పసికందు కిడ్నాప్​ కేసును ఛేదించిన యాదాద్రి పోలీసులు

భర్తతో గొడవపడి పాపను తీసుకొని ఇంట్లోంచి వెళ్లిపోయింది. ఓ జంట చెప్పిన మాయమాటలు నమ్మి వారింటికి వెళ్లింది. మూడు రోజుల పాటు మద్యం మత్తులో ఉండి తన కూతురిని పోగొట్టుకుంది. 20 రోజుల క్రితం ఈ ఘటన జరగగా.. పోలీసుల రంగప్రవేశంతో పాప క్షేమంగా తల్లి ఒడికి చేరింది.

యాదాద్రి భువనగిరి జిల్లా బీబీనగర్ పోలీస్ స్టేషన్ పరిధిలో 20 రోజుల క్రితం కిడ్నాప్​కు గురైన 14 నెలల పసి కందు పూజ కేసును పోలీసులు ఛేదించారు. నిందితులు బీబీనగర్​కి చెందిన గుజ్జర రాజు, పిట్టల మాధవి అని డీసీపీ నారాయణ రెడ్డి వెల్లడించారు. వీరిద్దరూ రైల్వే స్టేషన్ పరిసరాల్లో చిత్తు కాగితాలు ఏరుకొని జీవనం సాగిస్తున్నట్లు తెలిపారు. హైదరాబాద్​ ఎల్బీనగర్​లో నివసించే ఓ మహిళ భర్తతో గొడవపడి తన పాపని తీసుకొని బీబీనగర్ రైల్వే స్టేషన్​కు చేరుకుంది. విషయం గమనించిన నిందితులు మహిళకు మాయమాటలు చెప్పి వారింటికి తీసుకెళ్లారు. మూడు రోజులు పాటు ఆమెతో మద్యం తాగించి పాపని తీసుకొని హైదరాబాద్ పారిపోయారు. బాధిత మహిళ మత్తులో నుంచి మేల్కొని తాను మోసపోయినట్లు గుర్తించింది. వెంటనే స్థానిక పోలీసులకు ఫిర్యాదు చేసింది. గత 20 రోజులుగా పోలీసులు ప్రత్యేక బలగాలతో గాలిస్తున్నారు. ఈ రోజు ఉదయం నిందితులను పట్టుకొని పాపని తల్లి ఒడికి చేర్చారు. కిడ్నాప్ కేసును ప్రతిష్ఠాత్మకంగా తీసుకొని ఛేదించిన పోలీసులను డీసీపీ నారాయణ రెడ్డి అభినందించారు.

ఇవీ చూడండి: బస్సు టైర్​ పంచర్​.. మెట్రో పిల్లర్​కు ఢీ