కాంగ్రెస్‌ కండువా కప్పుకున్న విజయశాంతి - ఖర్గే సమక్షంలో హస్తం పార్టీలో చేరిక

Actor-Politician Vijayasanthi Joins Congress Party : తెలంగాణలో కాంగ్రెస్‌ గాలి వీస్తున్న వేళ.. నటి, బీజేపీ నాయకురాలు విజయశాంతి కాంగ్రెస్‌ తీర్థం పుచ్చుకున్నారు. ఆమెతో పాటు బీఆర్‌ఎస్‌ మాజీ ఎంపీ, దిల్లీ రాష్ట్ర ప్రభుత్వ ప్రతినిధి మంథా జగన్నాథం హస్తం పార్టీలో చేరారు. తాజ్‌ కృష్ణ హోటల్‌లో విజయశాంతి ఖర్గేను కలిశారు. కర్ణాటక మంత్రి బోసురాజు, రాష్ట్ర వ్యవహారాల ఇంఛార్జీ మాణిక్‌ రావు ఠాక్రేలు ఆమెను ఖర్గేకు పరిచయం చేశారు. అనంతరం ఆమె మెడలో పార్టీ కండువా కప్పి ఖర్గే విజయశాంతిని కాంగ్రెస్‌లోకి ఆహ్వానించారు. 

Vijayasanthi Returns to Congress : విజయశాంతి గత కొన్ని రోజులుగా బీజేపీలో తీవ్ర అసంతృప్తితో ఉన్నారు. కేంద్రమంత్రి కిషన్​ రెడ్డి పార్టీ అధ్యక్ష పదవి చేపట్టిన నాటి నుంచి ఆమె పార్టీ కార్యకలాపాలకు దూరంగా ఉంటున్నారు. ఈ నేపథ్యంలో ఆమె పార్టీని వీడతారని ప్రచారం జరిగింది. ఇటీవలే ఆమె బీజేపీకి రాజీనామా చేశారు. రాహుల్‌ గాంధీ సమక్షంలో కాంగ్రెస్‌ పార్టీలో చేరతారని ప్రచారం జరిగింది. ఏఐసీసీ అధ్యక్షుడు మేనిఫెస్టో విడుదల నిమిత్తం హైదరాబాద్‌ రావడంతో ఖర్గే సమక్షంలో ఆమె కాంగ్రెస్‌ కండువా కప్పుకున్నారు. కాంగ్రెస్‌ అభయ హస్తం మేనిఫెస్టో విడుదల సందర్భంగా మంథా జగన్నాథం గాంధీభవన్‌ వచ్చారు. ఏఐసీసీ అధ్యక్షుడు మల్లిఖార్జున ఖర్గే ఆయనకు పార్టీ కండువా కప్పి కాంగ్రెస్‌లోకి ఆహ్వానించారు.