నన్ను ఆపడానికి ఇంకా ఎవరూ పుట్టలేదు - పోలీసులపై అక్బరుద్దీన్​ ఒవైసీ ఫైర్​

Akbaruddin Owaisi Fires on Police Viral Video : హైదరాబాద్ పాతబస్తీలో ఎంఐఎం ఎమ్మెల్యే అభ్యర్థి అక్బరుద్దీన్ ఒవైసీ పోలీసులకు మాస్ వార్నింగ్ ఇచ్చారు. ప్రచార సమయం ముగిసిందని.. ఆపి వేయాలని పోలీసులు కోరగా.. వారిపై తీవ్రస్థాయిలో ధ్వజమెత్తారు. చాంద్రాయణగుట్ట నియోజకవర్గం సంతోశ్​నగర్‌ పీఎస్‌ పరిధిలో గత రాత్రి 10 గంటల సమయం దాటినా ఎన్నికల ప్రచారం చేస్తున్నారన్న సమాచారంతో స్థానిక పోలీసులు అక్కడికి చేరుకున్నారు.

ప్రచార సమయం ముగిసిందని.. ప్రసంగాన్ని ముగించాలని సంతోశ్​నగర్‌ ఇన్‌స్పెక్టర్‌ శివచంద్ర అక్బరుద్దీన్‌ ఒవైసీకి సూచించారు. దీంతో ఒక్కసారిగా ఆగ్రహంతో ఊగిపోయిన ఆయన.. తన వద్ద కూడా చేతి గడియారం ఉందని.. ప్రచార సమయానికి ఇంకా ఐదు నిమిషాలు ఉందని తెలిపారు. ముందే ప్రచారాన్ని ఎలా ఆపుతారంటూ ఇన్‌స్పెక్టర్​పై చిందులు తొక్కారు. తనను ఆపడానికి ఇంకా ఎవరూ పుట్టలేదంటూ స్టేజ్‌ మీద నుంచే పోలీసులను హెచ్చరించారు.

ఇందుకు సంబంధించిన వీడియో సామాజిక మాధ్యమాల్లో వైరల్​గా మారగా.. బీజేపీ స్పందించింది. తమ ప్రభుత్వం అధికారంలోకి రాగానే ఇలాంటి వారికి బుల్డోజర్​ రియాక్షన్​ తప్పదని హెచ్చరించింది. ఈ మేరకు అక్బరుద్దీన్​ వీడియోను తమ ఎక్స్​ (ట్విటర్) ఖాతాలో పోస్టు చేసింది.