Bhatti Vikramarka about YS Rajasekhar Reddy : వైఎస్సార్ మాట తప్పని మహా నాయకుడు: భట్టి విక్రమార్క

Bhatti Vikramarka about YS Rajasekhar Reddy : దివంగత మాజీ ముఖ్యమంత్రి డాక్టర్‌ వైఎస్​ రాజశేఖర్‌ రెడ్డి రైతు పక్షపాతి అని సీఎల్పీ నేత భట్టి విక్రమార్క కొనియాడారు. వైఎస్ రాజశేఖర్​ రెడ్డి వర్ధంతి సందర్భంగా రాష్ట్రవ్యాప్తంగా కాంగ్రెస్​ పార్టీ నాయకులు నివాళులర్పించారు. ఈ మేరకు హైదరాబాద్​లోని గాంధీభవన్​లో కాంగ్రెస్​ ప్రముఖ నాయకులు సమావేశాన్ని ఏర్పాటు చేశారు. ఈ సందర్భంగా  భట్టి విక్రమార్క(Bhatti Vikramarka) మాట్లాడుతూ.. బీఆర్​ఎస్​ ప్రభుత్వం ఉచిత కరెంట్ ఇస్తుందని ప్రచారం చేసుకుంటుందని.. కాని దానికి పేటెంట్​ హక్కు వైఎస్​ఆర్​దేనని గుర్తు చేశారు. ఉమ్మడి ఆంధ్రప్రదేశ్​కు ఎన్నో సేవలు చేశారని తెలిపారు. 

YS Rajasekhar Reddy Death Anniversary Telangana : విద్యార్థుల కోసం ఫీజు రీయింబర్స్​మెంట్​, ప్రజలకు వైద్య సదుపాయం అందించేందుకు ఆ రోజుల్లోనే ఆరోగ్య శ్రీ తీసుకువచ్చారని అన్నారు. వాటన్నింటికీ పేటెంట్​ హక్కు వైఎస్​ఆర్​దేనని పేర్కొన్నారు. వాటితో పాటు ముస్లింల కోసం 4 శాతం రిజర్వేషన్​, మహిళలకు పావలా వడ్డీ, రైతుల కోసం రుణమాఫీ పథకాలు తెచ్చిన ఘనత ఆయనదేనని కొనియాడారు. మాట తప్పని మహానాయకుడని వ్యాఖ్యానించారు. ఆయన ప్రభుత్వంలో ఎన్నో గొప్ప గొప్ప పనులు చేశారని.. వాటిని తలచుకుంటే మంచి అనుభూతిని ఇస్తోందని హర్షం వ్యక్తం చేశారు.