Jagadish reddy on central: రైతుల గొంతు నొక్కేందుకు కేంద్రం కుట్రలు: జగదీశ్‌రెడ్డి

Jagadish reddy on central: రైతుల గొంతు నొక్కేందుకు కేంద్ర ప్రభుత్వం కుట్రలు చేస్తోందని రాష్ట్ర విద్యుత్ శాఖ మంత్రి జగదీశ్‌రెడ్డి విమర్శించారు. తెలంగాణలో కరెంటు సరఫరాను భాజపా జీర్ణించుకోవటం లేదని ఎద్దేవా చేశారు. తెలంగాణకు విద్యుత్తు ఇవ్వొద్దని ఏకంగా ఉత్తర్వులు జారీ చేయటం అందులో భాగమేనన్నారు. సూర్యాపేటలో నిర్వహించిన సమావేశంలో ఆయన మాట్లాడారు.

Jagadish reddy on central: కేసీఆర్‌ సర్కార్‌ నిరంతరం అందిస్తున్న విద్యుత్‌ను అడ్డుకుని.. తెలంగాణ ప్రజల గొంతునొక్కేందుకు కేంద్రంలోని భాజపా సర్కార్‌ ప్రయత్నిస్తోందని రాష్ట్ర విద్యుత్‌ శాఖ మంత్రి జగదీశ్‌రెడ్డి ఆరోపించారు. భాజపా పాలిత రాష్ట్రాల్లోనూ సాధ్యంకాని నిరంతర కరెంటును.. తెలంగాణలో అమలు చేస్తుంటే జీర్ణించుకోలేకపోతున్నారని విమర్శించారు. ప్రైవేటు సంస్థల విద్యుత్‌ విక్రయాలపై కేంద్ర ప్రభుత్వం జారీ చేసిన ఉత్తర్వులను సవాల్‌ చేస్తూ... హైకోర్టులో దాఖలు చేసిన పిటిషన్‌కు అనుకూలంగా తీర్పు రావటమే భాజపా కుట్రలకు నిదర్శనమన్నారు. తెలంగాణ విద్యుత్‌ ఇవ్వొద్దంటూ ప్రైవేటు సంస్థలను ఇప్పటికే పలుమార్లు కేంద్రం బెదిరించిందని ఇప్పుడు ఏకంగా ఉత్తర్వులు జారీ చేసి, రైతుల గొంతునొక్కేందుకు కుట్రపన్నిందని ఆయన ఆరోపించారు

నిరంతర విద్యుత్‌ను కేంద్రం అడ్డుకునేందుకు కుట్రలు పన్నుతోంది. తెలంగాణలో కరెంటు సరఫరాను భాజపా జీర్ణించుకోవటంలేదు. చాలారోజులుగా ప్రైవేటువిద్యుత్‌ సంస్థలను బెదిరిస్తున్నారు. కుట్రలో భాగంగా ఇప్పుడు ఏకంగా ఉత్తర్వులు జారీ చేశారు. భాజపా పాలిత రాష్ట్రాల్లో నిరంతర విద్యుత్‌ సాధ్యకావడం లేదు. తెలంగాణలో మాదిరిగానే ఆయా రాష్ట్రాల్లో డిమాండ్లు వస్తున్నాయి. హైకోర్టు మాకు అనుకూలంగా ఇచ్చిన తీర్పే ఇందుకు నిదర్శనం. తెలంగాణ రైతుల గొంతు నొక్కేందుకు కేంద్రం ప్రయత్నిస్తోంది.

- జగదీశ్‌ రెడ్డి, విద్యుత్ శాఖమంత్రి

ప్రైవేటు సంస్థల విద్యుత్తు విక్రయాలపై కేంద్ర ప్రభుత్వం జారీ చేసిన ఉత్తర్వులను సవాల్ చేస్తూ తెలంగాణ ప్రభుత్వం హైకోర్టులో దాఖలు చేసిన పిటిషన్​కు అనుకూలంగా నిన్న తీర్పు రావడం మంత్రి జగదీశ్ రెడ్డి స్పందించారు. దేశంలో నిరంతర విద్యుత్తు ఇస్తున్న ఏకైక రాష్ట్రం తెలంగాణే అన్నారు. ఎన్ని కష్టాలు ఎదురైనా పట్టుదలతో కేసీఆర్ ముందుకు పోతుంటే... విద్యుత్ సంస్థలను ఇబ్బంది పెట్టి విద్యుత్తు రాకుండా చేసే కుట్ర చేస్తున్నారని దుయ్యబట్టారు. తెలంగాణకు విద్యుత్ ఇవ్వొద్దంటూ స్వయంగా కేంద్ర మంత్రి ఆ సంస్థలకు ఫోన్లు చేసి బెదిరిస్తున్నారని ఆరోపించారు. విద్యుత్తు కొనుగోలు ఒప్పందం అనేది ఆయా డిస్కంలు ఆయా జెన్ కో , ట్రాన్స్ కో, ప్రైవేటు ఉత్పత్తిదారుల మధ్య ఒప్పందం జరుగుతుందన్నారు. కానీ కేంద్ర ప్రభుత్వం దీనిపై దాదాగిరి చేస్తోందని విమర్శించారు.

ఇవీ చూడండి: 'పేదలకు కార్పొరేట్ స్థాయి వైద్యం.. చిల్లర రాజకీయాలు ఉపేక్షించం'