Forstens Cat Snake Viral Video : ఇంట్లోని టేబుల్​పై అరుదైన పాము.. అచ్చం పిల్లి కళ్లులానే!.. వీడియో చూశారా?

Forstens Cat Snake Viral Video : దేశంలో అనేక రకాల పాములు ఉన్నప్పటికీ.. కొన్ని మాత్రమే ప్రజలకు కనిపిస్తుంటాయి. మరికొన్ని దట్టమైన అడవుల్లో ఉంటాయి. అలాంటి వాటిలో ఓ అరుదైన పాము.. కర్ణాటకలోని దక్షిణ కన్నడ జిల్లాలో ప్రత్యక్షమైంది. జిల్లాలోని పుత్తూరు బల్నాడుకు చెందిన రవికృష్ణ కల్లాజే ఇంట్లోని టేబుల్​పై 'ఫోర్స్​టెన్స్​ క్యాట్​ స్నేక్​' పాము పాకింది.

రవికృష్ణ కల్లాజే.. గురువారం ఏదో పని చేసుకుంటూ తన టేబుల్​వైపు చూశాడు. అదే సమయంలో పసుపు రంగులో ఉన్న పామును గుర్తించాడు. వెంటనే స్థానికులకు విషయం తెలియడం వల్ల అంతా చూసేందుకు వచ్చారు. అది 'ఫోర్స్​టెన్స్​ క్యాట్​ స్నేక్​' పాముగా గుర్తించారు. అదే గ్రామానికి చెందిన స్నేక్​ క్యాచర్ తేజస్ బన్నూరు.. విషయం తెలుసుకుని రవికృష్ణ ఇంటికి చేరుకున్నాడు. అరుదైన పామును రక్షించి అడవుల్లో విడిచిపెట్టాడు. ఫోర్స్​టెన్స్​ క్యాట్​ స్నేక్ అరుదుగా కనిపిస్తుంటుందని తెలిపాడు. ఇప్పటి వరకు తాను పది వేలకు పైగా పాములను రక్షించినట్లు పేర్కొన్నాడు.  

పశ్చిమ కనుమల వంటి దట్టమైన అడవుల్లో ఈ పాము అరుదుగా కనిపిస్తుందని స్థానికులు చెబుతున్నారు. ఈ పాము కళ్లు.. పిల్లి కళ్లులానే ఉండడం వల్ల ఫోర్స్​టెన్స్​ క్యాట్​ స్నేక్ అని పేరు వచ్చినట్లు చెప్పారు. అయితే ఈ పాము కాటు వేయడం వల్ల ఎలాంటి ప్రాణ హాని ఉండదని తెలిపారు.