Yadadri Temple Reopening: ఎప్పుడెప్పుడా అని ఎదురుచూస్తున్న యాదాద్రి శ్రీలక్ష్మీనరసింహ స్వామి.. స్వయంభువుల దర్శనానికి భక్తులకు సమయం ఆసన్నం అవుతోంది. ఈనెల 21న మహాసంప్రోక్షణతో ఈ చారిత్రక ఘట్టానికి యాడా అధికారులు శ్రీకారం చుట్టనున్నారు. యాదాద్రి శ్రీ లక్ష్మీనరసింహస్వామి మహాకుంభ సంప్రోక్షణలో భాగంగా సోమవారం ప్రారంభం కానున్న అంకురార్పణకు పంచనారసింహుల సన్నిధి సర్వాంగ సుందరంగా ముస్తాబవుతోంది. బాలాలయంలో వారంపాటు జరగనున్న పంచకుండాత్మక మహాయాగం కోసం కుండాలు ఏర్పటయ్యాయి. నలువైపులా ప్రవేశ ద్వారాలను శనివారం ఏర్పాటు చేశారు. పంచనారసింహుల గర్భాలయంలో నీటితో శుద్ధి పర్వాలు నిర్వహించారు.
వివిధ వైష్ణవ క్షేత్రాల నుంచి 108 మంది పారాయణికులు, వేదపండితులు ఆదివారం సాయంత్రానికి ఇక్కడికి చేరుకోనున్నారు. కొండపైకి వచ్చి వెళ్లేందుకు కనుమ రహదారుల విస్తరణ పనులను వేగవంతం చేశారు. కొండ కింద ఆలయ వనరులు, గండి చెరువు, వీవీఐపీల అతిథి గృహాలకు వెళ్లే మార్గంలో నిర్మిస్తున్న పైవంతెన పనులు తుది దశలో ఉన్నాయి. క్షేత్రానికి నిరంతరం విద్యుత్తు సరఫరా అందించాలని ట్రాన్స్‌కో అధికారులను కలెక్టర్‌ పమేలా సత్పతి ఆదేశించారు. ప్రధానాలయంలోని అష్టభుజ మండప ప్రాకారాలు బంగారు వర్ణంలో మెరిసిపోయేందుకు అవసరమైన విద్యుదీకరణ ఏర్పాట్లను యాదాద్రి ఆలయ ప్రాధికార సంస్థ (వైటీడీఏ) పూర్తి చేసింది. స్వామివారి తెప్పోత్సవం జరిపే గండిచెరువుకు మల్లన్నసాగర్‌ నుంచి శనివారం గోదావరి జలాలు విడుదల కాగా.. ఆదివారం సాయంత్రానికి ఇక్కడకు చేరనున్నాయని సంబంధిత వర్గాల ద్వారా తెలిసింది.
అధర్వణ వేదం ఆధారంగా యాగం
బాలాలయంలో.. జ్వాలా, యోగానంద, గండభేరుండ లక్ష్మీనరసింహస్వామి పేరిట మండపంలో.. తూర్పు వైపు రుగ్వేదం ద్వారా.. దక్షిణాదిన యజుర్వేదం.. పశ్చిమదిశలో సామవేద.. ఉత్తర ముఖంగా కుండం ఏర్పరిచి.. అధర్వణ వేదం ఆధారంగా యాగాన్ని కొనసాగిస్తారు. ఈశాన్యంలో ఏర్పాటైన మహాలక్ష్మీ కుండంతో.. పంచకుండాత్మక సంపూర్ణ మహాయాగం కొనసాగనుందని పండితులు తెలిపారు. ఇప్పటికే అవసరమైన ద్రవ్యాలన్నింటినీ సమీకరిస్తున్నారు. స్వచ్ఛమైన ఆవు నెయ్యిని తెప్పించామని ఆలయ ఈవో గీతారెడ్డి వెల్లడించారు.
