తక్కువ ధరకే వస్తున్నాయని ఎక్కడపడితే అక్కడ ఆహార పదార్థాలు కొంటున్నారా? - మీరు రిస్క్​లో పడినట్లే!

హైదరాబాద్​లో కల్తీ పదార్థాలు తయారు చేస్తున్న ముఠా అరెస్ట్ - నగరంలోని 100 హోటళ్లకు కల్తీ అల్లం పేస్ట్‌ - 30 ఛాయ్‌ బండ్లకు నకిలీ టీ పొడి సరఫరా

Adulterated Food Across In Hyderabad : తక్కువ ధరలకు వస్తున్నాయని బజారులో దొరికే అల్లం పేస్ట్, కారం కొంటున్నారా! టీ బాగుంది కదా అని ఎక్కడ పడితే అక్కడ తాగుతున్నారా! అయితే మీరు ఓ సారి ఆలోచించాల్సిందే. హైదరాబాద్​లో కల్తీ పదార్థాలు తయారు చేస్తున్న ముఠాల వ్యాపారాలు వీధివీధినా విస్తరించాయి. నివాసాల మధ్య కుటీర పరిశ్రమల ముసుగులో కల్తీ దందా చేస్తున్నారు. మార్కెటింగ్ ఎగ్జిక్యూటివ్​లు, మేనేజర్లను పెట్టుకొని కల్తీ పదార్థాలు అమ్ముకుంటూ ప్రజల ఆరోగ్యాలతో చెలగాటమాడుతున్నారు. ఇటీవలె పోలీసుల తనిఖీల్లో భారీ ఎత్తున కల్తీ పేస్ట్, టీ పొడి, మిరపకారం, పాల పదార్థాలను స్వాధీనం చేసుకున్నారు. ప్రజారోగ్యాన్ని దెబ్బతీస్తున్న కల్తీ రాయుళ్లపై పోలీసులు చేపట్టిన దర్యాప్తులో ఆశ్చర్యపరిచే విషయాలు వెలుగు చూస్తున్నాయి. ప్రజలకు నిత్యం అవసరమయ్యే ఆహార పదార్థాలను కల్తీ చేసి ప్రముఖ బ్రాండ్ల పేరుతో భారీ ఎత్తున సరఫరా చేస్తున్నట్లు అధికారులు గుర్తించారు.

హైదరాబాద్​ బిర్యానీ కల్తీ : హైదారాబాద్​లో బిర్యానీ అంటే ఫేమస్. తోపుడు బండ్ల నుంచి ప్రముఖ హోటళ్ల వరకు మాంసాహార వంటకాలదే హవా. వీకెండ్ వచ్చిందంటే చాలు బయటకు వెళ్లి బిర్యానీ రుచి చూడటం సాధారణం. తాజాగా సికింద్రాబాద్ ఓల్డ్ బోయిన్​పల్లిలో యాసిడ్ ఉపయోగించి కల్తీ అల్లం పేస్ట్ తయారు చేస్తున్న కేంద్రంపై పోలీసులు దాడులు చేసి 8 మందిని అరెస్ట్ చేశారు. ఇక్కడ ఆరోగ్యానికి హానికలిగించే రసాయనాలతో దీన్ని తయారుచేస్తున్నట్లు నిర్ధారించారు.

రోజూ 1500 కిలోల కల్తీ అల్లం పేస్ట్ తయారు చేసి పలు హోటళ్లకు, దుకాణాలకు తక్కువ ధరకు సరఫరా చేస్తున్నట్లు గుర్తించారు. వీటిలో కొన్ని సూపర్ మార్కెట్లు, 20కు పైగా ప్రముఖ హోటళ్లు ఉండటం ఆందోళన కలిగిస్తోంది. పాతబస్తీ, పహడీషరీఫ్, కాటేదాన్, మైలార్​దేవ్ పల్లి, సికింద్రాబాద్, అత్తాపూర్, ఆసిఫ్​నగర్ పరిసర ప్రాంతాల్లో 60కు పైగా కల్తీ పదార్థాల స్థావరాలు ఉన్నట్లు పోలీసుల సమాచారం.

అక్కడ తయారుచేస్తున్న నూనెలు, టీపొడి, అల్లం పేస్ట్​లకు ప్రముఖ బ్రాండ్ల స్టిక్కర్లు అతికించి ప్యాకింగ్ చేసి మార్కెట్లో తక్కువ ధరకు అమ్ముతున్నారు. ఇటీవలె టాస్క్‌ఫోర్స్‌ పోలీసులు 500 కిలోల కల్తీ టీపొడి స్వాధీనం చేసుకున్నారు. ఈ ముఠా ప్రతిరోజూ నగరంలో 30కు పైగా ఛాయ్‌ బండ్లకు కల్తీ సరకు సరఫరా చేస్తున్నట్టు నిర్ధారించారు. ఆయా హోటళ్ల వివరాలను జీహెచ్‌ఎంసీ అధికారులకు అందజేసినట్టు సమాచారం.