How to Make Vankaya Gujju Kura : చాలా మందికి ఇష్టమైన కూరగాయలలో వంకాయ కూడా ఒకటి. కానీ, కొంతమంది గుత్తివంకాయ మసాలా కర్రీనే ఎంతో ఇష్టంగా తింటారు. అయితే.. ఎప్పుడూ గుత్తివంకాయ వండడం వీలుకాదు. ఎందుకంటే ఈ రెసిపీ చేయడానికి కాస్త ఎక్కువ టైమ్ పడుతుంది. అంత టైమ్ లేనప్పుడు.. ఈ విధంగా "వంకాయ గుజ్జు కూర" చేయండి. ఇలా చేస్తే అన్నం ఒక్క మెతుకు మిగల్చకుండా పూర్తిగా తింటారు. ఈ రెసిపీ వేడివేడి అన్నంతో పాటు, చపాతీల్లోకి రుచి అద్భుతంగా ఉంటుంది. మరి సింపుల్గా వంకాయ గుజ్జు కూర ఎలా చేయాలో ఇప్పుడు చూద్దాం.
కావాల్సిన పదార్థాలు :
- లేత వంకాయలు-పావు కేజీ
- టమాటాలు-2
- ఉల్లిపాయలు-2
- పచ్చిమిర్చి-3
- ఇంగువ-రెండు చిటికెలు
- ఉప్పు-రుచికి సరిపడా
- కారం-రుచికి సరిపడా
- నూనె
- ఉసిరికాయ సైజంత-చింతపండు
- పసుపు-పావు టీస్పూన్
- ధనియాలపొడి-టీస్పూన్
- జీలకర్రపొడి-పావు టీస్పూన్
తాలింపు కోసం :
- నూనె - 2 టేబుల్స్పూన్లు
- మెంతులు-2 చిటికెలు
- ఆవాలు - అర టీస్పూన్
- జీలకర్ర - అర టీస్పూన్
- మినప్పప్పు- అర టీస్పూన్
- శనగపప్పు- అర టీస్పూన్
- వెల్లుల్లి రెబ్బలు-5
- ఎండుమిర్చి - 3
- కరివేపాకు- 2 రెమ్మలు
తయారీ విధానం :
- ముందుగా వంకాయలు, టమాటాలు, ఉల్లిపాయలను శుభ్రంగా నీటిలో కడుక్కోవాలి.
- ఆ తర్వాత వంకాయలపైనున్న తొడిమ తీసేసి ముక్కలుగా కట్ చేసుకోవాలి. (ఈ రెసిపీకి వంకాయ తొడిమ ఉండకూడదు.)
- ఈ ముక్కలను ఉప్పు నీటిలో వేసుకోండి. అవి రంగు మారకుండా ఉంటాయి. అలాగే ఉల్లిపాయ, టమాటాలను సన్నగా కట్ చేసుకోవాలి.
- చింతపండు నీటిలో నానబెట్టుకోండి.
- ఇప్పుడు స్టౌపై పాన్ పెట్టండి. టేబుల్స్పూన్ ఆయిల్ వేసి వేడి చేయండి. ఆపై ఇంగువ వేయండి. అది వేగిన తర్వాత.. వంకాయ ముక్కలు, ఆనియన్స్ ముక్కలు వేసి ఫ్రై చేయండి.
- ఇప్పుడు పసుపు, కొద్దిగా ఉప్పు వేసి 5 నిమిషాలు మగ్గించుకోండి.
- తర్వాత టమాటా ముక్కలు వేసి కలపండి. స్టౌ మీడియం ఫ్లేమ్లో ఉంచి కాయగూరలను 10 నిమిషాలు మగ్గించుకోండి.
- ఇప్పుడు స్టౌ ఆఫ్ చేసి, వీటిని చల్లారనివ్వండి.
- ఆపై మిక్సీ గిన్నెలో వేసుకుని కాస్త బరకగా గ్రైండ్ చేసుకోండి.
- ఇప్పుడు కూర తాలింపు పెట్టడం కోసం స్టౌపై గిన్నె పెట్టండి. ఇందులో 2 టేబుల్స్పూన్ల ఆయిల్ వేసి వేడి చేయండి.
- నూనె వేడయ్యాక మెంతులు వేసి ఎర్రగా వేపుకోండి. ఆపై ఆవాలు, జీలకర్ర, మినప్పప్పు, శనగపప్పు వేసి ఫ్రై చేసుకోండి.
- అలాగే కచ్చాపచ్చాగా చేసిన వెల్లుల్లి, కరివేపాకులు, పచ్చిమిర్చి, ఎండుమిర్చి వేసి వేపండి. వెల్లుల్లి బాగా వేగిన తర్వాత గ్రైండ్ చేసుకున్న వంకాయ కూర వేసి కలుపుకోండి.
- కూరలో తాలింపు కలిసిన తర్వాత.. కారం, ధనియాలపొడి, జీలకర్రపొడి వేసుకుని బాగా కలుపుకోండి. ఆపై చింతపండు రసం పోసుకుని మిక్స్ చేయండి.
- ఇందులోనే రుచికి సరిపడా ఉప్పు వేసుకుని కలుపుకోండి. గ్రేవీ చిక్కగా ఉంటే కొన్ని నీళ్లను పోసుకుని కలుపుకోండి.
- పైన ఆయిల్ సెపరేట్ అయిన తర్వాత.. కొద్దిగా కొత్తిమీర తరుగు చల్లి స్టౌ ఆఫ్ చేయండి.
- అంతే ఇలా సింపుల్గా చేసుకుంటే ఎంతో టేస్టీగా ఉండే వంకాయ గుజ్జు కూర రెడీ. నచ్చితే ఈ విధంగా ఓసారి కర్రీ ఇలా ట్రై చేయండి.
ఇవి కూడా చదవండి :
లఖ్నవూ స్పెషల్ "మలై గుత్తొంకాయ కుర్మా" - ఒక్కసారి టేస్ట్ చేశారంటే జిందగీ ఖుష్ అయిపోతుంది!
గుత్తి వంకాయతో ఘుమఘమలాడే దమ్ బిర్యానీ - ఒక్కసారైనా తిని తీరాల్సిందే గురూ! - ఇలా ప్రిపేర్ చేయండి