మరో 8 నెలల పాటు బంగారం తాపడం పనులు
పునర్నిర్మితమైన పంచనారసింహుల ఆలయ ఉద్ఘాటనకు నిర్వహించే మహా సంప్రోక్షణ పర్వంలో పాల్గొనే.. వీవీఐపీలకు దేవస్థానం అందించనున్న ప్రత్యేక జ్ఞాపికలను సేకరిస్తున్నారు. ఇప్పటికే ఆలయ సన్నిధిని శుద్ధి చేశారు. ప్రధానాలయ గోపురాలతో పాటు అష్టభుజి మండప ప్రాకారాలు, మాడవీధులనూ శుభ్రం చేశారు. స్వర్ణ తాపడం పనుల్లో భాగంగా ముందుగా ఆలయ విమానానికి రాగి తొడుగులను అమర్చి పరిశీలించారు. బంగారం తాపడం పనులు.. మరో 8 నెలల పాటు కొనసాగనుందని.. ఈవో గీతారెడ్డి తెలిపారు.
భక్తులకు జియో ట్యాగింగ్‌
ఈ నెల 28న ఉదయం మినహా.. స్వామి వారి దర్శనాలు కొనసాగనున్నాయి. 28 మధ్యాహ్నం నుంచి మూలవిరాట్‌ దర్శనాలు కల్పిస్తారు. తిరమల తరహాలో జియో ట్యాగింగ్‌తో భక్తుల రద్దీని క్రమబద్ధీకరిస్తామని యాడా అధికారులు వెల్లడించారు.
అధికారులతో సమన్వయ సమావేశం
సంప్రోక్షణ మహాక్రతువు విజయవంతానికి రాచకొండ పోలీసు కమిషనర్‌ మహేశ్‌ భగవత్‌, యాదాద్రి భువనగిరి జిల్లా కలెక్టర్‌ పమేలా సత్పతి, ఈవో గీతల ఆధ్వర్యంలో శనివారం యాదాద్రిలో పోలీసు, రెవెన్యూ, ఆరోగ్య, ఆర్‌డబ్ల్యూఎస్‌, రహదారులు, భవనాల శాఖ అధికారులతో సమన్వయ సమావేశం నిర్వహించారు. ఏర్పాట్లపై దిశానిర్దేశం చేశారు. వేడుకలకు వచ్చే ముఖ్యులు, ట్రాఫిక్‌ నియంత్రణ, పార్కింగ్‌, షీ టీమ్స్‌, ప్రధానాలయంలో భక్తులను దర్శన వరుసల సముదాయం వద్ద తనిఖీ చేయడానికి అవసరమైన సిబ్బందిపై చర్చించారు. ప్రధానాలయ భద్రతను పర్యవేక్షించే ప్రత్యేక భద్రతా విభాగం (ఎస్‌పీఎఫ్‌)తో రాచకొండ సీపీ శనివారం క్షేత్రంలో సమీక్షించారు. రెండు వేల మందితో భద్రతా ఏర్పాట్లు చేయనున్నట్లు సంబంధిత వర్గాలు వెల్లడించాయి. ఇప్పటికే క్షేత్రంలో 85 సీసీ కెమెరాలు ఉండగా.. కొత్తగా మరో 150 ఏర్పాటు చేస్తున్నట్లు సీపీ తెలిపారు. వీటన్నింటినీ ఒక కమాండ్‌ కంట్రోల్‌ రూమ్‌ నుంచి నిరంతరం నియంత్రించనున్నారు.
ధ్వజస్తంభం.. స్వర్ణమయం
ధ్వజస్తంభం.. స్వర్ణమయం
యాదాద్రి పంచనారసింహుల ఆలయ ధ్వజస్తంభం స్వర్ణమయమై కనువిందు చేస్తోంది. దేవస్థానానికి చెందిన 1785 గ్రాముల బంగారంతో చెన్నైలోని స్మార్ట్‌ క్రియేషన్స్‌ వారితో తయారు చేయించిన కవచాలను ధ్వజస్తంభానికి బిగించారు. కొద్దిరోజులుగా కొనసాగుతున్న ఈ పనులను శనివారం పూర్తి చేశారు. సంప్రోక్షణకు సంప్రదాయ హంగులతో సిద్ధం చేస్తున్నారు. గర్భాలయానికి ఎదురుగా పడమటి దిశలో 34 అడుగుల ఎత్తున్న ఈ ధ్వజస్తంభం పసిడి శోభతో కాంతులీనుతోంది.
ఇదీ చదవండి : మహాకుంభ సంప్రోక్షణకు సర్వం సిద్ధం.. ఆ తర్వాతే దర్శనాలకు అనుమతి: ఈవో
