ఈ నెల 29, 30న 'ఛలో దిల్లీ' - పార్లమెంట్​ ముందు బీసీ నాయకుల ధర్నా : ఆర్​.కృష్ణయ్య

BC protest at Delhi : పార్లమెంటులో బీసీ బిల్లు పెట్టాలని, జనగణన, కులగణన చేయాలని, బీసీ ఉద్యోగులకు పదోన్నతుల్లో రిజర్వేషన్లు కల్పించాలని డిమాండ్​ చేస్తూ ఈ నెల 29, 30న 'ఛలో దిల్లీ' పేరిట పార్లమెంట్​ ముందు ధర్నా నిర్వహిస్తున్నట్లు రాజ్యసభ సభ్యులు ఆర్​.కృష్ణయ్య తెలిపారు. ఛలో దిల్లీ ఆందోళన కార్యక్రమంలో తెలంగాణతో సహా ఆంధ్రప్రదేశ్​​, తమిళనాడు, కర్ణాటక రాష్ట్రాల నుంచి బీసీ నాయకులు పెద్ద ఎత్తున పాల్గొంటారని తెలిపారు. హైదరాబాద్ బషీర్​బాగ్ ప్రెస్ క్లబ్​లో 14 బీసీ సంఘాలు నిర్వహించిన సమావేశంలో ఆర్.కృష్ణయ్య పాల్గొన్నారు.  

ఈ సందర్భంగా బీసీ సంక్షేమ సంఘం జాతీయ అధ్యక్షుడు, రాజ్యసభ సభ్యులు ఆర్​.కృష్ణయ్య మాట్లాడారు. పార్లమెంటులో బీసీ బిల్లు పెట్టాలని గత 30 ఏళ్లుగా దిల్లీలో 102 సార్లు ధర్నా చేశామని గుర్తు చేశారు. 66 సార్లు బీసీ బిల్లుపై బీసీ నాయకులు ప్రధాన మంత్రులతో చర్చలు జరిపినట్లు తెలిపారు. వచ్చే పార్లమెంట్ ఎన్నికల్లో ఏ రాజకీయ పార్టీ బీసీ కులగణన చేపట్టి, బీసీ బిల్లు పెడతామని ప్రకటిస్తుందో ఆ పార్టీకే బీసీలు మద్దతు ఇస్తారని ఆయన అన్నారు. కేంద్ర విద్య, ఉద్యోగ రిజర్వేషన్లు బీసీల జనాభా ప్రకారం 27 శాతం నుంచి 56 శాతానికి పెంచాలంటూ డిమాండ్​ చేశారు. ఈ క్రమంలో బీసీ సంక్షేమ సంఘం రాష్ట్ర ప్రధాన కార్యదర్శిగా శృతిలయ ఆర్ట్స్ అకాడమీ అధ్యక్షురాలు అమనిని ఆర్.కృష్ణయ్య ప్రకటించారు.