IT Employees Protest TDP Chief Chandrababu Arrest : చంద్రబాబు అరెస్టుకు నిరసనగా హైదరాబాద్​లో ఐటీ ఉద్యోగుల ఆందోళన

IT Employees Protest TDP Chief Chandrababu Arrest : స్కిల్ డెవలప్​మెంట్ కేసులో టీడీపీ జాతీయ అధ్యక్షుడు చంద్రబాబు నాయుడు అక్రమ అరెస్టుకు నిరసనగా ఇవాళ సాప్ట్ వేర్​ ఉద్యోగులు ఆందోళనకు దిగారు. రాజకీయ కక్షతోనే ఆంధ్రప్రదేశ్ మాజీ ముఖ్యమంత్రిని అర్థరాత్రి అరెస్ట్ చేశారంటూ హైదరాబాద్ గచ్చిబౌలిలోని విప్రో సర్కిల్ వద్ద ఐటీ ఉద్యోగులు భారీ నిరసన చేపట్టారు. 'అయామ్ విత్ సీబీఎన్' ప్లకార్డులతో ఉద్యోగులు ధర్నా చేపట్టారు. విప్రో సర్కిల్​లో జరిగిన ఈ నిరసనలో వేలాది మంది ఐటీ ఉద్యోగులు పాల్గొన్నారు. 'సైకో పోవాలి - సైకిల్ రావాలి' అంటూ సాఫ్ట్​వేర్ ఉద్యోగులు నినాదాలు చేశారు. వెంటనే చంద్రబాబునాయుడుపై అక్రమ కేసులు ఉపసంహరించుకోని.. ఆయనను విడుదల చేయాలని వారంతా డిమాండ్ చేశారు. ఈ నిరసనతో విప్రో జంక్షన్​లో ట్రాఫిక్ జాం ఏర్పడింది. సైబరాబాద్​ ట్రాఫిక్ పోలీసులు వాహనాలు నిలిచిపోకుండా చర్చలు చేపట్టారు. దీంతో ఎక్కడికక్కడ వాహనాలు రోడ్లపై నిలిచిపోయాయి.