Friends Win Lottery In Punjab : స్నేహితులను వరించిన అదృష్టం.. లాటరీలో రూ.కోటిన్నర జాక్​పాట్

Friends Win Lottery In Punjab : పంజాబ్​.. ఫాజిల్కా జిల్లాలో ఇద్దరు స్నేహితులు రాత్రికి రాత్రే కోటీశ్వరులు అయిపోయారు. పార్టనర్​షిప్​లో రూ.100కు లాటరీ టికెట్ కొని.. రూ.కోటిన్నర బంపర్​ ప్రైజ్​మనీని గెలుచుకున్నారు. లాటరీ విక్రయ కేంద్రం వద్ద బ్యాండు వాయిద్యాలకు డ్యాన్స్​ చేస్తూ తమ ఆనందాన్ని వ్యక్తం చేశారు.  

ఇదీ జరిగింది.. జిల్లాలోని అబోహర్ టౌన్​కు చెందిన రమేశ్​, కుకీ స్నేహితులు. వీరిద్దరూ పార్టనర్​షిప్​లో గత కొన్నేళ్లుగా లాటరీ టికెట్లు కొనుగోలు చేస్తున్నారు. చాలా సార్లు చిన్న చిన్న బహుమతులు గెలుచుకున్నారు. అయితే ఇటీవల రెండు రూ.100 టికెట్లు పార్టనర్​షిప్​లోనే కొనుగోలు చేశారు. లాటరీ ఫలితాలు ఆదివారం రాత్రి విడుదల కాగా.. ఓ టికెట్​కు రూ.కోటిన్నర లాటరీ తగిలింది. దీంతో రాత్రికి రాత్రే కోటీశ్వరులు అయిపోయారు. దీంతో పొద్దున్నే ఘంటాఘర్​ చౌరస్తాలోని జ్ఞాన్​చంద్​ లాటరీ విక్రయం కేంద్రం వద్దకు బ్యాండుతో వచ్చారు. బ్యాండు దరువుకు డ్యాన్స్​ చేస్తూ కోలాహలం చేశారు. అయితే ఈ లాటరీ డబ్బును తమ పిల్లల కోసం, కొన్ని ఆధ్యాత్మిక కార్యక్రమాలకు ఖర్చుచేస్తామని రమేశ్​, కుకీ తెలిపారు.