలో కూర్చోబెట్టారు. అంజి మొబైల్ చూస్తుండగా ఫిట్స్​ వచ్చి ఒక్కసారిగా కింద పడిపోయాడు. గమనించిన పోలీసులు యువకుడిని వెంటనే ఆస్పత్రికి తీసుకెళ్తుండగా, మార్గమధ్యలోనే అతడు మృతి చెందాడు. పోలీసులు అంజి కుటుంబ సభ్యులకు సమాచారం అందించారు. అంజికి ఫిట్స్ వచ్చిన  దృశ్యాలు సీసీ కెమెరాలో రికార్డు అయ్యాయి. ఆ యువకుడు ఫిట్స్​తోనే మృతి చెందినట్లు వైద్యులు నిర్ధారించారని రెండో పట్టణ ఎస్సై రవికుమార్​ స్పష్టం చేశారు. 

అయితే మృతుడి సోదరుడు ఈ ఘటనపై అనుమానం వ్యక్తం చేస్తున్నాడు. పోలీసులే తన సోదరుడి మృతికి బాధ్యత వహించాలని అన్నారు. ఇంతకు ముందు ఫిట్స్ ఎప్పుడు రాలేదని ఇప్పుడు ఎలా ఫిట్స్​తో చనిపోతాడని ప్రశ్నించాడు. తమకు న్యాయం చేయాలని డిమాండ్ చేస్తున్నాడు.  పోలీసులు పోస్టుమార్టం కోసం  మృతదేహాన్ని మంచిర్యాల జిల్లా ఆసుపత్రికి తరలించారు.