Delhi Jewellery Shop Robbery Viral Video : గన్​లతో బెదిరించి జ్యువెలరీ షాప్​లో చోరీ.. ఇటీవలే జైలు నుంచి వచ్చి..

Delhi Jewellery Shop Robbery Viral Video : దిల్లీ.. కరవాల్ నగర్‌లోని జ్యువెలరీ షాప్‌లో దొంగతనం కలకలం రేపింది. గన్‌లతో దుకాణంలోకి ప్రవేశించిన ముగ్గురు దుండగులు.. సిబ్బందిని బెదిరించి ఈ చోరీకి పాల్పడ్డారు. హెల్మెట్లు ధరించి మరీ దొంగతనం చేశారు. అయితే దుండగుల్లో ఇద్దరు ద్విచక్ర వాహనంపై పరారవ్వగా.. మరో వ్యక్తిని జ్యువెలరీ షాపు సిబ్బంది పట్టుకున్నారు. సిబ్బంది పట్టుకున్న నిందితుడిని ఫైజన్​గా పోలీసులు గుర్తించారు. అతడిపై ఇప్పటికే నాలుగు కేసులున్నాయని పోలీసులు తెలిపారు. ఇటీవలే జైలు నుంచి బయటకు వచ్చిన ఫైజన్‌.. మళ్లీ దొంగతనం చేశాడని వెల్లడించారు. ఫైజన్​ నుంచి ఒక పిస్టల్​, 4 రౌండ్ల బుల్లెట్లు స్వాధీనం చేసుకున్నట్లు చెప్పారు. ఈ ఘటన అక్టోబరు 31వ తేదీన జరిగినట్లు తెలిపారు.

కొన్నిరోజుల క్రితం ఇలాంటి ఘటనే దేశ రాజధానిలోనే జరిగింది. తుపాకీతో బెదిరించి బంగారం దుకాణంలో రూ. 50 లక్షల విలువైన బంగారాన్ని ఎత్తుకెళ్లారు దొంగలు. సమయ్​పుర్​ బాదలి పరిధిలోని శ్రీరామ్​ జువెల్లర్స్​ షాపులో ముగ్గురు దొంగలు హెల్మెట్లు ధరించి ప్రవేశించి చోరీకి పాల్పడ్డారు. దుకాణ సిబ్బంది, కొనుగోలుదారులు అందరూ చూస్తుండగా.. నిమిషాల్లోనే బంగారు ఆభరణాలను దోచుకెళ్లారు. ఈ షాపులో దొంగతనం చేసిన తర్వాత మరో దుకాణంలోకి ప్రవేశించి.. 800 గ్రాముల బంగారాన్ని దొంగిలించారు. అందుకు సంబంధించిన వీడియో చూసేందుకు ఇక్కడ క్లిక్ చేయండి.