యాదాద్రి భువనగిరి జిల్లా హాజీపూర్లో వరుస హత్యలకు గురైన బాధిత కుటుంబాలను డీసీపీతో కలిసి జిల్లా పాలనాధికారి అనితా రామచంద్రన్ పరామర్శించారు. ప్రభుత్వం అన్ని విధాలా ఆదుకుంటుందని, ఎవరూ అధైర్య పడొద్దని భరోసా ఇచ్చారు. బాధిత కుటుంబాల్లో అర్హులైన ఒక్కరికి ప్రభుత్వ ఔట్ సోర్సింగ్ ఉద్యోగం కల్పిస్తామని కలెక్టర్ హామీనిచ్చారు.
మరోవైపు హాజీపూర్ సహా పరిసర గ్రామాలకు ఆర్టీసీ బస్సు సదుపాయం కోసం సమాచారం సేకరిస్తున్నామని తెలిపారు. పోలీసుల సహాకారంతో హాజీపూర్కు మొన్నటి నుంచి ఓ బస్సును నడుపుతున్నట్లు గుర్తుచేశారు. వాగుపై వంతెన నిర్మాణానికి ప్రభుత్వం వద్ద ప్రతిపాదనలు ఉన్నాయన్న కలెక్టర్... ఎన్నికలు పూర్తికాగానే బ్రిడ్జి పనులు మొదలవుతాయని తెలిపారు. వీలైనంత తొందరగా హాజీపూర్లో సీసీకెమెరాలు ఏర్పాటు చేస్తామని... ఎలాంటి భయాందోళనకు గురికావోద్దని అన్నారు. విద్యార్థులకు, మహిళలకు అన్నివిధాలా భద్రతా కల్పిస్తామని, వరుస హత్యల నేపథ్యంలో భయంతో చదువులు మానేయాల్సిన అవసరం లేదని స్పష్టం చేశారు.
